Jeremiah 30

Azerbajani Bible (South) Used in Both Iran and Azerbaijan 2008

1اِرِميايا ربدن بو سؤز نازئل اولدو:

2"ائسرايئلئن تاريسي رب بله ديئر: «سنه دِدئيئم بوتون سؤزلري بئر کئتابا ياز.

3رب بويورور: «باخ، گونلر گلئر کي، خالقيم ائسرايئلي و يهوداني اسئرلئکدن قايتاراجاغام. اونلاري آتالارينا وردئيئم تورپاغا گری گتئره‌جيم و اوراني مولک اده‌جکلر.» رب ديئر."

4ائسرايئل و يهودا اوچون ربّئن ددئيي سؤزلر بونلاردير:

5رب بله ديئر: "قورخو سَسي اِشئدئلئر، باريش يوخ، دهشت سَسي.

6سوروشون، گؤرون: کئشي مگر اوشاق دوغار؟ بس نه اوچون، هر کئشئنئن اَللرئني، دوغان آرواد کئمي، قارنينين اوستونده گؤرورَم؟ نه اوچون هامينين اوزو سولوب؟

7آه، بو نه دهشتلي بئر گون اولاجاق! بئر داها بله گون اولماياجاق، يعقوب نسلی اوچون سيخينتي دؤورو اولاجاق، آنجاق گئنه ده بوندان قورتولاجاق."

8قوشونلار ربّی بويورور: "او گون بويونلارينداکي يوغو قيراجاغام، ائپلرئني قوپارداجاغام؛ بئر داها ياد اِللی‌لر اونلاري اؤزلرئنه قول اتميه‌جکلر.

9آنجاق اؤزلرئنئن تاريسي ربّه، اونلارا قوياجاغيم پادشاهلاري داوودا قوللوق اده‌جکلر."

10رب بويورور: "قورخما، ای قولوم يعقوب، دهشته دوشمه، ای ائسرايئل. چونکي سني اوزاق يِرلردن، نسلئني اسئر اولوندوغو اؤلکه‌دن قورتاراجاغام. يعقوب نسلی گئنه اَمئن-آمانليقدا اولاجاق، راحاتليق تاپاجاق، کئمسه اونو قورخوتماياجاق.

11من سنئنله‌يم، سني قورتاراجاغام" رب بويورور. "سني آرالارينا قوودوغوم مئلّتلرئن هاميسيني يوخ اِتسَم ده، سني کامئل محو اتميه‌جيم، سنه آنجاق عدالتله تربئيه وره‌‌جيم، دوغرودان دا، جزاسيز قالماغينا ائجازه ورميه‌جيم."

12ربّئن بويوردوغو بودور: "سنئن ياران شفا تاپماز، جراحتئن صاغالماز.

13محکمه‌ده ائشئنه باخان يوخدور، ناخوشلوغونا درمان يوخدور، سنئن دردئنه علاج يوخدور.

14بوتون موتّفئق‌لرئن سني ياددان چيخارديبلار، سنئن قيدئنه اصلا ديئل‌لر. من سني، دوشمن ووران کئمي، وورموشام، رحمسئز بئر آدام کئمي جزالانديرميشام، چونکي تقصئرئن بؤيوکدور، گوناهلارين چوخدور.

15نئيه ياراندان اؤتري باغيريرسان؟ دردئنئن علاجي اولماديغي اوچون؟ بو ائشلري اونا گؤره سنه اتمئشم کي، تقصئرئن بؤيوکدور، گوناهلارين چوخدور.

16بونا گؤره سني يئيَنلرئن هاميسي، يِيئله‌جکلر؛ بوتون دوشمنلرئن اسئرلئيه گده‌جکلر. سني سويانلار، سويولاجاقلار؛ سني قارت ادنلر، قارت اولوناجاقلار."

17رب بويورور: "آمّا من سني گئنه صاغالداجاغام، يارالارينا شفا وره‌جيم. چونکي سني ردّ ادئلمئش چاغيريرلار، صحيون کي، اونا اهمئيّت ورن يوخدور."

18رب بله ديئر: "يعقوبون چاديرلارينين اوغورونو تزه‌دن قوراجاغام، ساکئن اولدوغو يِرلره شَفقَت گؤرسده‌جيم. شهر تزه‌دن وئرانه‌لري اوستونده تئکئله‌جک، ساراي اؤز يِرئنده برپا اولوناجاق.

19اونلارين آراسيندان شوکور و شَنلئک سَسلري اِشئدئله‌جک. من اونلاري چوخالداجاغام، آزالماياجاقلار؛ من اونلارا عئزّت وره‌جيم، آلچالماياجاقلار.

20اؤولادلاري اوّلکي کئمي اولاجاقلار، جاماعاتي حوضورومدا مؤحکم دوراجاق؛ اونلاري سيخيشديرانلارين هاميسيني جزالانديرجاغام.

21رهبري اؤزلرئندن اولاجاق؛ باشچيسي اؤز آرالاريندان چيخاجاق. اونو اؤزومه ياخينلاشديراجاغام، او دا منه ياخينلاشاجاق. آيري جور کئم جورعت اده بئلر کي، اؤزونو منه ياخينلاشديرسين؟" رب بويورور.

22"بلجه سئز منئم خالقيم، من ده سئزئن تارينيز اولاجاغام."

23باخ، ربّئن طوفاني قضبله قوپاجاق، شئدّتلي طوفاني پئس آداملارين باشيندا پارتلاياجاق.

24ربّئن اؤز حئدّتلي قضبي، اوره‌يئنئن ائسته‌دئيئني اده‌نه قدر، اونو يرئنه يتئره‌نه قدر سؤنميه‌جک. سئز گله‌جک گونلرده بونو آنلاياجاقسينيز.

← Chapter 29 Chapter 31 →