Leviticus 20

Azerbajani Bible (South) Used in Both Iran and Azerbaijan 2008

1رب موسايا دانيشيب ددي:

2"ائسرايئل اؤولادلارينا بونو دا دِه: «ائسرايئللی‌لردن و ائسرايئلده ياشايان ياد اِللی‌لردن هر کئم اؤولادلاريندان بئرئني مولِک بوتونه تقدئم اتسه، گرک اؤلدورولسون. اؤلکه خالقي اونو داشلاسين.

3اؤز اؤولاديني مولِکه تقدئم اتدئيي اوچون من ده او آدامدان اوز دؤنده‌رئب، خالقي آراسيندان اونو قوواجاغام. چونکي او منئم موقدّس مکانيمي نجئسله‌يئب، موقدّس آديمي لَکَله‌يئبدئر.

4اگر اؤلکه خالقي گؤرسه کي، او آدام اؤولاديني مولِکه تقدئم ادئر و گؤز يوموب او آدامي اؤلدورمَسه،

5من اؤزوم همئن آدامدان و عايئله‌سئندن اوز دؤنده‌رئب، اونو و اونونلا بئرلئکده مولِکله منه خَيانت ادن هر کسي خالقين آراسيندان قوواجاغام.

6منه خَيانت ادئب جئنچئلره و روح چاغيرانلارا طرف دؤنَن هر کسدن ده اوز دؤنده‌رئب، اونو خالقينين آراسيندان قوواجاغام.

7بونا گؤره ده اؤزونوزو تقدئس ادئن و موقدّس اولون، چونکي تارينيز رب منم.

8قايدالاريمي ساخلاييب اونلارا عمل ادئن؛ سئزي تقدئس ادن رب منم.

9آتا-آناسينا لعنت ادن هر کس گرک اؤلدورولسون. او آدامين قاني اؤز آتا-آناسينا لعنت اتدئيي اوچون اؤز بوينونادير.

10اگر بئر کئشي آيري بئر کئشئنئن آروادي‌ ائله زئنا اتسه، دوستونون آروادي‌ ائله زئنا ادن کئشي، زئناکار آروادلا بئرلئکده گرک اؤلدورولسون.

11آتاسينين آروادي ائله ياخينليق ادن کئشي آتاسينين ناموسونا توخونوب. اونلارين هر ائکئسي گرک اؤلدورولسون. بونلارين قانلاري اؤز بويونلارينادير.

12گلئني ائله ياخينليق ادن کئشي، گلئني ائله بئرلئکده، هر ائکئسي گرک اؤلدورولسون. اونلار اؤزلرئنه محرم اولان بئری ‌ائله زئنا ادئبلر و قانلاري اؤز بويونلارينادير.

13اگر بئر کئشي، آروادينان ياخينليق ادن کئمي، آيري بئر کئشي ائله ياخينليق اتسه، اونلارين ائکئسي ده ائيرنج ائش ادئبلر و گرک اؤلدورولسونلر؛ اونلارين قانلاري اؤز بويونلارينادير.

14هر کس بئر قيزي، آناسي ائله بئرلئکده اؤزونه آرواد آلسا، عئفتسئزلئک ادئر؛ آرانيزدا بله عئفتسئزلئک اولماماق اوچون، هم کئشي هم ده آروادلار گرک يانديريلسينلار.

15حيوانلا جئنسي رابئطه‌يه گئرن کئشي گرک اؤلدورولسون؛ حيواني دا گرک اؤلدوره‌سئنئز.

16هر هانسي بئر حيوانلا جئنسي رابئطه‌يه گئرن آرواد، حيوانلا بئرلئکده گرک اؤلدورولسون. اونلارين قانلاري اؤز بويونلارينادير.

17اگر بئر آدام آنا و يا آتا طرفئندن اولان باجيسيني آليب اونونلا جئنسي رابئطه‌يه گئرسه، رَذئللئک ادئر؛ اونلار خالقينين گؤزلري قاباغيندا قووولسونلار. بله آدام باجيسينين ناموسونا توخونوب؛ تقصئري اؤز بوينوندادير.

18آيباشي اولان آروادلا ياخينليق ادن کئشي، آروادين ناموسونا توخونوب، اونون قان‌آخماسيني آشکار ادئبدئر. آرواد دا قان آخماسيني آشکار ادئب. بونا گؤره اونلارين هر ائکئسي ده خالقلاري آراسيندان قووولسونلار.

19خالانلا و يا بئبئنله ياخينليق اتمه، چونکي بله بئر آدام ياخين قوحوملاري ائله ياخينليق ادئب؛ اونلارين تقصئري اؤز بويونلاريندادير.

20عَمئسي آروادي ائله ياخينليق ادن کئشي، اؤز عَمئسئنئن ناموسونا توخونوب؛ ائکئسئنئن ده گوناهي اؤز بويونلارينادير. اونلار اؤولادسيز اؤله‌جکلر.

21قارداشي آرواديني آلان کئشي نجئس ائش گؤرور؛ او، قارداشينين ناموسونا توخونور. اونلار اؤولادسيز قالاجاقلار.

22سئز منئم قايدالاريمي و حؤکملرئمي ساخلايين و اونلارا عمل ادئن کي، ياشاماق اوچون آپاراجاغيم تورپاق سئزي قوصوب آتماسين.

23بوندان علاوه، قاباغينيزدان قوواجاغيم مئلّتلرئن رسم-روسوملاريني اؤزونوز اوچون دَب اتمه‌يئن؛ اونلار بوتون بو شيلري اتدئکلرئنه گؤره، منئم گؤزومده ائيرنجدئرلر.

24من سئزه ددئم کي، اونلارين تورپاغينا سئز صاحئب اولاجاقسينيز و من او اؤزوم، سود، و بال آخان تورپاغي سئزه ورئرم کي، اونا مالئک اولاسينيز. سئزي او بئري خالقلاردان آييران تارينيز رب منم.

25بِلَجه، سئز تمئز و نجئس حيوان و قوشو بئربئرئندن آييرد ادئن. سئزئن اوچون آييرد اتدئيئم نجئس ساييلان حيوانلار، و يا قوشلار، يا دا يرده سورونن مخلوقلارلا اؤزونوزو ائيرنج اتمه‌يئن.

26سئز منئم اوچون موقدّس اولماليسينيز، چونکي من رب موقدّسم. من سئزي او بئري خالقلاردان آييرديم کي، سئز منئم اولاسينيز.

27جئنچي و يا روح چاغيران بئر کئشي و يا آرواد گرک اؤلدورولسون. اونلار داشلانسينلار. بونلارين قانلاري اؤز بويونلارينادير.»"

← Chapter 19 Chapter 21 →