Leviticus 26 — Azerbajani Bible (South) Used in Both Iran and Azerbaijan 2008

1اؤزونوزه بوتلر دوزلتمه‌يئن؛ اويما بوت، و يا موقدّس سوتون دا اؤزونوز اوچون قويمايين، اؤلکه‌نئزده يونولموش داش قويوب قاباغيندا سجده اتمه‌يئن؛ چونکي تارينيز رب، منم.

5سئزئن خرمنئنئز اوزوم ييغيمينا قدر داوام اده‌جک، اوزومونوز او قدر بول اولاجاق کي، اونون ييغيلماسي اَکئن واختينا قدر داوام اده‌جک. چؤره‌يئنئزي دويونجا يِيئب، اؤلکه‌نئزده آرخايين ياشاياجاقسينيز.

6اؤلکه‌نئزه صولح وره‌جيم؛ ياتاندا سئزي واهئمه‌يه سالان اولماياجاق. ييرتيجي حيوانلاري اؤلکه‌دن قوواجاغام و موحارئبه اوزو گؤرمَيه‌جکسئنئز.

7دوشمنلرئنئزي قوواجاقسينيز و اونلار قيلينج ضربه‌لري ائله قاباغينيزدا يره ييخيلاجاقلار.

8بِشئنئز يوز آدامي، يوزونوز اون مئن آدامي قوواجاق. دوشمنلرئنئز قيلينج ضربه‌لري ائله قاباغينيزدا يره ييخيلاجاقلار.

9من اوزومو سئزه چوئره‌جيم، سئزي آرتيريب چوخالداجاغام، سئزئنله باغلاديغيم اؤز عهدئمي يرئنه يتئره‌جيم.

10ساخلاديغينيز محصولو يئيه‌جکسئنئز و تزه محصول اوچون کؤهنه‌ني بوشالداجاقسينيز.

11اوسته‌لئک، من آرانيزدا ساکئن اولاجاغام و جانيم سئزدن ائکراه اتمَيه‌جکدئر.

12من ده آرانيزدا ياشاييب سئزئن تارينيز اولاجاغام، سئز ده منئم خالقيم اولاجاقسينيز.

13سئزي مئصئر تورپاغيندان چيخاردان و اونلارين نؤکرچئلئيئندن آزاد ادن، يوغونوزون گئره‌لرئني قيريب باشينيزي اوجالدان تارينيز رب، منم.

14آمّا اگر مندن ائطاعت اتمه‌يئب بوتون بو امرلرئمه عمل اتميه‌سئنئز،

15اگر قانونلاريما خور باخيب حؤکملرئمي قَلبئنئزدن ردّ اده‌سئنئز، اله کي، منئم بوتون امرلرئمه عمل اتمه‌يئب، عهدئمي پوزاسينيز،

16من ده سئزه بونو اده‌جيم: اوستوزه دهشت سالاجاغام. سل و قيزديرما گؤزلرئنئزئن نورونو سؤندوره‌جک، جانينيزي گَمئره‌جک. توخوملارينيزي هدر يره اَکه‌جکسئنئز؛ اونلاردان عمله گلن محصولو دوشمنلرئنئز يئيه‌جک.

17اوزومو سئزدن دؤندره‌جيم اله کي، دوشمنلرئنئزئن موقابئلئنده وورولوب يره ييخيلاسينيز. سئزدن نئفرت ادنلر، اوستونوزده حؤکم سوره‌جکلر؛ سئزي قووان اولماسا دا، قاچاجاقسينيز.

18اگر بونلارا باخماييب گئنه مندن ائطاعت اتمَيه‌سئنئز، او واخت گوناهلارينيزا گؤره سئزي يدّي قات آرتيق جزالانديراجاغام.

19گوجلو تکبّورونوزو قيراجاغام. باشينيز اوستونده اولان گؤيلر دمئر و آياغينيز آلتينداکي يري بورونج کئمي اده‌جيم.

20قووّتئنئز هدر يره تؤکَنه‌جک، چونکي نه تورپاغينيز محصول وره‌جک، نه ده اؤلکه‌ده‌کي آغاجلارينيز مئيوه وره‌جک.

21اگر منئمله عداوت ادئب، سؤزلرئمدن حله ده ائطاعت اتمک ائستَميه‌سئنئز، من ده سئزه گوناهلارينيزا گؤره يدّي قات آرتيق بلا گؤندره‌رم.

22اوستونوزه وحشي حيوانلار گؤندره‌رم کي، اؤولادلارينيزي اؤلدوروب مال-حيوانلارينيزي پارچالايالار و سايينيزي آزالدالار و يوللارينيز ترک اولونموش قالار.

23اگر بونلاردان عئبرت درسي آلماييب منه دؤنمَيه‌سئنئز و حله ده منئمله عداوت اده‌سئنئز،

24من ده سئزئنله عداوت اده‌جيم و گوناهلارينيزا گؤره سئزي يدّي قات آرتيق جزالانديراجاغام.

25عهدي پوزدوغونوزا گؤره قئصاص آلماق اوچون اوستونوزه قيلينج گؤندره‌جيم. شهرلرئنئزده سيغيناندا آرانيزا وَبا سالاجاغام کي، دوشمنئن اَلئنه دوشه‌سئنئز.

