Psalms 147

Azerbajani Bible (South) Used in Both Iran and Azerbaijan 2008

1ربّه حمد ادئن. تاريميزا پرستئش نغمه‌سي اوخوماق نه ياخشي‌دير! چونکي خوشدور، حمده لايئقدئر.

2رب اورشلئمي بئنا ادر؛ ائسرايئلئن اسارتده اولانلاريني بئر يره ييغيب گتئرر،

3اوره‌يي سينميشلاري صاغالدار، اونلارين يارالاريني باغلايار.

4اولدوزلارين ساييني سايار؛ اونلارين هاميسيني آدلاري ائله چاغيرار.

5بئزئم پروردئگاريميز بؤيوکدور، قودرتي چوخدور؛ علمئنه حد يوخدور.

6رب باشي آشاغي آداملاري اوجالدار؛ پئس آداملاري يره قدر آلچاق ادر.

7ربّه شوکورلرله اوخويون؛ تاريميزا طنبورلا پرستئش نغمه‌سي اوخويون،

8او کي، گؤيلري بولودلارلا اؤرتور، او کي، ياغيشي ير اوچون حاضيرلايير، او کي، داغلاردا اوت بئتدئرئر.

9حيوانلارا، چيغيريشان قارغا بالالارينا او، يمکلرئني ورئر.

10آتين قووّتئندن شادليق اتمز، ائنسانين بودلاريندان خوشلانماز.

11رب اوندان قورخانلاردان، محبّتئنه اومئد باغلايانلاردان خوشلانار.

12ربّه حمد ات، اي اورشلئم! تارينا حمد ات، اي صحيون!

13چونکي دروازالارينين چفته‌لرئني قووّتلندئرئب، ائچئنده اولان اؤولادلارينا برکت ورئب.

14او، سنئن سرحدلرئنه صولح حاکئم ادر، بوغدانين اعلاسي ائله سني دويورار.

15امرئني يره گؤنده‌رَر؛ سؤزو تز آخار.

16آغ يون کئمي قار ورر؛ شاختاني کول کئمي سپر.

17دولوسونو تئکه-تئکه آتار؛ اونون سويوغونون قاباغيندا کئم دايانا بئلر؟

18سؤزونو گؤنده‌رر و اونلاري ارئدر؛ يلئني اسدئرر و سولاريني آخاردار.

19سؤزونو يعقوبا، قانونلاريني و حؤکملرئني ائسرايئله اعلان ادر.

20هچ بئر مئلّته بله اتمه‌يئب؛ اونون حؤکملرئني بئلمئرلر. ربّه حمد ادئن!

← Chapter 146 Chapter 148 →