Numbers 36

Azerbajani Bible (South) Used in Both Iran and Azerbaijan 2008

1يوسئف اؤولادلارينين نسئل‌لرئندن مِنَسّه اوغلو، ماکئر اوغلو، گئلعاد اؤولادلارينين عايئله باشچيلاري ياخينلاشيب، موسانين قاباغيندا و ائسرايئل طايفالارينين باشچيلاري اولان رهبرلرئن قاباغيندا دانيشيب،

2بله ددئلر: "رب آغاميزا امر اتدي کي، اؤلکه‌ني ائسرايئل اؤولادلارينا پوشکله ائرث اولاراق ورئن. رب طرفئندن آغاميزا امر اولوندو کي، قارداشيميز صِلوفخادين ائرثئني اونون قيزلارينا ورسئن.

3اگر صِلوفخادين قيزلاري آيري بئر ائسرايئل قبئله‌سئنئن کئشئلرئنه اَره گتسه‌لر، اونلارين ائرثي بئزئم آتالاريميزين ائرثئندن گؤتورولوب، اَرلرئنئن قبئله ائرثئنه قاتيلاجاق. بلجه، پوشکله بئزه دوشَن پاي آزالاجاق.

4ائسرايئل اؤولادلارينين آزادليق ائلي گلنده، قيزلارين ائرثي اَرلرئنئن قبئله ائرثئنه علاوه اولوناجاق. بلجه، قيزلارين ائرثي آتالاريميزين قبئله‌سئنه دوشَن ائرثدن دوشه‌جک."

5موسا ربّئن امرئنه گؤره ائسرايئل اؤولادلارينا امر ادئب ددي: "يوسئف اؤولادلارينين قبئله‌سي دوز ديئر.

6صِلوفخادين قيزلاري حاقّيندا ربّئن امر ادئب ددئيي سؤز بودور: «اونلار اؤز ائسته‌دئکلري کئشئيه اَره گده بئلرلر، آنجاق آتالارينين منصوب اولدوغو قبئله‌دن اولان آداما کي، نسئل ائچئنده‌دئر، اَره گتمه‌لي‌دئرلر.

7بلجه ائسرايئل اؤولادلارينين ائرثي قبئله‌دن قبئله‌يه کچمز. چونکي ائسرايئل اؤولادلارينين هر بئري آتالاري قبئله‌سئنئن ائرثئنه باغلي قالمالي‌دير.

8ائسرايئل قبئله‌لرئندن هر هانسي بئرئنده ائرثه مالئک اولان هر قيز، آتاسينين منصوب اولدوغو قبئله‌دن و نسئلدن اَره گتمه‌لي‌دئر کي، هر بئر ائسرايئل اؤولادي آتالارينين ائرثئنه مالئک اولسون.

9بلجه هچ بئر ائرث بئر قبئله‌دن آيري قبئله‌يه کچمز. چونکي هر بئر ائسرايئل قبئله‌سي اؤز ائرثئنه باغلي قالمالي‌دير.»"

10نجه کي، رب موسايا امراتمئشدي، صِلوفخادين قيزلاري دا اِله اتدئلر.

11صِلوفخادين قيزلاري مَخلا، تئرصا، خوگلا، مئلکا، و نوعا، عَمئسي اوغلانلارينا اَره گتدئلر.

12اونلار يوسئف اوغلو مِنَسّه اؤولادلارينين نسئللرئنه منصوب کئشئلره اَره گتدئلر. اونا گؤره ده ائرثي آتالارينين منصوب اولدوغو قبئله و نسئل ائچئنده قالدي.

13بونلار ربّئن ائسرايئل اؤولادلارينا وردئيي امرلر و حؤکملردئر کي، اونلاري موسا واسئطه‌سئله اوردون چايينين يانيندا، اَرئحانين موقابئلئنده‌کي موآب اووالاريندا وردی.