Judges 7

Azerbajani Bible (South) Used in Both Iran and Azerbaijan 2008

1يِروب‌بَعَل، يعني جِدعون و اونونلا برابر بوتون خالق تزدن دوروب خَرود چشمه‌سئنئن باشيندا اوردوگاه قوردولار. مئديان اوردوگاهي دا اونلارين شئمال طرفئنده مورِه تپه‌سئنئن يانينداکي دره‌ده ائدي.

2رب جِدعونا ددي: "يانيندا اولان خالقين سايي چوخدور، اونا گؤره مئديانلي‌لاري اونلارا تسلئم اتمئرم. چونکي ائسرايئللی‌لر فخر ادئب دئيَرلر: «اؤز قووّتئمئزله اؤزوموزو قورتارديق.»

3ائندي سن خالقا بونو اشئتدئرئب دِه: «کئم قورخودان اسئر، گئلعاد داغيندان گری قاييتسين.»" خالقدان ائيئرمي ائکي مئن نفري گری قاييتدي، اون مئن نفري قالدي.

4رب جِدعونا ددي: "خالقين سايي گئنه ده چوخدور، اونلاري سو قيراغينا اِندئر و اورادا آداملاري سنئن اوچون اَلَکدن کچئرده‌جيم. «بو سنئنله گده‌جک» دِدئيئم آدام، سنئنله گده‌جک و «بو سنئنله گتميه‌جک» دِدئيئم بوتون آداملار دا گتميه‌جکلر."

5جِدعون خالقي سو قيراغينا اِندئرَنده رب اونا ددي: "سويو ائت کئمي دئلي ائله ائچَنلرئن هاميسيني بئر طرفه، سو ائچمک اوچون دئز اوسته اوتورانلارين هاميسيني دا او بئري طرفه آييريب ييغارسان."

6اَللرئني آغيزلارينا آپاريب سويو دئلي ائله ائچَنلرئن سايي اوچ يوز نفر اولدو. لاکئن خالقين قالان حئصّه‌سي سو ائچمک اوچون دئز اوسته يره اوتوردولار.

7رب جِدعونا ددي: "سئزي دئلي ائله سو ائچَن بو اوچ يوز نفرله قورتاراجاغام و مئديانلي‌لاري سنه تسلئم اده‌جيم. قوي خالقين قالان حئصّه‌سي اؤز يرلرئنه قاييتسين."

8بو اوچ يوز آدام خالقين آذوقه‌سئني و کَره‌نايلاري اَللرئندن آلدي. جِدعون قالان ائسرايئللی‌لرئن هاميسيني اؤز چاديرلارينا گؤندردي، آمّا اوچ يوز نفري يانيندا ساخلادي؛ مئديان اوردوگاهي جِدعونون اولدوغو يِرئن آشاغيسينداکي دره‌ده ائدي.

9او گجه رب اونا ددي: "قالخ، مئديان اوردوگاهينا اِن، چونکي اونلاري سنه تسلئم اتمئشم.

10اگر اوردوگاها اِنمَيه قورخورسان، نؤکرئن پورا ائله برابر اِن.

11اورادا سن اونلارين صؤحبتئني اشئده‌جکسن، اوندا قووّت آليب اوردوگاهين ضئدّئنه اِنَرسن." او زامان جِدعون و نؤکري پورا، اوردوگاهين کَناريندا اولان سئلاحلي آداملارين يانينا اِندئلر.

12دره‌يه ييغيلان مئديانلي‌لار، عَمالِقلی‌لر و بوتون باشقا شرق خالقلارينين سايي چَيئرتکه قدر چوخ ائدي. دَوه‌لرئنئن ده دهنز ساحئلئنده‌کي قوم قدر سايي-حسابي يوخ ائدي.

