1 Chronicles 14

balinese

1Ida Sang Prabu Hiram ratune ring Tirus ngutus utusan idane nangkil ring Ida Sang Prabu Daud. Ida ngaturang taru aras, tukang kayu miwah tukang batu, ring Ida Sang Prabu Daud, buat ngwangun puri.

2Irika Ida Sang Prabu Daud uning mungguing Ida Sang Hyang Widi Wasa sampun ngamanggehang ida dados ratun bangsa Israele tur sampun ngawinang kaprabon idane gemuh landuh pabuat rakyat idane.

3Ring Yerusalem Ida Sang Prabu Daud malih ngambil makudang-kudang rabi tur madue makudang-kudang putra lanang istri.

4Putra-putran idane sane embas ring Yerusalem, inggih punika: Ida Samua, Sobab, Natan, Salomo,

5Yibar, Elisua, Elpelet,

6Nogah, Nepeg, Yapia,

7Elisama, Beelyada miwah Ida Elipelet.

8Ritatkala wong Pilistine miragi mungguing Ida Sang Prabu Daud sane mangkin madeg ratu ring sawewengkon panegara Israele, wadua balan Pilistine tumuli medal gumanti ngejuk Ida Sang Prabu Daud. Irika Ida Sang Prabu Daud medal ka payudan buat ngarepin ipun.

9Wong Pilistine tumuli rauh ring Lebak Repaime tur ngawitin ngrampok irika.

10Ida Sang Prabu Daud tumuli nunasang ring Ida Sang Hyang Widi Wasa kadi asapuniki: “Ratu Sang Hyang Widi Wasa, punapike titiang kalugra buat ngebug wong Pilistine punika? Punapike Palungguh IRatu jaga ngicen titiang kamenangan?” Ida Sang Hyang Widi Wasa raris ngandika sapuniki: “Nah lautang gebug. Ulun lakar ngicen kita kamenangan.”

11Irika Ida Sang Prabu Daud raris ngebug wong Pilistine tur ngaonang ipun ring Baal-Perasim. Ida Sang Prabu Daud raris ngandika sapuniki: “Ida Sang Hyang Widi Wasa suba mrabotang tiang buat ngenyagang wadua balan musuhe buka embahan blabare.” Punika awinannya genahe punika kawastanin Baal-Perasim.

12Ritatkala wong Pilistine jerih kapilayu, ipun pada ngutang arcanipune, tur Ida Sang Prabu Daud raris mrentahang mangda nunjel arcane punika.

13Nenten sue maletan, wong Pilistine malih mawali ka lebake punika tur malih ngrampok irika.

14Ida Sang Prabu Daud malih nunasang ring Ida Sang Hyang Widi Wasa. Pangandikan Ida Sang Hyang Widi Wasa sapuniki: “Eda kita ngebug ia uli dini. Nanging kemaja ilehin tur gebug ia uli sisi dituan, uli samping punyan murbaene.

15Yen kita ningeh munyin anak majalan di muncuk kayune, ditu lautang gebug musuhe, sawireh Ulun lakar majalan ngamaluin kita buat ngalahang wadua balan wong Pilistine ento.”

16Ida Sang Prabu Daud raris ngiringang sapatitah Ida Sang Hyang Widi Wasa. Punika awinannya ida ngulah wong Pilistine ngawit saking Gibeon rauh ka Geser.

17Ida Sang Prabu Daud raris kasub ring sakuubing jagat, tur Ida Sang Hyang Widi Wasa ngawinang parabangsane pada ajerih ring Ida.

← Chapter 13 Chapter 15 →