Jeremiah 10

Azerbajani Bible (South) Used in Both Iran and Azerbaijan 2008

1ربّئن سئزه ددئيي سؤزو اِشئدئن، ای ائسرايئل نسلي!

2رب بله ديئر: "آيري مئلّتلرئن يولونو اؤيرنمه‌يئن، گؤي علامتلرئندن دهشته گلمه‌يئن، بونلاردان باشقا مئلّتلر دهشت ادئرلر.

3چونکي خالقلارين رسم-روسوملاري بوش شي‌دئر. مِشه‌دن کَسئلمئش اودوندور، اوستا اَلئنئن کَسکئسی ائله اونا شکئل ورئر.

4اونو قيزيل و گوموشله بَزه‌يئرلر، چکوجلا، ميخلا بَرکئدئرلر کي، يِره هِل‌لَنمه‌سئن.

5بوتلري خئيار بوستانينداکي مترسک کئمي دئرلر، دانيشا بئلمئرلر. اونلاري داشيماق لازيمدير، چونکي يِرئيه بئلمئرلر. اونلاردان قورخمايين، چونکي هچ بئر ضرر يتئره بئلمئرلر، فايدالاري دا هچ يوخدور."

6سنئن کئمي تاري يوخدور، يارب؛ سن بؤيوکسن، عظمتده آدين بؤيوکدور.

7ای مئلّتلرئن پادشاهي، سنه کئم حؤرمت اتمَز؟ سنه حؤرمت ياراشير، چونکي مئلّتلرئن بوتون حئکمتلی‌لري آراسيندا، بوتون مملکتلرئنده سنئن کئمئسي يوخدور.

8اونلارين هاميسي عاغيلسيز و آخماقديرلار، فايداسيز بوتلردن نه اؤيره‌نئله‌بئلر کي؟ آغاجدان دوزه‌لمئشدئرلر!

9تَرشئشدن دؤيولموش گوموش، اوفازدان قيزيل گتئرئلئر. اوستانين و زرگرئن اَلي ائله دوزه‌لدئلن بوته؛ لاجورد و ارغوان پالتار گِيئندئرئلئر. هاميسي باجاريقلي آداملارين اَلي ائشئدئر.

10آمّا رب حقئقي تاري‌دير. وار اولان تاري‌دير، ابدی پادشاه اودور. قضبئندن يِر تئتره‌ير، حئدّتئنئن قاباغيندا مئلّتلر دورا بئلمز.

11اونلارا بله دئيه‌جکسن: "يري و گؤيو ياراتمايان آللاهلار ير اوزوندن و گؤيون آلتيندان يوخ اولاجاقلار."

12ربدئر کي، قودرتي ائله يِر اوزونو ياراتدي، حئکمتي ائله دونياني قوردو، درّاکه‌سي ائله گؤيلري يايدي.

13او گورلاياندا، گؤيلرده‌کي سولار جوشا گلئر، يِرئن اوجقارلاريندان بولودلاري اوجالدير، ياغيش اوچون شئمشک چاخديرير، آنبارلاريندان کولَک چيخاردير.

14هر کس آغيلسيزدير، معرئفتسئزدئر. هر زرگر دوزلتدئيي بوتدن اوتانير، چونکي اونون تؤکدويو بوت پوچدور، اونلاردا نفس يوخدور.

15اونلار بوش شي‌دئرلر، مسخره‌دئرلر. جزا واختلاري گلن زامان، اونلار دا محو اولاجاقلار.

16لاکئن يعقوبا نصئب اولان اونلارا بَنزه‌مز؛ چونکي هر شيي يارادان اودور. ائسرايئل اونون ائرث قبئله‌سي‌دئر، اونون آدي قوشونلار ربّي‌دئر.

17ای موحاصئره‌يه آلينان شهرده ياشايان، اشيالاريني يردن باغلامايا ييغ.

18چونکي رب بله ديئر: "باخ، من بو دفه اؤلکه‌نئن ساکئنلرئني ساپاندلا آتاجاغام. اونلاري سيخيشديراجاغام کي، دوشمن اَلئنه کچسئنلر."

19يارامدان اؤتري، واي حاليما! يارام صاغالماز. آنجاق من ددئم: "قطعن، مرض، منئم مرضئم، اونا دؤزمه‌لي‌يَم."

20چاديريمين ييخيليب، بوتون ائپلرئم قوپوب. اوشاقلاريم منی ترک ادئب و آرتيق يوخدورلار. چاديريمي تزه‌دن قوران، پرده‌لرئمي تزه‌دن آسان قالماييب.

21چونکي خالقين چوبانلاري آغيلسيز اولوبلار، ربدن مصلحت آلماييبلار. بونا گؤره ده اوغور قازانماييبلار، بوتون سورولري ده داغيليب.

22بئر خبر سَسي گلئر، قولاق آسين! شئمال اؤلکه‌سئندن بؤيوک گورولتو گلئر کي، يهودا شهرلرئني خاراباليغا، چاقّال يوواسينا چِوئرسئن.

23يارب، بئلئرم کي، ائنسانين عؤمرو اؤز اَلئنده ديئل. قدملرئنه طرئق ورمک ده اونون ائشي ديئل.

24منی ائصلاح ات، يارب، آنجاق قضبئنله يوخ، عدالتله. يوخسا منی هچه چيخاردارسان.

25قضبئني سني تانيمايان مئلّتلرئن، آديني چاغيرمايان طايفالارين اوستونه تؤک. چونکي اونلار يعقوب نسلئني اودوبلار، اونو يِيئب- قورتاريبلار، يوردونو وئران قويوبلار."

← Chapter 9 Chapter 11 →