Judges 17

Azerbajani Bible (South) Used in Both Iran and Azerbaijan 2008

1اِفرايئمئن داغليق بؤلگه‌سئندن اولان مئکا آدلي بئر آدام وار ائدي.

2او، آناسينا بله ددي: "سندن اوغورلانان مئن يوز شِکِل گوموشدن اؤتري کي، لعنت اتدئن و من ده اشئتدئم، باخ، او گوموش منده‌دئر، اونو من گؤتورموشم." آناسي اونا ددي: "اوغلوم، قوي رب سنه برکت ورسئن."

3او، مئن يوز شِکِل گوموشو آناسينا قايتاردي. آناسي اونا ددي: "بو گوموشون هاميسيني رب اوچون وقف ادئرم. قوي اوغلوم اوندان بئر اويما و بئر تؤکمه بوت دوزلتسئن. بونون اوچون ده ائندي بو گوموشو سنه قايتاريرام."

4گوموشو آناسينا گری قايتارارکَن، آناسي ائکي يوز شِکِل گوموش گؤتوروب زرگره وردی. اوندان بئر اويما و بئر تؤکمه بوت دوزلتدئردي. بو بوتلري مئکانين اِوئنه قويدولار.

5مئکانين عئبادتگاهي وار ائدي. او بئر اِفود و اِو بوتلري دوزَلدئب اوغوللاريندان بئرئني اؤزونه کاهئن تعيئن اتدي.

6او گونلرده ائسرايئلده پادشاه يوخ ائدي؛ هَره اؤز گؤزونده دوغرو گؤرونَن ائشي ادئردي.

7جاوان لاوئلي وار ائدي کي، يهودانين بِيت‌لِخِم شهرئندن اولان بئر يهودالي عايئله‌نئن يانيندا ياشاييردي.

8همئن آدام ياشاماغا بئر يِر تاپماق اوچون يهودانين بِيت‌لِخِم شهرئندن چيخدي. سفره چيخارکَن، اِفرايئمئن داغليق بؤلگه‌سئنه، مئکانين اِوئنه گلدي.

9مئکا اونا ددي: "هارادان گلئرسن؟" او، مئکايا ددي: "من يهودانين بِيت‌لِخِم شهرئندن گلن بئر لاوئلي‌يَم، ياشاماق اوچون بئر يِر آختاريرام."

10مئکا اونا ددي: "منئمله قال، منه آتا و کاهئن اول. من ده سنه ائلده اون شِکِل گوموش، بئر دست پالتار و يِمه‌يئني وره‌رم." لاوئلي اونونلا گتدي.

11او، مئکا ائله قالماغا راضي اولدو و بو جاوان اونا بئر اوغول کئمي اولدو.

12مئکا لاوئلئني اؤزونه کاهئن تعيئن اتدي و بو جاوان اونون اِوئنده ياشادي.

13سونرا مئکا ددي: "ائندي بئلئرم کي، رب منه ياخشيليق اده‌جک، چونکي بئر لاوئلي کاهئنئم وار."

← Chapter 16 Chapter 18 →