Leviticus 5

Azerbajani Bible (South) Used in Both Iran and Azerbaijan 2008

1اگر بئر نفر گؤردويو و يا اشئتدئيي بئر شي حاقّيندا جاماعات قاباغيندا شهادت ورمه‌سه، تقصئري اؤز بوينونادير.

2بئلمه‌دن هر هانسي بئر نجئس شيه توخونان، ائستر نجئس وحشي حيوانين لِشي اولسون، ائستر نجئس مال-حيوانين لِشي، يا دا قايناشان نجئس حيوانين لِشي، او آدام نجئس و تقصئرکار ساييلير.

3اگر بئلمه‌دن ائنسان مدفوعونا توخونسا، اونو نجئسله‌ين شيه توخونان آدام اونو بئلَنده تقصئرکار ساييلير.

4هر کس کي، پئسلئک و يا ياخشيليق اتمک اوچون، دوشونمه‌دن و بئلمه‌دن احتياطسيز بئر آند ائچئر، بونو بئلَنده تقصئرکار ساييلير.

5بو آدام بونلاردان بئرئنه گؤره تقصئرئني بئلَنده، گرک گوناهيني اعتئراف اتسئن.

6و او گوناها گؤره ربّئن حوضوروندا تقصئرئني يوماق اوچون سورودن دئشي قوزو، يا دا دئشي کچي گؤتوروب، گوناه قورباني اولاراق گتئرسئن. بونونلا کاهئن او آدام اوچون گوناهيني کفّاره اتسئن.

7لاکئن اگر او آدامين قوزو قورباني کَسمه‌يه گوجو چاتميرسا، گوناهينا گؤره تقصئرئني يوماق اوچون ربّه ائکي قومري قوشو، و يا دا ائکي گؤيرچئن گتئرسئن؛ بئرئني گوناه قورباني، و او بئرئني يانديرما قورباني.

8اونلاري کاهئنه گتئرسئن. کاهئن قاباق گوناه قورباني اولان قوشو تقدئم اتسئن: باشيني بدندن آييرمادان بوينونو اوزسون

9و گوناه قوربانينين قانيندان قوربانگاهين بئر طرفئنه سَپسئن، قانين قالانيني قوربانگاهين آلتليغينا تؤکسون. بو، گوناه قورباني‌دير.

10ائکئنجي قوش دا قايدا-قانونا موناسئب اولاراق يانديرما قورباني کئمي تقدئم اولونسون. بونونلا کاهئن او آدام اوچون ائشلَتدئيي گوناهي کفّاره اتسئن کي، او باغيشلانسين.

11آمّا اگر او آدامين حتّا ائکي قومري قوشونا و يا ائکي گؤيرچئنه گوجو چاتميرسا، قوي ائشلَتدئيي گوناه اوچون نارين اوندان اِفانين اوندا بئرئني گوناه قورباني اولاراق تقدئم اتسئن. لاکئن اونون اوستونه نه ياغ قويسون، نه ده کوندور. چونکي بو گوناه قورباني‌دير.

12اونو کاهئنئن يانينا گتئرسئن. کاهئن اوندان خاطئره تقدئمي اولاراق بئر اوووج گؤتورسون و اونو ربّه تقدئم اتسئن و قوربانگاهدا توستوله‌دئب يانديرسين. بو، گوناه قورباني‌دير.

13بونونلا کاهئن او آدام اوچون ائشلَتدئيي هر هانسي بئر گوناهي کفّاره اتسئن کي، او آدام باغيشلانسين. قالان حئصّه تاخيل تقدئمي کئمي کاهئنه عاييددير.»"

14رب موسايا ددي:

15«خَيانت ادن و ربّئن موقدّس شيلرئنه سَهوَن گوناه ادن هر کس، تقصئر قورباني اولاراق سورودن عيبسئز بئر قوچ گتئرسئن. بو تقصئر قورباني موقدّس مکانين شِکِلئنه موناسئب، گوموش شِکِلله گرک قئيمت قويولسون.

16موقدّس شيه ووردوغو زئياني دا قوي او آدام ورسئن و اوستونه بِشده بئرئني علاوه ادئب کاهئنه ورسئن؛ کاهئن اونون اوچون تقصئر قورباني اولان قوچلا کفّاره اتسئن کي، او باغيشلانسين.

17اگر بئر نفر ربّئن قدغن اتدئيي بوتون امرلرئنئن ضئدّئنه بئر ائش گؤروب گوناه ائشلَتسه و بونو بئلمه‌دن اتسه، گئنه ده تقصئرکار ساييليب جزاسيني چکمه‌لي‌دئر.

18او، کاهئنئن يانينا تقصئر قورباني اولاراق سورودن عيبسئز و سنئن قئيمت قويدوغونا موطابئق بئر قوچ گتئرسئن. بونونلا کاهئن اونون بئلمه‌دن اتدئيي سهو گوناهي کفّاره اتسئن کي، او باغيشلانسين.

19بو تقصئر قوربانيدير. بو آدام قطعن ربّئن حوضوروندا تقصئرکاردير.

← Chapter 4 Chapter 6 →