Isaiah 60

Azerbajani Bible (South) Used in Both Iran and Azerbaijan 2008

1قالخ، ائشيقلان، چونکي نورون گلئب، ربّئن شؤوکتي سنئن اوستونه ساچير!

2باخ، دونياني قارانليق، خالقلاري ظولمت بورويه‌جک. آمّا رب سنئن اوستونه نور ساچاجاق، شؤوکتي سني اَحاطه اده‌جک.

3مئلّتلر سنئن نورونا، پادشاهلار اوستونه چؤکَن آيدينليغا طرف گله‌جکلر.

4قالدير باشيني، باخ اطرافينا، اونلارين هاميسي ييغيليب يانينا گلئرلر! اوغوللارين اوزاقدان گله‌جک، قيزلارين قوجاقدا گتئرئله‌جک.

5او واخت بونو گؤروب اوزون نور ساچاجاق، اوره‌يئن سِوئنجدن تِز-تِز چيرپيناجاق. چونکي دهنزئن وار-دؤولتي سنه گتئرئله‌جک، مئلّتلرئن ثروتي سنه گله‌جک.

6دَوه سورولري، مئديانين، عِيفانين جمّازلاري تورپاقلاريني دولدوراجاق. بوتون شِبا خالقي گلئب قيزيل و کوندور گتئره‌جک، و ربّئن حمدلرئنئن خوش خبرئني اعلان اده‌جک.

7قِدارين بوتون سورولري سنئن يانينا ييغيلاجاق، نِبايوتون قوچلاري سنه خئدمت اده‌جک، قوربانگاهيمدا منه مقبول اولان قوربانلار اولاجاقلار، و من عئزّتلي اِوئمي داها دا عئزّتلَندئره‌جيم.

8کئمدئر بونلار کي، بولود کئمي، يووالارينا ياخينلاشان گؤيرچئن کئمي اوچوب گلئرلر؟

9قطعن ساحئل‌‌لر منه اومئد باغلاياجاقلار؛ تَرشئش گَمئلري اوّل گله‌جکلر کي، سنئن اؤولادلاريني قيزيل وَگوموشلري ائله اوزاقدان گتئرسئنلر؛ تارين ربّئن آدي اوچون، سني عئزّتلَندئرَن ائسرايئلئن موقدّسي اوچون.

10اجنبئلر دووارلاريني تئکه‌جکلر، پادشاهلاري سنه خئدمت اده‌جکلر. چونکي قضبئمده سني ووردوم، و لوطفومده سنه شَفقَت گؤرستمئشم.

11دروازالارين همئشه آچيق قالاجاق، نه گجه، نه ده گوندوز قيفيل‌لاناجاق کي، مئلّتلرئن ثروتي سنه تقدئم اولسون، پادشاهلاري يانينا گتئرئلسئن.

12چونکي سنه خئدمت اتمک ائستمه‌ين مئلّت و يا سلطنت محو اولاجاق، بلی، او مئلّتلر کامئل يوخ اولاجاقلار.

13شام آغاجي، چئنار و سرو آغاجلاري کي، لوبنانين شان-شؤهرتي‌دئر، سنه گتئرئله‌جک کي، موقدّس مکانيمداکي يري گؤزل‌لَشدئرسئن، و آياق قويدوغوم يري شؤوکتلَندئرئم.

14سني ذلئل ادنلرئن اؤولادلاري گلئب قاباغيندا تعظئم اده‌جکلر. سنه حقارتله باخانلارين هاميسي آياقلارينا دوشوب سنه سجده اده‌جکلر. سنه ربّئن شهري، ائسرايئلئن موقدّسئنئن صحيونو دئيه‌جکلر.

15گرچي سني ترک ادئب سندن نئفرت اتدئلر، يانيندان هچ کئم کِچمئردي، آمّا ائندي من سني ابدی بئر فخر، نسئل‌لر بويو بئر شادليق اده‌جيم.

16مئلّتلر و پادشاهلار بئر آنا کئمي سنه سود وره‌جکلر. او واخت بئله‌جکسن کي، من سني قورتاران ربّم، سني ساتين آلان، يعقوبون قودرتلي تاريسي.

17سنه بورونج عوضئنه قيزيل، دمئر يرئنه گوموش، آغاج يرئنه بورونج، داش عوضئنه دمئر گتئره‌جيم. اَمئن-آمانليغي حؤکمدارين، صالحلئيي ده باشچيلارين تعيئن اده‌جيم.

18سنئن تورپاغيندا بئر داها قدّارليق اِشئدئلميه‌جک، سرحدلرئنئن آراسيندا هلاکت و وئرانه‌لئک خبري اولماياجاق. دووارلاريني «خئلاص»، دروازالاريني دا «حمد» آدلانديراجاقسان.

19آرتيق گوندوز گونش ائشيغين اولماياجاق، گجه آي سنه آيدينليق ورميه‌جک. چونکي رب ابدی نورون، تارين دا سنئن شؤوکتئن اولاجاق.

20گونشئن بئر داها باتماياجاق، آيين گئزلَنميه‌جک، چونکي رب ابدی نورون اولاجاق، سنئن ياسلي گونلرئن قورتاراجاق.

21او واخت بوتون خالقين صالح اولاجاق، تورپاغي همئشه‌لئک مولک آلاجاقلار. اونلار اَکدئيئم بوداقدير، اَلئمئن ائشي کي، اونونلا عئزّتلَنئم.

22لاپ کئچئک عايئله‌دن بؤيوک نسئل عمله گله‌جک، آز سايلي نسئل قودرتلي مئلّت اولاجاق. من رب بونو اؤز واختيندا تِز اده‌جيم.

← Chapter 59 Chapter 61 →