Psalms 16

Azerbajani Bible (South) Used in Both Iran and Azerbaijan 2008

1مني حئفظ ات، اي تاري، چونکي سنه پناه گتئرئرم.

2ربّه ددئم: "سن منئم پروردئگاريمسان، سندن ساوايي ياخشي بئر شيئم يوخدور."

3ير اوزونده اولان موقدّس ائنسانلارا گلئنجه، "اونلار او فاضئل‌لردئلر کي، بوتون شادليغيم اونلاردادير."

4اؤزگه آللاهلارين دالينا دوشن ائنسانلارين قوصّه‌لري چوخالاجاق. اونلارين قانا باتميش مايع تقدئملرئني، من تقدئم اتمه‌رم؛ اونلارين آدلاريني دوداقلاريما دا آلمارام.

5سن اي ربّئم، حئصّه‌مئن پايي، کاسامين پايي سنسن؛ پوشکومو امئن-آمانليقدا سن ساخلاييرسان.

6قئسمتئم نعمتلي يرلره دوشوب. حقئقتن ده آلديغيم مئراث گؤزَلدئر.

7منه نصئحت ورن ربّه حمد اده‌جيم؛ اوره‌يئم حتّا گجه ده منه تعلئم ورئر.

8ربّي دائم گؤزومون قاباغينا قويموشام؛ منئم صاغ الئمده اولدوغو اوچون يرئمدن ترپنمه‌رم.

9اونون اوچون ده اوره‌يئم سوئنئر، جانيم شادليق ادئر؛ بلي، بدنئم ده امئن-آمانليقدا ساکئن اولاجاق.

10چونکي مني اؤلولر دئيارينا بوراخمازسان، موتّقی اولاني چورومه‌يه قويمازسان.

11حيات يولونو منه بئلدئرئرسن. شادليق دولولوقلا سنئن حوضوروندادير، صاغ طرفئنده ابدي کِفلردئر.

← Chapter 15 Chapter 17 →