Leviticus 24

Azerbajani Bible (South) Used in Both Iran and Azerbaijan 2008

1سونرا رب موسايا دانيشيب ددي:

2"ائسرايئل اؤولادلارينا امر ات کي، سنه ائشيق اوچون خالئص سيخما زيتون ياغي گتئرسئنلر. بو ياغدان همئشه بئر چيراق

3حوضور چاديريندا، شهادت پرده‌سئنئن بايير طرفئنده يانسين. هارون اونو هر آخشام ربّئن حوضوروندا يانديريب سحره قدر نظارت اتسئن. بو نسئلدن-نسله سئزئن اوچون ابدی قايدا اولسون.

4ربّئن حوضوروندا خالئص قيزيلدان دوزَلمئش چيراقدانداکي چيراقلارا همئشه نظارت اتسئن.

5نارين اون گؤتوروب، اون ائکي فطئر پئشئر؛ هر فطئرده بئر اِفانين اوندا ائکئسئ قدر اون اولسون.

6اونلاري ربّئن حوضوروندا خالئص قيزيلدان دوزه‌لمئش مئزه، ائکي سيرايا آلتي-آلتي قوي.

7هر سيرانين اوستونه خالئص کوندور قوي. چؤرکلرئن اوستونده‌کي کوندور ربّه اود تقدئمي اولان خاطئره تقدئمي اولسون.

8او گرک بو چؤرکلري هر سَبّت گونو دائم ربّئن حوضوروندا دوزسون؛ بو، ائسرايئل اؤولادلاري اوچون ابدی عهددئر.

9بو چؤرکلر هارونلا اؤولادلارينين پايي‌دير. اونلار بو چؤرکلري موقدّس بئر يرده يسئنلر. چونکي بونلار ربّئن اود تقدئملرئندن لاپ موقدّس، هارون اوچون ابدی پاي‌دير."

10بئر گون آناسي ائسرايئللي، آتاسي مئصئرلي اولان بئر آدام، ائسرايئل اؤولادلارينين آراسينا چيخدي. او، دوشَرگه‌ده بئر ائسرايئللي ائله ساواشدي.

11آناسي ائسرايئللي اولان آدام تارينين آدينا کوفر و لعنت اتدي. او آدامي موسانين يانينا گتئردئلر. اونون آناسينين آدي شِلومئت، دئبري قيزي دان قبئله‌سئندن ائدي.

12او آدامي حبس ادئب گؤزله‌دئلر کي، ربّئن قراري اونلارا آيدين اولسون.

13رب موسايا دانيشيب، ددي:

14"لعنت اده‌ني دوشَرگه‌دن قيراغا چيخارت؛ قوي بو لعنتي اشئدنلرئن هاميسي، اللرئني او آدامين باشينا قويسونلار. سونرا بوتون جاماعات اونو داشا باسسينلار.

15ائسرايئل اؤولادلارينا دانيشيب اونلارا دِه: «تاريسينا لعنت ادن هر کس، اؤز گوناهينين آلتيندا قالاجاق؛

16بوندان علاوه، ربّئن آدينا کوفر دئين هر کس گرک اؤلومه ورئلسئن؛ بوتون جاماعات گرک اونو داشلاسين. ائستر قرئب اولسون، ائستر يرلي، تارينين آدينا کوفر ددئيئنده اؤلومه ورئلسئن.

17آيري بئر آدامين جانيني آلان هر کس گرک اؤلدورولسون.

18حيواني اؤلدورن آدام، جان عوضئنه جان اولاراق، ضررئن عوضئني ورسئن.

19بئر آدام آيري آدامي يارالاسا، او نه جور ادئب، اونا دا بله ادئلسئن:

20سينيق عوضئنه سينيق، گؤز عوضئنه گؤز، دئش عوضئنه دئش؛ او آداما نه جور يارا ووروبسا، اونا دا بله وورولسون.

21حيوان اؤلدورن، ضررئن عوضئني ورسئن، آمّا آدام اؤلدورن آدام، اؤزو ده اؤلدورولسون.

22ائستر قرئب، ائستر يرلي سئزئن آرانيزدا بئر حؤکم اولاجاق؛ چونکي تارينيز رب، منم.»"

23موسا ائسرايئل اؤولادلارينا بونو ددی. لعنت اده‌ني دوشَرگه‌دن قيراغا چيخارديب، داشا باسديلار. ائسرايئل اؤولادلاري، ربّئن موسايا امر اتدئيي کئمي، بونا عمل اتدئلر.

← Chapter 23 Chapter 25 →