Joshua 23

Azerbajani Bible (South) Used in Both Iran and Azerbaijan 2008

1رب ائسرايئللی‌لره هر طرفدن دوشمنلرئندن دئنجلئک ورندن سونرا، اوزون مودّت کچدي. آرتيق يوشَع قوجاليب ياشي چوخالميشدي.

2او بوتون ائسرايئلي، آغساقّاللاري، باشچيلاري، حاکئملري و سرکرده‌لري چاغيردي و اونلارا ددي: "من قوجالميشام، ياشيم چوخدور.

3تارينيز ربّئن سئزئن حاقّينيزدا بوتون بو مئلّتلره نه اتدئيئني گؤردونوز، چونکي تارينيز رب اؤزو سئزئن اوچون دؤيوشدو.

4باخ، اوردون چاييندان گونشئن باتديغي طرفه، بؤيوک دهنزه قدر قيرديغيم بوتون مئلّتلرئن تورپاقلاري ائله برابر قالان بو مئلّتلرئن ده تورپاقلاريني قبئله‌لرئنئز اوچون ائرث پايلاديم.

5تارينيز رب اؤزو اونلاري قاباغينيزدان سئلئب آتاجاق و اونلاري گؤزونوزون قاباغيندان قوواجاق. و سئز اونلارين تورپاغينا مالئک اولاجاقسينيز، نجه کي، تارينيز رب سئزه وعده ورئب.

6اونا گؤره ده چوخ دئقّتلي اولون کي، موسانين شرئعت کئتابيندا يازيلان هر شيي ساخلاياسينيز. اله کي، اوندان نه صاغا، نه ده سولا دؤنه‌سئنئز.

7سئزئنله قالان بو مئلّتلره قاريشمايين، آللاهلارينين آديني چکمه‌يئن، اونلارا آند ائچمه‌يئن، اونلارا قوللوق اتمه‌يئن، اونلارا سجده قيلمايين.

8فقط بو گونه قدر اتدئيئنئز کئمي ربّه باغلي قالين.

9چونکي رب قاباغينيزدان بؤيوک و قووّتلي مئلّتلري قوووب؛ بو گونه قدر سئزئن قاباغينيزدا هچ کئم دورا بئلمه‌يئب.

10سئزدن بئر آدام مئن آدامي قووا بئلدي، چونکي تارينيز رب سئزه ددئيي کئمي سئزئن اوچون اؤزو دؤيوشدو.

11بونون اوچون دئقّت ادئن کي، تارينيز ربّی سِوه‌سئنئز.

12اگر گری دؤنه‌سئنئز، سئزئن آرانيزدا ياشايان بو مئلّتلردن قالانلارا باغلاناسينيز، اونلارلا قوحوم اولاسينيز، اونلارلا اوتوروب دوراسينيز،

13يَقئن بئلئن کي، تارينيز رب بو مئلّتلري گؤزونوز قاباغيندان بئر داها قووماياجاق. تارينيز ربّئن وردئيي بو نعمتلي تورپاق اوستوندن يوخ اولانا قدر، اونلار سئزئن اوچون کمند، تله، بؤيورلرئنئزه قامچي و گؤزلرئنئزه تئکان اولاجاقلار.

14باخ، بو گون من ده هامي کئمي دونيادان کؤچه‌جيم. بوتون قلبئنئزله، بوتون جانينيزلا بئلئرسئنئز کي، تارينيز ربّئن حاقّينيزدا ددئيي بوتون ياخشي شيلردن هچ بئري بوشا چيخمادي. هاميسي سئزئن اوچون يرئنه يتئشدي. اونون سؤزلرئندن هچ بئري بوشا چيخمادي.

15تارينيز ربّئن سئزه وعده وردئيي بوتون نعمتلي شيلر نجه يرئنه يتئشدي، بوتون پئس شيلري ده رب بلجه سئزئن باشينيزا گتئره‌جک، او زاماناجاق کي، وردئيي بو ياخشي تورپاق اوستوندن سئزي هلاک اتسئن.

16اگر تارينيز ربّئن سئزه بويوردوغو عهدي پوزاسينيز، گدئب آيري آللاهلارا قوللوق اده‌سئنئز، اونلارا سجده اده‌سئنئز، ربّئن قضبي سئزئن ضئدّئنئزه آلوولاناجاق و سئزه وردئيي نعمتلي تورپاق اوستوندن تزلئکله يوخ اولاجاقسينيز."

← Chapter 22 Chapter 24 →