Luke 21

Azerbajani Bible (South) Used in Both Iran and Azerbaijan 2008

1عئسا يوخاري باخيب، وارلي آداملاري گؤردو کي، ائعانه قوتوسونا هدئيهلرئني آتيرديلار.

2و کاسيب بئر دول آروادي دا گؤردو کي، اورايا ائکي قارا پول قويور.

3و ددي: "دوغروسونو سئزه ديئرم؛ بو يوخسول دول آرواد هاميدان چوخ پول آتدي.

4چونکي اونلارين هاميسي اؤز وارلارينين آرتيقليغيندان هدئيّه وردئلر، لاکئن بو آرواد کاسيبليغينا باخماييب، کچئنمک اوچون الئنده نه وار ائدي، وردي."

5بعضي آداملار معبدئن گؤزل داشلاريندان و هدئيّهلرله بزنمئش اولدوغوندان سؤز ادن واخت، عئسا ددي:

6"اِله گونلر گلهجک کي، بورادا گؤردويونوز شيلردن داش، داش اوسته قالماياجاق، هر شي محو اولاجاق."

7اونلار اوندان سوروشدولار: "اوستاد! بو ددئکلرئن نه زامان اولاجاق؟ و بو شيلرئن باش ورمه‌سي واختينين علامتي نه‌دئر؟"

8عئسا ددي: "دئقّتلي اولون کي، سئزي آلداتماسينلار. چونکي بئر چوخلاري منئم آديملا گلئب دئيهجکلر «منم» و «واخت ياخيندير.» اونلارين دالينجا گتمه‌يئن.

9موحارئبهلر و ائغتئشاش بارهده اشئتدئيئنئز زامان اوره‌يئنئز اوزولمه‌سئن. چونکي بونلارين قاباقجا باش ورمه‌سي گرکدئر، آنجاق آخير تزلئکله گلمز."

10سونرا اونلارا ددي: "خالق خالقين، دؤولت دؤولتئن ضئدّئنه قالخاجاق؛

11گوجلو زلزلهلر، موختلئف يرلرده قيتليقلار و بلالار، دهشتلي حادئثهلر و گؤيدن بؤيوک علامتلر اولاجاق.

12آمّا بونلارين هاميسيندان قاباق، منئم آديما گؤره سئزه ال آتاجاقلار، سئزي توتوب عذاب ورهجکلر، کنئسهلره و زئندانلارا تسلئم اده‌جکلر، پادشاهلار و والئلر قاباغينا آپاراجاقلار.

13و بو، سئزه شهادت اوچون بئر فورصت اولاجاق.

14بونا گؤره اوره‌يئنئزده بونا قرار ورئن کي، نجه جاواب ورمه‌يئنئز اوچون قاباقجادان فئکئرلي اولماياسينيز.

15چونکي من اؤزوم سئزه اله بئر نئطق و حئکمت ورهجه‌يم کي، سئزه ضئدّ دورانلارين هچ بئري نه اونا ائراد توتا بئلسئنلر، نه ده اونا ضئدّ دورا بئلسئنلر.

16حتّا والئدينلرئنئز، قارداشلارينيز، قوحوملارينيز، و دوستلارينيز طرفئندن تسلئم اولوناجاقسينيز و سئزلردن بعضئسئني اؤلدوردهجکلر.

17و منئم آديما گؤره هامي سئزدن نئفرت ادهجک.

18لاکئن باشينيزدان بئر توک بله دوشميهجک.

19دؤزوب دايانماقلا جانينيزي خئلاص ادهجکسئنئز.

20قوشونلارين اورشلئمي موحاصئره اتدئيئني گؤرن زامان بئلئن کي، اونون وئرانليغينين واختي ياخينلاشيبدير.

21او واخت، يهودئيهده اولانلار داغلارا قاچسينلار؛ شهرده اولانلار اورادان چيخسينلار و اطرافدا اولانلار اورايا گئرمه‌سئنلر.

22چونکي بو گونلر قئصاص گونلري‌دئر کي، بوتون يازيلار يرئنه يتئشسئن.

23واي او گونلرده بويلو اولانلارين و اوشاق اَمئزدئرن آروادلارين حالينا! چونکي بو اؤلکهده بؤيوک فلاکت و بو خالقين ضئدّئنه قضب اولاجاقدير.

24قيلينج آغزينا دوشهجکلر، بوتون خالقلار آراسينا اسئر آپاريلاجاقلار و قيري‌يهودئلرئن واختي تامام اولانا کئمي، اورشلئم قيري‌يهودئلر طرفئندن پايمال اولاجاقدير.

25گونشده، آيدا، و اولدوزلاردا علامتلر اولاجاقدير، ير اوزونده مئلّتلر دهنزئن و شپهلرئن گورولتوسوندن ائضطئراب ائچئنده اولاجاقلار.

26ائنسانلار قورخودان و دونيانين باشينا گلنلري گؤزلمکدن هوشدان گدهجکلر. چونکي گؤيلرئن قودرتي اسهجک.

27او زامان اونلار ائنسان اوغلونون بولودلار ائچئنده قودرت و بؤيوک عئزّتله گلدئيئني گؤرهجکلر.

28بو ائشلر يرئنه يتئشمه‌يه باشلايان واخت، يوخاري باخين و باشينيزي قالديرين چونکي خئلاصينيز ياخيندير."

29و اونلارا بئر مثل چکدي: "انجئره و بوتون آغاجلارا باخين.

30يارپاق آچاندا بونو گؤرورسونوز و اؤزونوزدن بئلئرسئنئز کي، ياي آرتيق ياخيندير.

31الجه ده، سئز بو شيلرئن باش وردئيئني گؤرنده، بئلئن کي، تارينين پادشاهليغي ياخيندير.

32دوغروسونو سئزه ديئرم؛ بو شيلرئن هاميسي واقع اولمايينجا بو نسئل کچئب گتميهجکدئر.

33گؤي و ير کچئب گدهجک، لاکئن منئم سؤزلرئم اصلا کچئب گتميهجکدئر.

34دئقّتلي اولون کي، اوره‌يئنئز قارينقولولوق و کفلئلئکله، بو حياتين اوموراتي ائله آغيرلاشماسين و او گون، سئزه تله کئمي قفلتن گلمه‌سئن.

35چونکي او گون، ير اوزونده ياشايانلارين هاميسينين اوستونه گلهجکدئر.

36بونا گؤره ده همئشه آييق اولون و دوعا ادئن کي، بوتون باش ورهجک بو شيلردن خئلاص اولماغا و ائنسان اوغلونون حوضورونا چيخماغا قودرتئنئز اولسون."

37عئسا گوندوزلر معبدده تعلئم ورئردي، لاکئن گجهلري اورادان چيخيب زيتون داغيندا کچئردئردي.

38و بوتون خالق سحر تزدن اونون سؤزلرئني اشئتمک اوچون اونون يانينا، معبده گلئردئلر.

← Chapter 20 Chapter 22 →