Zechariah 7

Azerbajani Bible (South) Used in Both Iran and Azerbaijan 2008

1داريوش پادشاهين حاکئمئيّتئنئن دؤردونجو ائلئنده، دوقّوزونجو آي اولان کئسلِو آيينين دؤردونجو گونو، زِکَرئيّايا ربّئن سؤزو نازئل اولدو.

2او واخت بِيت‌ائل اهالئسي شَر-اِصِري، رِگِم-مِلِکي و اونون آداملاريني ربّئن حوضورونا گؤنده‌ردئلر کي، يالوارسينلار و

3قوشونلار ربّئنئن اِوئنده اولان کاهئنلردن و پيغمبرلردن سوروشسونلار: "آيا گرک بِشئنجي آيدا، بو چوخ ائل‌لر عرضئنده اتدئيئمئز کئمي، گئنه ده ياس توتوب اؤزوموزو يمکدن اوزاق ساخلاياق؟"

4او واخت منه قوشونلار ربّئنئن بو سؤزو نازئل اولدو:

5"بوتون اؤلکه خالقينا و کاهئنلره دِه: «يتمئش ائل عرضئنده بِشئنجي و يدّئنجی آيلاردا اوروج توتوب ياس ساخلاديغينيز زامان، مگر منئم اوچون اوروج توتوردونوز؟

6يِيئب-ائچدئيئنئز زامان، مگر اؤزونوز اوچون يِيئب-ائچمئردئنئز؟»

7مگر ربّئن بو سؤزلري هَمن سؤزلر ديئل کي، اورشَلئمئن و اطرافينداکي شهرلرئن اَمئن-آمانليق ائچئنده ياشايديغي زامان نِگِب و هامار بؤلگه‌ده ائنسانلارين ساکئن اولدوغو زامان اوّلکي پيغمبرلرئن واسئطه‌سئله ديئلمئشدي؟"

8زِکَرئيّايا ربّئن بو سؤزو نازئل اولدو:

9"قوشونلار ربّی بله ديئر: «دوزگون و عدالتله موحاکئمه ادئن. هر کس بئربئرئنه محبّت و مرحمت گؤرسدسئن.

10دول آروادا، يِتئمه، قرئبه و يوخسولا ظولم اتمه‌يئن. اوره‌يئنئزده بئربئرئنئزئن ضئدّئنه پئس نئيّتلر توتمايين.»

11آنجاق اونلار اشئتمَکدن بويون قاچيرتديلار، عئنادکارليقلا آرخا چِوئردئلر، اشئتمه‌مَک اوچون قولاقلاريني باغلاديلار.

12اورَکلرئني داش کئمي بَرک اتدئلر کي، قوشونلار ربّئن اؤز روحو ائله اوّلکي پيغمبرلر واسئطه‌سئله گؤنده‌ردئيي قانونو و سؤزلري اشئتمه‌سئنلر. بونا گؤره ده قوشونلار ربّی اونلارا چوخ قضبلَندي.

13قوشونلار ربّی ديئر: «من چاغيرديغيم زامان، اونلار قولاق آسماديلار. بونا گؤره ده، اونلار چاغيرديغي زامان، من ده قولاق آسماياجاغام.

14اونلاري طوفان کئمي تانيماديقلاري بوتون مئلّتلرئن آراسينا سَپَله‌دئم. آرخادا قويدوقلاري اؤلکه اِله وئران قالدي کي، اورايا گدئب-گلن اولمادي. گؤزل تورپاق خاراباليغا چِوئرئلدي.»"

← Chapter 6 Chapter 8 →