13جِدعون گلدئکده اشئتدي کي، بئر نفر يولداشينا اؤز يوخوسونو دانيشير و بله ديئر: "باخ، يوخومدا گؤرموشم کي، آرپا اونوندان پئشئرئلمئش بئر يومرو چؤرک يووارلانيب مئديان اوردوگاهينا گلدي و چاديرا چاتدي. چاديري ووردو و اونو ييخيب آلت- اوست اتدي و چادير يره سَرئلدي."

14يولداشي اونا جاواب وردی: "بو ائسرايئللي يوآش اوغلو جِدعونون قيلينجيندان آيري بئر شي ديئل؛ تاري مئدياني و بوتون اوردوگاهيني اونا تسلئم ادئب."

15جِدعون يوخو دانيشان آدامين حکايه‌سئني و معناسيني اشئدنده تارييا سجده اتدي و ائسرايئل اوردوگاهينا قاييديب ددي: "قالخين، چونکي رب مئديان قوشونونو سئزه تسلئم ادئب."

16يانيندا اولان اوچ يوز نفري اوچ دسته‌يه آييردي. هاميسينين اَلئنه کَره‌نايلار و بوش دولچالار وردی و دولچالارين ائچئنه مشعل‌لر قويدو.

17اونلارا تاپشيردي کي، "منه باخين، من نجه ادئرم، سئز ده اِله ادئن. باخ، من اوردوگاهين کنارينا چاتان زامان نه اتسَم، سئز ده اِله ادئن.

18من و منئمله برابر اولانلارين هاميسي کَره‌ناي چالديقدا سئز ده اوردوگاهين بوتون اطرافيندا کَره‌نايلارينيزي چالين و باغيرين: «رب اوچون و جِدعون اوچون!»"

19جِدعونلا يانيندا اولان يوز نفر کئشي اورتا نؤوبه‌سئنئن باشلانيشيندا، نؤوبَتچئلر تزه دَيئشئلَن زامان، اوردوگاهين قيراغينا چاتديلار. اونلار کَره‌نايلاريني چاليب، اَللرئنده‌کي دولچالاري قيرديلار.

20اوچ دسته ده کَره‌ناي چاليب دولچالاري قيردي، سول اَللرئنده مشعل، صاغ اَللرئنده ده چالديقلاري کَره‌نايي توتوب باغيرديلار: "ربّئن و جِدعونون قيلينجي!"

21اوردوگاهين اطرافيندا هامي اؤز يرلرئنده داياندي؛ و بوتون مئديان قوشونو قاچديلار، اونلار باغيرا-باغيرا قاچديلار.

22اوچ يوز نفر شيپور چالاندا، رب دوشمن اوردوگاهينداکي‌لارين قيلينجيني بئربئرئنئن ضئدّئنه قالديردي؛ دوشمن قوشونو صِرِرايا طرف بِيت‌شئطّايا قدر، طَبّاتين يانيندا اولان آبِل‌مِخولا سرحدئنه قدر قاچدي.

23نَفتالئدن، آشِردن و بوتون مِنَسّه‌دن چاغيريلميش ائسرايئللی‌لر مئديانلي‌لاري قوودولار.

24جِدعون بوتون اِفرايئمئن داغليق بؤلگه‌سئنه قاصئد گؤندرئب ددي: "اِنئن، مئديانلي‌لارا هوجوم ادئن. اونلارين يولونو کَسمَک اوچون بيت بارايا قدر اوردون چايينين سولاريني توتون." بوتون اِفرايئملی‌لر ييغيليب، بيت باره‌يه قدر اوردون چايينين سولاريني توتدولار.

25سونرا ائکي مئديان باشچيسي عورِبله ذِعِبي توتدولار. عورِبي عورِب قاياسيندا، ذِعِبي ده ذِعِب اوزوم سيخانيندا اؤلدوردولر. مئديانلي‌لاري قوودولار و اوردون چاييني کچئب عورِبله ذِعِبئن باشلاريني جِدعونا گتئردئلر.

← Chapter 6 Chapter 8 →