Psalms 57

Azerbajani Bible (South) Used in Both Iran and Azerbaijan 2008

1منه رحم ات، اي تاري، منه رحم ات! چونکي جانيم سنه پناه گتئرئر؛ بو بلالارين کچئب-گتمه‌سئنه قدر، سنئن قانادلارينين کؤلگه‌سئنه پناه گتئرئرم.

2اوجالاردا اولان تارينين درگاهينا فرياد اده‌جيم، او تارينين درگاهينا کي، منئم ائنتئقاميمي آلير.

3گؤيدن گؤنده‌رئب منه نئجات وره‌جک؛ جانيمين قصدئنه دوران ظالئم آداملاري تنبه اده‌جک. سِلا تاري محبّت و وفاسيني گؤندره‌جک.

4جانيم آصلانلار آراسيندادير، آلوولانان آداملار آراسيندا ياتيرام کي، دئشلري نئزه‌دئر، اوخلاردير، دئللري ائتي قيلينج‌دير.

5گؤيلر اوستونه داها اوجالان، اي تاري! قوي سنئن شؤوکتئن تامام دونيادان داها اوجا اولسون.

6اونلار منئم قدملرئم اوچون تله قوروبلار؛ جانيم بوکولوب، قاباغيمدا قويو قازيبلار، اونون ائچئنه اؤزلري دوشوبلر. سِلا

7اوره‌يئم قراريني ورئب، اي تاري! اوره‌يئم قراريني ورئب؛ اوخوياجاغام، پرستئش نغمه‌سي اوخوياجاغام.

8اويان، اي جانيم! اويان، اي چنگ، اي طنبور! من سحري اويانديراجاغام.

9خالقلار آراسيندا سنه حمد اده‌جيم، اي پروردئگار؛ طايفالار آراسيندا سنه پرستئش نغمه‌سي اوخوياجاغام.

10چونکي سنئن محبّتئن گؤيلره قدر بؤيوکدور، حقئقتئن بولودلارا يتئشئر.

11گؤيلر اوستونه داها اوجالان، اي تاري! قوي شؤوکتئن بوتون ير اوستونده اولسون.

← Chapter 56 Chapter 58 →