26چؤره‌يئنئزي کسدئيئم زامان، اون آرواد بئر تندئرده چؤرک پئشئره‌جک و اونو چکي ائله پايلاياجاقلار، اله کي، ييئب دويماياسينيز.

27اگر سئز بوندان سونرا دا مندن ائطاعت اتمَيه‌سئنئز و منئمله عداوت اده‌سئنئز،

28بو دفه من ده سئزئن حاقّيزدا قضبله عداوت اده‌جيم و من، بلی من، سئزي گوناهلارينيزا گؤره يدّي قات آرتيق تنبه اده‌جيم.

29اوغوللارينيز و قيزلارينيزين اَتئني يئيه‌جکسئنئز.

30سجده‌گاهلارينيزي محو ادئب، بوخور قوربانگاهلارينيزي يوخ اده‌جيم، بوتلرئنئزي دِوئره‌جيم و سئزئن مِيئتلرئنئزي بوتلرئنئزئن مِيئتلرئنئن اوستونه سَره‌جيم، چونکي جانيم سئزدن ائيرَنه‌جکدئر.

31شهرلرئنئزي خارابا قوياجاغام، موقدّس مکانلارينيزي وئرانه‌لئيه دؤنده‌رئب، خوش عطئرلرئنئزي قبول اتميه‌جيم.

32اؤلکه‌نئزي اله وئرانه قوياجاغام کي، اوراني ائشغال ادن دوشمنلرئنئز، دهشته دوشسونلر.

33لاکئن سئزي مئلّتلر آراسينا داغيداجاغام و آرخانيزجا قيلينجلا دوشه‌جيم. تورپاغينيز وئرانه‌لئيه، شهرلرئنئز خاراباليغا دؤنه‌جک.

34سئز دوشمن تورپاغيندا ياشايارکَن، اؤلکه بوتون وئرانليق گونلرئنده سَبّتلرئني توتاجاق؛ بوتون بو واخت عرضئنده اؤلکه دئنجه‌لئب سَبّت ائللرئني توتاجاق.

35اؤلکه بو وئرانليق گونلرئنده، او راحاتليغي گؤره‌جک کي، سئزئن اورادا ياشاديغينيز سَبّتلرئنئزده گؤرمه‌دي.

36دوشمن اؤلکه‌لرئنده سئزدن صاغ قانلارين اورَکلرئنه اومئدسئزلئک سالاجاغام و اونلار حتّا کولَکدن تَرپه‌نَن يارپاغين خيشيلتيسيندان قورخوب قاچاجاقلار. اونلاري قووان اولماسا دا، قيلينج قاباغيندان قاچان کئمي قاچيب ييخيلاجاقلار؛

37بئربئرئنئن اوستونه اله بودره‌يه‌جکلر کي، اله بئل، قيلينج قاباغيندان قاچيرلار، حال بو کي، هچ کئم اونلاري قووالامير؛ دوشمنلرئنئز موقابئلئنده دورماغا قووّتئنئز اولماياجاق.

38مئلّتلر آراسيندا هلاک اولاجاقسينيز، دوشمنلرئنئزئن تورپاغي سئزي اوداجاق.

39سئزدن صاغ قالانلار دا دوشمن اؤلکه‌لرئنده هم اؤز خاطالاري اوچون، هم ده آتالارينين خاطالاريندان اؤتري اونلارلا چورويه‌جکلر.

40اگر اؤزلرئنئن و آتالارينين خاطالارينا اعتئراف ادئب، منئم ضئدّئمه اتدئيي خَيانته، هم ده منئمله اتدئيي عداوته ائقرار اده‌لر،

41و بونا دا کي، من اونلارلا عداوت ادئب اونلاري دوشمنلرئنئن تورپاغينا آپارميشام. اگر اونلارين ختنه اولونماميش اورَکلري يومشاليب خاطالاريني قبول اده‌لر.

42او زامان من يعقوبلا، ائسحاقلا، ائبراهئمله باغلاديغيم عهدئمي و اؤلکه‌ني خاطيرلاياجاغام.

43چونکي اؤلکه‌ني ترک اده‌جکلر و تورپاق اونلارسيز وئران قاليب سَبّت دئنجلرئندن لذّت آپاراجاق. بو آرادا اونلار اؤز خاطالارينين جزاسيني چکه‌جکلر، چونکي حؤکملرئمي ردّ اتدئلر و جانلاري منئم قانونلاريمدان ائيرَندي.

44بونا باخماييب، دوشمن اؤلکه‌سئنده ياشاديقلاري زامان، اونلارا خور باخيب ردّ اتميه‌جيم. بلجه من اونلاري محو ادئب باغلاديغيم عهدئمي پوزماياجاغام، چونکي اونلارين تاريسي رب، منم.

45آنجاق اونلارين حاقّيندا، اَجدادلاري ائله باغلاديغيم عهدي خاطيرلاياجاغام. او اجدالاريني کي، آيري مئلّتلرئن گؤزلري قاباغيندا، اونلارين تاريسي اولماق اوچون مئصئر تورپاغيندان چيخارتديم. رب منم.»"

46بونلار ربّئن اؤزو ائله ائسرايئل اؤولادلاري آراسيندا، سئنا داغيندا موسا واسئطه‌سئله وردئيي قايدالار، حؤکملر و قانونلاردير.