Judges 5

Azerbajani Bible (South) Used in Both Iran and Azerbaijan 2008

1او گون دِبورا و اَبئنوعَم اوغلو باراق بو نغمه‌ني اوخودولار:

2باشچيلار ائسرايئلده رهبرلئک اتدئلر، خالق اؤز گؤيلو ائله آياق قاباغا قويدو. رب موبارک اولسون!

3قولاق آسين، ای پادشاهلار! قولاق آسين، امئرلر! من ربّه اوخوياجاغام، ائسرايئلئن تاريسي ربّه سئتايئش نغمه‌سي اوخوياجاغام!

4يارب، سن سِعئردن چيخاندا، اِدوم چؤلوندن کچنده، يِر تئتره‌دي، گؤيلر دامدي. بلی، بولودلاردان سولار آخدي.

5داغلار ربّئن حوضوروندا، سئنا داغي، ائسرايئلئن تاريسي ربّئن حوضوروندا تئتره‌يه گلدي.

6عَنات اوغلو شَمگَر زامانيندا، يااِل زامانيندا يوللار بوش قالدي، سفره چيخانلار اطراف يوللارلا گتدئلر.

7من دِبورا آياغا قالخاناجاق، ائسرايئلده آنا کئمي ميدانا چيخاناجاق، ائسرايئلده کَندلئلر آرتيق ياشاميردي.

8تزه آللاهلار سِچئلدي؛ سونرا دا دروازالاردا دؤيوش قالخدي. قيرخ مئن ائسرايئللي‌نئن اَلئنده نه نئزه، نه ده قالخان گؤروندو.

9منئم اوره‌يئم ائسرايئله حؤکم ادنلرله‌دئر، خالق ائچئندن اؤز گؤيلو ائله آياق قاباغا قويانلارلادير. رب موبارک اولسون!

10سئز ای آغ اِششَکلره مئنَنلر، سئز ای اَلوان قاليلار اوستونده اَيلَشَنلر، ای بوتون يولدان کچنلر، باخين!

11اوخ آتانلارين سَس-کويوندن اوزاقدا، سو چکَنلر آراسيندا، اورادا ربّئن صالح عمللرئندن، ائسرايئلده‌کي کَندلئلرئن ظفرلرئندن نقل اده‌جکلر. او زامان ربّئن خالقي دروازالارا اِندي.

12اويان، ای دِبورا، اويان! اويان، اويان، بئر نغمه اوخو! آياغا قالخ، ای باراق! سن، ای اَبئنوعَم اوغلو، گل اسئرلرئني آپار!

13او زامان صاغ قالانلار اعيانلارين يانينا اِندئلر. ربّئن خالقي جنگ‌آور کئمی يانيما گلدي.

14عَمالِق نسلئندن اولانلار اِفرايئمدن گلدئلر، سنئن دالينجا گلن خالق آراسيندا بِنيامئن ده وار ائدي. ماکئردن اَمئرلر، زِبولوندان سرکرده عصاسيني داشييانلار گلدئلر.

15يئسّاکارداکي آغالار دِبورا ائله گلدئلر. يئسّاکار نجه‌دئر، باراق دا اِله ائدي؛ اونون دالينجا دره‌يه هوجوم چکدئلر. رِعوبئن قبئله‌سئنئن بؤلمه‌لري بؤيوک قَرارسيزليق ائچئنده ائدي.

16چوبانلارين سورولرئنه چالديغي توتَک سَسئني اشئتمَک اوچون نئيه آغيل‌لار آراسيندا اوتوردونوز؟ رِعوبئن قبئله‌سئنئن بؤلمه‌لري چاشيب قالميشدي.

17گئلعاد خالقي اوردون چايينين او تاييندا قالدي. بس نئيه دان گَمئلرئن يانيندا ساکئن اولدو؟ آشِر دهنزلرئن ساحئلئنده ساکئن اولدو، اؤز بندرلرئنده قالدي.

18لاکئن زِبولون خالقي، نَفتالي خالقي، جانلاريني دؤيوش ميدانينين اوجا يرلرئنده خطره آتديلار!

19پادشاهلار گلئب ووروشدولار. سونرا دا تَعنَکده، مِگئدّو سولاري کناريندا کَنَعان پادشاهلاري ووروشدولار. گوموش قنئمت آلان اولمادي.

20اولدوزلار گؤيدن دؤيوشدولر، سئسِرانين ضئدّئنه اؤز دؤوره‌سئنده دؤيوشدولر.

21اونلاري قئشون چايي آپاردي، او قدئم چاي، قئشون چايي! ای جانيم، سن قووّتله ائره‌لي گت!

22او زامان آتلار دؤردنالا چاپديلار، دؤردنالا-دؤردنالا چاپارکَن قووّتلي آتلار.

23ربّئن مَله‌يي ددي: "مِروز شهرئنه لعنت ادئن، اونون اهالئسئنه لعنتلر گؤندرئن. چونکي ربّئن کؤمه‌يئنه، جنگ‌آورلره ضئدّ ربّئن کؤمه‌يئنه گلمه‌دئلر."

24قِنلي خِبِرئن آروادي يااِل آروادلار آراسيندا هاميدان آرتيق موبارکدئر، چاديردا ياشايان آروادلاردان داها بَختَوَردئر!

25سئسِرا سو ائسته‌يئنده، يااِل اونا سود وردی. آغالارا لايئق بئر جامدا آيران وردی.

26اَلئني چاديرين ميخينا اوزاتدي، صاغ اَلئنه ائشچي توخماغيني گؤتوردو، اونلارلا سئسِراني ووردو، باشيني اَزدي؛ سينديريب، گئجگاهلاريني دِشدي.

27او ييخيليب يااِلئن آياقلاري آلتينا سَرئلدي، يِره دؤشَندي، او ييخيليب آياقلاري آلتينا سَرئلدي، ييخيلديغي يره سَرئلئب اؤلدو.

28سئسِرانين آناسي پنجره آرخاسيندان، موشَبّکدن نئگاران-نئگاران باخيب چيغيردي: "نه اوچون اونون دؤيوش آراباسي بو قدر يوبادير؟ دؤيوش عارابالارينين سَسي آخي نئيه اِشئدئلمئر؟"

29حئکمتلي اَصئلزاده خانيملار اونا جاواب ورئردي، او دا اؤز- اؤزونه سؤزلرئني تکرار- تکرار ديئردي:

30«بلکه قنئمت ماليني تاپيب بؤلوشدورورلر، يقئن کي هر ائگئده بئر-ائکي قيز دوشور. سئسِرايا تالان ماليندان اَلوان پالتارلار دوشور، بلی، تالان ماليندان ناخيشلي اَلوان پالتارلار. قارَت اتدئکلرئنئن ائچئندن تاپيب بؤلوشدوردولر، تالانچيلارين بويونلاري اوچون ائکي طرفدن اَلوان ناخيشلي پالتارلار.»

31يارب، بوتون دوشمنلرئن بله يوخ اولسون. آمّا سني سِوَنلر قودرتي ائله دوغان گونش کئمي اولسونلار!" بوندان سونرا اؤلکه‌يه قيرخ ائل راحاتليق دوشدو.

← Chapter 4 Chapter 6 →