Numbers 10

Azerbajani Bible (South) Used in Both Iran and Azerbaijan 2008

1سونرا رب موسا ائله دانيشيب اونا بله ددي:

2"اؤزونه ياستيلانميش گوموشدن ائکي کَره‌ناي دوزلت. بونلاري، جاماعاتي چاغيرماق و دوشَرگه‌ده‌کئلرئن يولا دوشمه‌سي اوچون ائشلَت.

3ائکي کَره‌ناي چالينارسا، بوتون جاماعات سنئن يانينا، حوضور چاديرينين گئرئشئنه ييغيلسين.

4اگر تَک بئري چالينارسا، رهبرلر، ائسرايئلئن طايفا باشچيلاري سنئن يانينا ييغيلسينلار.

5ائخطار ورن کئمي چاليناندا، شرقي دوشَرگه‌ده‌کئلر يولا دوشسونلر.

6گئنه ده ائخطار ورن کئمي چاليناندا، جنوبي دوشَرگه‌ده‌کئلر يولا دوشسونلر. اونلاري يولا سالماق اوچون گرک کَره‌ناي ائخطار ورن کئمي چالينسين.

7جاماعاتي ييغماق لازيم اولاندا چالين، آنجاق ائخطار ورن کئمي چالمايين.

8بوندان علاوه، کَره‌نايلاري هارون اوغوللاري اولان کاهئنلر چالسينلار. بو، نسئلدن-نسله سئزئن اوچون ابدی قايدا اولسون.

9او زامان کي، تورپاغينيزدا سئزه هوجوم گتئرن دوشمنئن ضئدّئنه جنگه چيخيرسينيز، کَره‌نايلاري ائخطار ورن کئمي چالين کي، تارينيز ربّئن حوضوروندا خاطيرلانيب، دوشمنلرئنئزدن خئلاص اولاسينيز.

10شاد گونونوزده، تعيئن اولونان بايراملارينيزدا، و آيلارينيزين بئرئنجي گونونده، يانديرما و باريش قوربانلارينيزي تقدئم اِدَرکَن کَره‌ناي چالين؛ تارينيزين قاباغيندا بو سئزئن اوچون بئر خاطئره اولسون. تارينيز رب، منم."

11ائکئنجي ائلئن ائکئنجي آييندا، آيين ائيئرمئنجي گونونده شهادت خيمه‌سئنئن اوستوندن بولود چکئلدي.

12ائسرايئل اؤولادلاري کؤچلرئنه گؤره سئنا صحراسيندان يولا دوشدولر. بولود پاران صحراسيندا داياندي.

13بلجه اونلار ائلک دفه اولاراق، ربّئن موسايا امر اتدئيي کئمي يولا دوشدولر.

14هاميدان اوّل يهودانين قوشون دسته‌لري اؤز بايراقلاري آلتيندا يولا دوشدولر. بو قوشونا عَمّئناداب اوغلو نَخشون رهبرلئک ادئردي.

15يئسّاکار قبئله‌سئنئن قوشونونا صوعار اوغلو نِته‌نِل رهبرلئک ادئردي.

16زِبولون قبئله‌سئنئن قوشونونا دا خِلون اوغلو اِلئآب رهبرلئک ادئردي.

17سونرا خيمه سؤکولدو؛ و خيمه‌ني داشييان گِرشون و مِراري اؤولادلاري يولا دوشدولر.

18رِعوبئنئن قوشون دسته‌لري اؤز بايراقلاري آلتيندا يولا دوشدولر. بو قوشونا شِدِه‌اور اوغلو اِلئصور رهبرلئک ادئردي.

19شَمعون قبئله‌سئنئن قوشونونا صورئشَدّاي اوغلو شِلومئيِل رهبرلئک ادئردي.

20جاد قبئله‌سئنئن قوشونونا دِعواِل اوغلو اِلياصاف رهبرلئک ادئردي.

21موقدّس اشيالاري داشييان قوحاتلي‌لار يولا دوشدولر؛ او بئرئلر گلنه‌جک خيمه‌ني قورارديلار.

22اِفرايئمئن قوشون دسته‌لري اؤز بايراقلاري آلتيندا يولا دوشدولر. بو قوشونا عَمّئهود اوغلو اِلئشاماع رهبرلئک ادئردي.

23مِنَسّه قبئله‌سئنئن قوشونونا پِدَهصور اوغلو گَملي‌اِل رهبرلئک ادئردي.

24بِنيامئن قبئله‌سئنئن قوشونونا دا گئدعوني اوغلو اَبئدان رهبرلئک ادئردي.

25آمّا لاپ آخيردا دانين قوشون دسته‌لري اؤز بايراقلاري آلتيندا يولا دوشدولر. بو قوشونا عَمّئشَدّاي اوغلو اَخئعَزَر رهبرلئک ادئردي.

26آشِر قبئله‌سئنئن قوشونونا عوکران اوغلو پَگعي‌اِل،

27نَفتالي قبئله‌سئنئن قوشونونا عِينان اوغلو اَخئرَع رهبرلئک ادئردي.

28ائسرايئلئن قوشون دسته‌لري بو نئظاملا يولا دوشدولر.

29موسا قايين‌آتاسي مئديانلي رِعواِل اوغلو خوبابا ددي: "ربّئن «سئزه وره‌جيم» ددئيي يره يولا دوشوروک؛ بئزئمله گل، بئز سنه ياخشيليق اده‌رئک. چونکي رب ائسرايئله ياخشيليق اده‌جَيئنه سؤز ورئب."

30لاکئن حوباب اونا ددي: "گده بئلمه‌رم. من اؤز تورپاغيما و قوحوملاريمين يانينا گده‌جيم."

31موسا ددي: "خاهئش ادئرم، بئزي ترک اتمه، چونکي صحرادا دوشَرگه سالاجاغيميز يرلري سن بئلئرسن. سن بئزه گؤز اولارسان.

32اگر بئزئمله گده‌سن، ربّئن بئزه اده‌جَيي ياخشيليغي بئز ده سنه اده‌رئک."

33بلجه ائسرايئل اؤولادلاري ربّئن داغيندان آيريليب، اوچ گون يول گتدئلر. ربّئن عهد سانديغي دا اوچ گون اونلارين قاباغيندا گدئردي کي، دئنجَله‌جکلري يري اونلارا گؤرسدسئن.

34دوشَرگه سالديقلاري يردن يولا دوشدوکلري واخت، ربّئن بولودو گوندوز اونلارين اوستونده ائدي.

35سانديق يولا دوشَنده موسا ددي: "يارب قالخ! قوي دوشمنلرئن داغيلسين، سندن نئفرت ادنلر سنئن حوضوروندان قاچسين."

36سانديق داياناندا بله ددي: "يارب، ائسرايئل طايفالارينين اون‌مئنلر مئنلرئنئن يانينا قاييت."

← Chapter 9 Chapter 11 →