Jeremiah 39

Azerbajani Bible (South) Used in Both Iran and Azerbaijan 2008

1يهودا پادشاهي صئدقئيانين پادشاهليغينين دوقّوزونجو ائلئنئن اونونجو آييندا، بابئل پادشاهي نِبوکَدنِصّر بوتون قوشونو ائله اورشَلئمئن قاباغينا گلئب شهري موحاصئره‌يه آلدي.

2صئدقئيانين پادشاهليغينين اون بئرئنجي ائلئنده، دؤردونجو آيين دوقّوزونجو گونو شهر دوواريندا دَلئک آچيلدي.

3بابئل پادشاهينين بوتون باشچيلاري-سامگارلي نِرگال‌شار-اِزِر، نئظامي مشورتچي نِبو سار-سَکئم، باش مامور نِرگال‌شار-اِزِر و بوتون باشقا اعيانلار ائچه‌ري گئرئب اورتا دروازادا اوتوردولار.

4يهودا پادشاهي صئدقئيا و بوتون دؤيوشچولر اونلاري گؤرنده قاچديلار؛ اونلار گجه واختي شهردن، پادشاهين باغچاسي يولوندان، ائکي دووارين آراسينداکي قاپيدان چيخيب قاچديلار و عَرَبه‌يه طرف گتدئلر.

5لاکئن کَلده قوشونو اونلاري تعقئب ادئب اَرئحا اووالاريندا صئدقئيايا چاتديلار. صئدقئياني توتوب خَمات تورپاغينداکي رئبلايا، بابئل پادشاهي نِبوکَدنِصّرئن يانينا آپارديلار. او، صئدقئيا باره‌ده حؤکم وردی.

6بابئل پادشاهي رِبله‌ده صئدقئيانين گؤزو قاباغيندا اوغول‌لاريني اؤلدورتدو. بابئل پادشاهي بوتون يهودا اعيانلاريني دا اؤلدورتدو.

7سونرا صئدقئيانين گؤزلرئني چيخارتدي و اونو بابئله آپارماق اوچون زنجئرله‌دي.

8کَلدانئلر پادشاه ساراييني و خالقين اِولرئني يانديرديلار، اورشَلئمئن دووارلاريني اوچورتدولار.

9کشئکچئلر ريئسي نِبوزَره‌دان شهرده صاغ قالان خالقي، اونون طرفئنه کِچَنلري-صاغ قالان بوتون اهالئني بابئله اسئر آپاردي.

10کشئکچئلر ريئسي نِبوزَره‌دان خالقدان هچ بئر شيي اولمايان بعضی يوخسوللاري يهودا تورپاغيندا ساخلادي، اونلارا اوزوم باغلاري و زَمئلر وردی.

11بابئل پادشاهي نِبوکَدنِصّر اِرِميا باره‌ده کشئکچئلر ريئسي نِبوزَره‌دانا بله امراتمئشدي:

12"اونو آپار و اونا ياخشي يِتئش؛ اونونلا پئس رفتار اتمه. سندن نه ائسته‌سه، اونو ات."

13کشئکچئلر ريئسي نِبوزَره‌دان، نئظامي مشورتچي نِبوشَزبان، باش مامور نِرگال‌شِر-اِزِر و بابئل پادشاهينين بوتون باشقا اعيانلاري

14آدام گؤنده‌رئب اِرِمياني کشئکچئلر حيطئندن گتئردئلر. اِرِمياني شافان اوغلو اَخئقام اوغلو گِدَليايا تاپشيرديلار کي، اونو اِرِميانين اؤز اِوئنه آپارسين. بلجه اِرِميا اؤز خالقين آراسيندا قالدي.

15کشئکچئلر حيطئنده محبوس ائکن اِرِميايا ربّئن بو سؤزو نازئل اولموشدو:

16"گت، کوشلو عِبِدمِلِکه دِه؛ ائسرايئلئن تاريسي اولان قوشونلار ربّی بله ديئر: «بو شهرئن اوستونه ياخشيليق يوخ، پئسلئک گتئره‌رک دِدئيئم سؤزلري يرئنه يتئره‌جيم. او گون بونلار سنئن گؤزلرئن قاباغيندا باش وره‌جکلر.

17لاکئن او گون سني خئلاص اده‌جيم.» رب بويورور. «قورخدوغون آداملارا تسلئم ادئلميه‌جکسن.

18من سني خئلاص اده‌جيم، سن قيلينجلا هلاک اولماياجاقسان. اؤز جا‌نيني قورتاراجاقسان، چونکي سن منه بِل باغلاييرسان.» رب بويورور."

← Chapter 38 Chapter 40 →