Zechariah 12

Azerbajani Bible (South) Used in Both Iran and Azerbaijan 2008

1بو ائخطار ائسرايئل باره‌ده نازئل اولان ربّئن سؤزودور: گؤيلري يايان، يِرئن بونؤوره‌لرئني قويان، ائنسانين ائچئنده‌کي روحا شکئل ورن رب بله بويورور:

2"باخ اورشَلئمي اونون اطرافينداکي بوتون خالقلار اوچون گئجَلدن کاسا اده‌جيم. اورشَلئم کئمي يهودا دا موحاصئره‌يه آليناجاق.

3او گون اورشَلئمي بوتون خالقلار اوچون آغير بئر داش اده‌جيم. اونو قالديرانلارين هاميسي آغير يارالاناجاق. دونيانين بوتون مئلّتلري اونون ضئدّئنه بئرلَشه‌جک.

4او گون هر آتي دهشته، آتليسيني دَلي‌لئيه دوچار اده‌جيم." رب بويورور، "من يهودا نسلئنه گؤز قوياجاغام، آمّا او بئري خالقلارين بوتون آتلاريني کور اده‌جيم.

5او واخت يهودا باشچيلاري اورَکلرئنده دئيه‌جکلر: «اورشَلئم خالقي اؤز تاريسيندا، قوشونلارين ربّئنده گوجلودور.»

6او گون يهودا باشچيلاريني اودونلارين آراسيندا يانان بئر مانقال، دَرزلرئن اورتاسيندا آلوولانان بئر مشعل کئمي اده‌جيم. ساغدا و سولدا اولان بوتون خالقلاري يانديريب محو اده‌جکلر. لاکئن اورشَلئملی‌لر گئنه اورشَلئمده اولان يِرلرئنده ياشاياجاقلار.

7من رب اوّلجه يهودا خالقينين مسکنلرئني خئلاص اده‌جيم. اونا گؤره کي، داوود نسلی و اورشَلئمده ياشايانلار يهودادان چوخ شرفلي اولماسين.

8من رب او گون اورشَلئمده ياشايانلاري حئفظ اده‌جيم. او گون اونلارين آراسيندا لاپ گوجسوز آدام داوود کئمي، داوود نسلی ده تاري کئمي، اونلارين قاباغيندا گِدن ربّئن مَله‌يي کئمي اولاجاقدير.

9او گون بو نئيّتده اولاجاغام کي، اورشَلئمه هوجوم اتمک اوچون گلن بوتون مئلّتلري محو اِدئم.

10داوود نسلی و اورشَلئمده ياشايانلارين اوستونه فيض و يالواريش روحونو تؤکه‌جيم. اونلار منه-بدنئني دِشدئکلري آداما باخاجاقلار و يِگانه اوغلونا ياس توتان آدام کئمي، اونا ياس توتاجاقلار، ائلک اوغلو اوچون درد چکن آدام کئمي درد چکه‌جکلر.

11او گون اورشَلئمده بؤيوک ماتم اولاجاق، مِگئدّو اوواسيندا، هَدَد-رئمّوندا اولدوغو کئمي بؤيوک ماتم اولاجاق.

12اؤلکه‌ده هر نسئل اؤز ائچئنده ياس توتاجاق: داوود نسلی آيري، آروادلاري آيري، ناتان نسلی آيري، آروادلاري آيري،

13لاوي نسلی آيري، آروادلاري آيري، شئمعي نسلی آيري، آروادلاري آيري ياس توتاجاق.

14بوتون قالان نسئل‌لري آيري-آيري، آروادلاري دا آيري ياس توتاجاق.

← Chapter 11 Chapter 13 →