Leviticus 18

Azerbajani Bible (South) Used in Both Iran and Azerbaijan 2008

1سونرا رب موسايا دانيشيب، ددي:

2"ائسرايئل اؤولادلاري ائله دانيش و اونلارا ده: «تارينيز رب منم.

3نه قاباق ياشاديغينيز مئصئر تورپاغيندا ادئلن ائشلره عمل ادئن، نه ده سئزي آپاراجاغيم کَنَعان تورپاغيندا ادئلن ائشلره. اونلارين قايدالاري ائله ياشاماياجاقسينيز.

4گرک منئم حؤکملرئمه عمل ادئب، منئم قايدالاريمي ساخلاياسينيز و اونلارا موناسئب ياشاياسينيز. تارينيز رب منم.

5بونا گؤره قايدالاريمي و حؤکملرئمي ساخلايين کي، آدام بونلاري اتدئيئنده ياشايار. رب منم.

6هچ کس اؤز ياخين قوحوملاري ائله جئنسي رابئطه‌ده اولماسين. رب منم.

7آتانين ناموسونا توخونما، يعني، اؤز آنانلا ياخينليق اتمه. او سنئن آناندير. اونون عئصمتئنه توخونما.

8آتانين آروادي‌ ائله ياخينليق اتمه. او سنئن آتانين ناموسودور.

9آتاندان و يا آناندان بئر اولان، سنئنله بئر اِوده، و يا آيري يرده دوغولان باجينلا ياخينليق اتمه.

10اوغلونون و يا قيزينين قيزي ائله ياخينليق اتمه، چونکي اونلارين ناموسو سنئن ناموسوندور.

11آتانين آيري آرواديندان دوغولان قيزي ائله ياخينليق اتمه؛ چونکي او سنئن آتاندان بئر اولان باجين ساييلير. اونون ناموسونا توخونما.

12بئبئنله ياخينليق اتمه، چونکي او آتانين ياخين قوحومودور.

13خالانلا ياخينليق اتمه، چونکي او آنانين ياخين قوحومودور.

14عَمئنئن ناموسونا توخونما؛ اونون آروادي ائله ياخينليق اتمه، او سنئن عَمي‌آرواديندير.

15گلئنئنئنن ناموسونا توخونما؛ او سنئن اوغلونون آرواديدير، اونونلا ياخينليق اتمه.

16قارداشين آروادي‌ ائله ياخينليق اتمه. او سنئن قارداشينين ناموسودور.

17بئر آروادين هم اؤزو، هم ده قيزي ائله ياخينليق اتمه. او آروادين اوغول، يا دا قيز نوه‌سي ائله ده ياخينليق اتمه، بونلار آروادين ياخين قوحوملاريدير. بو، عئفّتسئزلئکدئر.

18آروادين صاغ اولارکن، اونون باجيسيني اؤزونه آرواد آليب اونا بئر رقئب ياراتما، ناموسونا توخونما.

19آيباشي نجئسلئيي زاماني بئر آروادلا ياخينليق اتمه.

20آيري آدامين آروادي ائله ياخينليق ادئب اؤزونو نجئسلَمه.

21اؤولادلارينين هچ بئرئني مولِک بوتونه قوربان اولاراق تقدئم اتمه. بلجه، اؤز تارينين آديني لکه‌لمه. رب منم.

22کئشي آروادلا ياخينليق اتدئيي کئمي، بئر کئشي ائله ياخينليق اتمه؛ بو، ائيرنجدئر.

23هچ بئر حيوانلا ياخينليق ادئب اؤزونو اونونلا نجئسلَمه، هچ بئر آرواد دا بئر حيوانلا ياخينليق اتمه‌سئن. بو، رَذئللئکدئر.

24بو شيلرئن هچ بئري ائله اؤزونوزو نجئس اتمه‌يئن، چونکي قاباغينيزدان قوواجاغام مئلّتلر، بونلارين هاميسي ائله نجئسله‌نئبلر،

25اؤلکه ده نجئسله‌نئب. بونا گؤره ده من او تورپاغي جزالانديرميشام، اله کي، تورپاق، ساکئنلرئني قوصوب.

26آمّا سئز گرک قايدالاريمي و حؤکملرئمي ساخلاياسينيز و بو ائيرنج ائشلرئن هچ بئرئني اتمَيه‌سئنئز، ائستر يرلي، ائستر آرانيزدا ياشايان ياد اِللي اولسون.

27چونکي قاباغينيزداکي اؤلکه‌نئن ساکئنلري بوتون بو ائيرنج ائشلري ادئبلر و تورپاق نجئسله‌نئب.

28آمّا اگر سئز ده بو تورپاغي نجئسلَيه‌سئنئز، تورپاق سئزي ده، سئزدن قاباق اولان مئلّت کئمي قوصوب آتاجاق.

29بونا گؤره ده بو ائيرنج ائشلرئن هر هانسي بئرئنه عمل ادن هر کس، خالقينين آراسيندان قووولمالي‌دير.

30بلجه، ددئيئمي يرئنه يتئرئن. قاباغينيزدا ادئلن ائيرنج عادتلره عمل ادئب، اونلارلا اؤزونوزو نجئسلَمه‌يئن. تارينيز رب منم.

← Chapter 17 Chapter 19 →