Psalms 77

Azerbajani Bible (South) Used in Both Iran and Azerbaijan 2008

1اوجا سَسله تارييا باغيريرام، اوجا سسله تارييا کي، منه قولاق ورسئن.

2دار گونومده پروردئگاريمي آختارديم؛ بوتون گجه، يورولمادان اَلئمي اوزاتديم، جانيم تسلّي تاپماق ائستمه‌دي.

3تاريني يادا سالاندا ناله ادئرم، دوشوننده روحوم اؤزومدن گدئر. سِلا.

4گؤزلرئمي اوياق ساخلادين، جانيمين سيخيلديغيندان دانيشا بئلمئرم.

5قدئم گونلري، کچمئش ائللري دوشونورم،

6گجه ائچئنده نغمه‌مي خاطيرلاييرام، اوره‌يئمده درئن دوشونورم، روحوم دا ائچئمده بله سوروشور:

7"آيا آغا بئزي ابده کئمي ردّ اده‌جک؟ آيا بئر داها راضي اولماياجاق؟

8آيا اونون محبّتي ابده کئمي کسئلئب؟ سؤزو نسئلدن-نسله بوشا چيخيب؟

9آيا تاري رحم اتمه‌يي ياددان چيخارديب؟ مرحمتئني قضبئنده باغلاييب؟" سِلا

10او زامان ددئم: "منئم قوصّم بودور کي، اوجالاردا اولان گوجونو آرتيق گؤرسدمئر."

11ربّئن ائشلرئني خاطيرلاياجاغام؛ بلي، قدئم زاماندا اتدئيي مؤجوزه‌لرئني خاطيرلاياجاغام.

12سنئن بوتون ائشلرئني درئن دوشونه‌جيم، قودرتلي عمللرئن حاقّيندا فئکئر اده‌جيم.

13سنئن يولون موقدّسدئر، اي تاري، تاري کئمي بؤيوک تاري کئمدئر؟

14مؤجوزه ادن تاري سنسن. خالقلار آراسيندا قودرتئني بئلدئرئبسن.

15قولونلا خالقيني خئلاص ادئبسن؛ يعقوب و يوسئفئن اؤولادلاريني! سِلا

16سولار سني گؤردولر، اي تاري! سولار سني گؤروب تئتره‌دئلر، درئن سولار دا ده تئتره‌دي.

17بولودلار سو تؤکدولر، گؤيلر گورولدادي؛ سنئن اوخلارين هر طرفه اوچدو،

18سنئن ائلديريمينين سسي، طوفان ائچئندن اشئدئلدي، شئمشکلرئن ير اوزونه ائشيق ساچدي، ير تئتره‌يئب لرزه‌يه دوشدو،

19سنئن يولون دهنزدن کچدي، سنئن يولون چوخ سولار آراسيندان! آمّا ائزلرئن بلّي ديئلدي.

20موسا و هارونون الي ائله، خالقيني سورو کئمي هئدايت اتدئن.

← Chapter 76 Chapter 78 →