Psalms 10

Azerbajani Bible (South) Used in Both Iran and Azerbaijan 2008

1يارب، نه اوچون اوزاقدا دورورسان؟ نه اوچون دارليق زامانلاريندا اؤزونو گئزله‌دئرسن؟

2پئس آدام تکبّورونده فاغير آداما عذاب ورئر؛ قوي اله اتدئيي حئيله‌لره اؤزلري توتولسونلار.

3چونکي پئس آدام اوره‌يئنئن هوسئنه فخر ادئر، طاماحکار آدام ربّه لعنت ادئب اونو حقئر گؤرور.

4پئس آدام تکبّورلو اوزونه گؤره اونو آختارماز، بوتون دوشونجه‌لرئنده تاري اصلا يوخدور.

5يوللارينين آخيري همئشه خوشدور، سنئن حؤکملرئن اونون گؤروشوندن چوخ اوزاقدير، بوتون دوشمنلرئني هچه سايير.

6اوره‌يئنده ديئر: "هچ شي مني تئتره‌ده بئلمز، اصلا زحمته دوشمه‌رم."

7اونون آغزي لعنتله، حئيله ائله، ظولمله دولودور؛ زحمت و پئسلئک دئلئنئن آلتيندادير.

8کندلرئن قيراغيندا کمئن چکئب گؤزله‌يَر؛ گئزلي يرلرده گوناهسيز آدامي اؤلدورَر؛ گؤزلرئني چاره‌سئز قوربانلارينا دئکَر و گودَر.

9يوواسيندا اوتورموش بئر آصلان کئمي، گئزلي يرده اوتوروب گودَر؛ فاغير آدامي توتماق اوچون اوتوروب گودَر؛ تورونا چکئب اونو توتار.

10قوربانلاري چاره‌سئز دوشَر، اونون قودرتي آلتيندا ازئلَر.

11پئس آدام اوره‌يئنده دئير: "تاري ياددان چيخارديب، اوزونو اؤرتوب، هچ گؤرمه‌يه‌جک."

12قالخ يارب، اونو وور، اي تاري! فاغير آداملاري ياددان چيخارتما.

13پئس آدام نه اوچون تاريني حقئر گؤرسون؟ نه اوچون اوره‌يئنده دسئن کي، "مندن حساب ائستمه‌يه‌جک"؟

14لاکئن سن زحمتي و عذابي گؤرورسن کي، اؤز الئنله اونا جزا وره‌سن. چاره‌سئز آدام اؤزونو سنه تاپشيرير؛ يتئملره ائمداد ادن سنسن.

15پئس آدامين، شر آدامين قولونو سيندير، اونون پئسلئيئني او قدر آختاريب حسابلا کي، آرتيق هچ بئر شي تاپماياسان.

16رب ابددن ابده‌جک پادشاهدير! مئلّتلر اونون دئياريندان محو اولاجاقلار.

17فاغير آداملارين ائسته‌يئني اشئده‌جکسن، يارب، اونلاري سن اورکلندئره‌جکسن، قولاقلارين اونلارين سسئني اشئده‌جک کي،

18يتئملردن و مظلوملاردان دئفاع اده‌سن، اله کي، تورپاقدان اولان ائنسان بئر داها قورخو سالماسين.

← Chapter 9 Chapter 11 →