Jeremiah 4

Azerbajani Bible (South) Used in Both Iran and Azerbaijan 2008

1رب بويورور: "ای ائسرايئل، اگر گری قاييداسان، منه طرف قاييداسان، ائيرنج بوتلرئني گؤزومون قاباغيندان گؤتوره‌سن، بئر داها يولدان آزمازسان؛

2حقئقت، عدالت و صالحلئکله «وار اولان ربّه آند اولسون!» ديئب آند ائچَرسن، او زامان مئلّتلر رب واسئطه‌سئله برکت آلارلار، و اونونلا فخر اِدَرلر."

3چونکي رب يهودا آداملارينا و اورشلئمه بله ديئر: "اؤزونوز اوچون تزه اَکئن يري شوخوملايين؛ تئکانلار آراسيندا اَکمه‌يئن.

4ای يهودا آداملاري و اورشلئمده ياشايانلار، اؤزونوزو رب اوچون ختنه ادئن، اوره‌يئنئزئن ختنه اَتئني کَسئن. يوخسا پئس عمل‌لرئنئزه گؤره، قضبئم اود کئمي پوسکوروب يانديراجاق، سؤندورن اولماياجاق.

5يهودادا اعلان ادئن، اورشلئمده جار چکئب ديئن: «اؤلکه‌ده کَره‌ناي چالين!» اوجادان قيشقيريب امر ادئن: «گلئن، ييغيليب قالالي شهرلره گئرَک!»

6صحيونا گِدن يولو گؤرسه‌دن بئر بايراق قالديرين، پناه يري آختارين، دايانمايين. چونکي من شئمالدان بلا و بؤيوک قيرغين گتئره‌جيم."

7آصلان يوواسيندان چيخيب، مئلّتلري محو ادن، يولا دوشوب. اؤز يِرئندن چيخيب کي، اؤلکه‌نئزي وئران اتسئن. شهرلرئنئز يِرله بئر اولاجاق، اورادا ساکئن اولان بئري قالماياجاق.

8بونا گؤره ده چول گِيئنئن، ياس توتوب آغلايين. چونکي ربّئن آلوولانان قضبي بئزدن دؤنمه‌يئب.

9"او گون پادشاهين و باشچيلارين اوره‌يي دوشه‌جک." رب بله بويورور. "کاهئنلر مات قالاجاق، پيغمبرلر دوناجاق."

10من ددئم: "آه، ای پروردئگار رب! يقئن کي، سن بو خالقي و اورشلئمي کامئل آلداديبسان. «سئزئن اوچون اَمئن-آمانليق اولاجاق» ديئبسن، حال بو کي قيلينج بوغازيميزا دئره‌نئر."

11او واخت بو خالقا و اورشلئمه ديئله‌جک: "صحراداکي چيلپاق تپه‌لردن، خالقيما طرف ائستي بئر کولَک اسئر. بو کولَک، دن سووورماياجاق، تاخيل تمئزلَميه‌جک.

12منئم امرئمله بوندان دا گوجلو بئر کولَک اَسه‌جک و من ده ائندي اونلارا اؤز حؤکمومو بئلدئره‌جيم."

13باخ، دوشمن بولودلار کئمي، اونون دؤيوش عارابالاري دا قاسيرغا کئمي اوجالير، آتلاري قارتاللاردان ائتي گِدئر. واي حاليميزا! چونکي برباد اولدوق.

14ای اورشلئم، اوره‌يئني پئسلئکدن يويوب-تمئزله کي، خئلاص اولاسان. پئس فئکئرلرئن نه واختا قدر ائچئنده قالاجاق؟

15آرتيق داندان بئر سَس گلئر، اِفرايئمئن داغليق بؤلگه‌سئندن شرارت اِشئدئلئر.

16"بونو مئلّتلره ائندي خبر ورئن! اورشلئمه خبر چاتديرين کي، اوزاق بئر اؤلکه‌دن گلن قوشون اونو موحاصئره‌يه آلاجاق، يهودا شهرلرئنئن قاباغيندا نعره چکه‌جک.

17اونلار زَمي گودوکچولري کئمي هر طرفدن شهره طرف گلئرلر، چونکي او، منئم ضئدّئمه عوصيان ادئب." رب بويورور.

18"اؤز ائشلرئن، اؤز عمل‌لرئندئر کی، بونلاري سنئن باشينا گتئرئر. سنئن جزان نه آجي‌دير، لاپ اوره‌يئنه چاتيب.

19آي جانيم، آي جانيم! عذابدان قيوريليرام. اوره‌يئم ائچئمده چيرپينير، ساکئت قالا بئلمئرَم. چونکي، ای جانيم، کَره‌ناي سَسئني، دؤيوش نعره‌سئني اشئدئبسن.

20قيرغين اوستونه قيرغين گلئر، بوتون اؤلکه خارابا قاليب. چاديرلاريم قَفلَتَن، پرده‌لرئم بئر آندا داغيلير.

21نه واختا قدر بايراق گؤره‌جيم، کَره‌ناي سَسي اِشئده‌جيم؟

22حقئقتن، خالقيم آخماقدير، منی تانيمير. اونلار جاهئل اؤولادلاردير، درّاکه‌لري يوخدور، عاغيللاري پئسلئک اتمه‌يه چاتير، ياخشيليق اتمه‌يئن نه اولدوغونو بئلمئرلر."

23من، اِرِميا، يِر اوزونه باخديم، شکئلسئز و بوشدور. گؤيلره باخديم، ائشيقلاري يوخدور.

24داغلارا باخديم، تئتره‌يئردئلر، بوتون تپه‌لر يِرلرئندن قوپوردو.

25باخيب گؤردوم کي، بئر آدام قالماييب، گؤيده‌کي قوشلارين هاميسي اوچوب گدئبدئر.

26باخيب گؤردوم کي، بَهَرلي تورپاق صحرايا چِورئلئب، ربّئن قاباغيندا بوتون شهرلري، اونون آلوولانان قضبي ائله داغيليب

27بلی، رب بله ديئر: "بوتون اؤلکه وئران اولاجاق، آنجاق قويماياجاغام کي، کامئل بئر شکئلده محو اولسون.

28بونا گؤره يِر ياس توتاجاق، يوخاريدا گؤيلر قارالاجاق، چونکي بونو من دمئشم، بونا من قصد اتمئشم، فئکئرئمي دئشدئرميه‌جيم، سؤزومدن دؤنميه‌جيم ده.

29بوتون شهرلرئن اهالئسي آتلي‌لارين و اوخ‌آتانلارين گورولتوسوندن قاچير. اونلار سيخ مِشه‌لره گئرئر، قايالارا ديرماشير. بوتون شهرلر ترک ادئلمئش، اونلاردا کئمسه ياشامير.

30بس سن، ای وئران شهر، نه اده‌جکسن؟ قيرميزي پالتار گِيئنسن ده، قيزيل بَزَکلر تاخسان دا، گؤزلرئنه سورمه سورتسن ده، عبث يِره اؤزونو بَزه‌يئرسن. اويناشلارين سنه خور باخيرلار، جانيني آلماق ائسته‌يئرلر.

31بئر سَس اشئتدئم؛ دوغوش آغريسي چکن بئر آروادين سَسئنه بَنزَر. ائلکئني دوغوران آروادين چکدئيي عذابي! بو، اَللرئني اوزاتميش، نفسي کَسئلمئش صحيون قيزينين سَسي‌دئر. باغيرير: "واي حاليما! چونکي قاتئل‌لرئن قاباغيندا جانيم طاقتدن دوشور."

← Chapter 3 Chapter 5 →