Proverbs 31

Bashkir 2023 (Изге Яҙма)

1Массалар батшаһы Лемуилдың әсәһенән өйрәнгән аҡыллы һүҙҙәре.

2Эй улым, һиңә нимә әйтәйем? Ҡарынымдың емеше булған улым, нимә һөйләйем? Эй нәҙерҙәремдең улы, һиңә нимә өйрәтәйем!

3Ҡеүәтеңде ҡатындарға бирмә, батшаларҙы бөлгөнлөккә төшөрөүселәргә юлыңды бирмә.

4Батшаларға, Лемуил, батшаларға түгел шарап эсеү, хакимдарға түгел хәмер эҙләп йөрөү;

5юҡһа эсеп иҫереп, ҡанундарҙы оноторҙар, ярлыларҙы хаҡ хөкөмһөҙ ҡалдырырҙар.

6Хәмерҙе һәләк булып барыусыға, шарапты ҡайғыға батҡанға бирегеҙ:

7эсер ҙә ярлылығын онотор, күңел ғазаптарын иҫкә алмаҫ.

8Теле зәғиф кеше өсөн, йәберләнгәндәр хоҡуғы өсөн;

9ғәҙеллекте яҡлап, мохтаждарҙың, хәйерсенең хәле өсөн ауыҙ асып хәбәр һөйлә.

10Әҙәпле ҡатын табыуҙары ҡыйын, аҫылташтан ғәйре баһаһы.

11Ундай ҡатынға иренең йөрәге ныҡ ышана, уның менән һәр саҡ бәрәкәт ҡаҙаныр.

12Ул иренә яманлыҡ ҡылмаҫ, ғүмере буйы яҡшылыҡ эшләр.

13Йөн тетһә лә, етен эшкәртһә лә – ҡулы тилбер, ҡулы белдекле.

14Сауҙа караптары һымаҡ, алыҫтан икмәк табып килтерер.

15Таң һарыһынан йоҡонан торор, ғаиләһенә ашарға хәстәрләр, хеҙмәтсе ҡыҙҙарына эш бүлеп бирер.

16Баҫыу хаҡында ҡайғыртып, һатып алыр, тапҡан аҡсаһына йөҙөм баҡсаһы ултыртыр.

17Билен ҡеүәт менән быуып, ҡулының көсөн арттырыр.

18Эшенең файҙаһын күрә, төндәрендә лә шәме һүнмәй;

19ҡулын иләүескә һуҙа, бармағынан орсоҡ төшмәй;

20ярлыларға игелек күрһәтер, мохтаждарға ярҙам ҡулы һуҙыр.

21Ҡар яуһа ла хәүефләнмәҫ ҡатын, сөнки бөтә ғаиләһенең икешәр ҡат кейеме бар.

22Үҙенә келәмдәр һуға, кейгәндәре – нәфис етен, ҡарағусҡыл ҡыҙыл йөндән.

23Ире ҡала ҡапҡаһы янында яҡшы таныш, илдең аҡһаҡалдары ҡоронда ултырыр.

24Ундай ҡатын етен кейем тегеп һата, сауҙагәрҙәргә ҡушаҡ һуғып бирә.

25Уның өҫ кейеме – ҡеүәт һәм абруй, Ул киләсәккә ҡарап ҡыуана.

26Ауыҙында уның – хикмәтле һүҙ, мәрхәмәт һәм нәсихәт булыр телендә.

27Өй эштәрен гел күҙәтеп тора, ялҡаулыҡтың ни икәнен белмәй.

28Балалары тороп уны данлай, ире маҡтап бөтә алмай:

29«Лайыҡлы ҡатындар күп булғандыр, тик һин уларҙың барыһынан арттырҙың!»

30Мөләйемлек – алдаҡсы, матурлыҡ – буш, ә Раббынан ҡурҡҡан ҡатын данға лайыҡ.

31Хеҙмәтенә ҡарап хөрмәт күрһәтегеҙ уға, эштәрен ҡала ҡапҡаларында маҡтағыҙ!