Genesis 47

Azerbajani Bible (South) Used in Both Iran and Azerbaijan 2008

1يوسئف فئرعونون يانينا گدئب ددي: "کَنَعان تورپاغيندان آتام و قارداشلاريم قويون-کچئلري، مال-حيوانلاري و صاحئب اولدوقلاري بوتون شيلري ائله بئرلئکده بورايا گلئبلر و گوشِن وئلايتئنده‌دئرلر."

2سونرا قارداشلاري آراسيندان بِشئني گؤتوروب، فئرعونون حوضورونا گتئردي.

3فئرعون يوسئفئن قارداشلاريندان سوروشدو: "نه ائشئن صاحئبئسئنئز؟" اونلار فئرعونا جاواب وردئلر: "بئز قوللارين، آتالاريميز کئمي چوبانيق.

4بو اؤلکه‌يه گلمئشئک کي، بئر مودّت اوندا ياشاياق. چونکي کَنَعان تورپاغيندا دهشتلي آجليق حؤکم سورور. بو قوللارينين سورولري اوچون اوتلاق يوخدور. ائندي خاهئش ادئرئک کي، قوللارينا، گوشِن وئلايتئنده ياشاماغا ائجازه وره‌سئنئز."

5فئرعون يوسئفه ددي: "آتانينلا قارداشلارين يانينا گلئبلر.

6مئصئر تورپاغي سنئن قاباغيندادير: آتانينلا قارداشلاريني بو تورپاغين لاپ ياخشي يرلرئنده يِرلَشدئر. قوي گوشِن وئلايتئنده ياشاسينلار. اگر اونلارين آراسيندا باجاريقلاريني تاني‌ييرسان، اونلاري منئم سورولرئمه چوبان قوي."

7يوسئف آتاسي يعقوبو گؤتوروب، فئرعونون حوضورونا گتئردي. يعقوب فئرعونا برکت وردی.

8فئرعون يعقوبدان سوروشدو: "نچه ياشين وار؟"

9يعقوب فئرعونا جاواب وردی: "عؤمرومون يوز اوتوز ائلئني قوربتده کچئرتدئم، آمّا عؤمروم آز و آغير اولدو، آتالاريمين قوربتده‌کي عؤمرو قدر اوزون اولمادي."

10سونرا فئرعونا برکت ورئب، اونون حوضوروندان چيخدي.

11يوسئف آتاسي ائله قارداشلاريني مئصئرده يِرلَشدئردي و فئرعونون امر اتدئيي کئمي، اونلارا اؤلکه‌نئن لاپ ياخشي يرئنده، رَعمِسِس بؤلگه‌سئنده مولک وردی.

12بوندان علاوه، يوسئف آتاسينا، قارداشلارينا و آتاسينين عايئله‌سئنه مالئک اولدوقلاري اوشاقلارين سايينا گؤره چؤرک تداروک گؤردو.

13آجليق گتدئکجه او قدر گوجلَندي کي، هچ بئر اؤلکه‌ده چؤرک تاپيلمادي. آجليق مئصئر و کَنَعان اؤلکه‌لرئنئن اهالئسئني طاقتدن سالميشدي.

14يوسئف ساتديغي تاخيلين عوضئنده مئصئر و کَنَعان اؤلکه‌لرئنده ييغيلان بوتون پوللاري ييغيب، فئرعونون سارايينا آپاردي.

15مئصئر و کَنَعان اؤلکه‌لرئنده پول قورتاراندا بوتون مئصئرلئلر يوسئفئن يانينا گلئب ددئلر: "بئزه چؤرک ور. گؤزونون قاباغيندا نئيه اؤلَک؟ پولوموز آرتيق يوخدور."

16يوسئف ددي: "حيوانلارينيزي ورئن. اگر پولونوز قورتاريب، حيوانلارينيزي ورئن، اونلارين عوضئنه سئزه چؤرک وره‌رم."

17اونلار حيوانلاريني يوسئفئن يانينا گتئردئلر. يوسئف ده آتلارين، قويون-کچي و مال-حيوان سورولرئنئن و اِششَکلرئن عوضئنه اونلارا چؤرک وردی. همئن ائل اونلاري، حيوانلاري عوضئنه وردئيي چؤرکله ساخلادي.

18ائل باشا چاتاندا ائکئنجي ائل گئنه اونون يانينا گلئب ددئلر: "آغاميزدان گئزلَده بئلمه‌رئک کي، پولوموز قورتاريب، حيوان سورولرئمئز ده آغاميزيندير. آغاميزين حوضوروندا جانيميز و تورپاقلاريميزدان باشقا بئر شيئمئز قالمادي.

19نه اوچون گؤزونون قاباغيندا تورپاغيميزلا برابر محو اولاق؟ بئزي و تورپاقلاريميزي چؤرک عوضئنه ساتين آل. قوي هم بئز، هم ده تورپاقلاريميز فئرعونا قول اولسون. توخوم ور کي، اؤلمه‌يئب ياشايا بئلَک، هم ده تورپاغيميز صحرايا چِوئرئلمه‌سئن."

20بِلَجه، يوسئف مئصئرئن بوتون تورپاقلاريني فئرعون اوچون ساتين آلدي. بوتون مئصئرلئلر اؤز زمئلرئني ساتديلار، چونکي آجليق اونلارا چوخ آغير ائدي. تورپاقلار فئرعونون اولدو.

21يوسئف مئصئر اراضئسئنئن بئر اوجوندان او بئري اوجونا قدر، بوتون اهالئني شهرلره کؤچورتدو.

22آنجاق کاهئنلرئن تورپاغيني ساتين آلمادي، چونکي اونلار فئرعوندان مَواجئب آليب، فئرعونون وردئيي مَواجئبله دولانيرديلار. بونا گؤره ده تورپاقلاريني ساتماديلار.

23يوسئف خالقا ددي: "باخ بو گون سئزي ده، تورپاقلارينيزي دا فئرعون اوچون ساتين آلميشام. آلين، بو سئزئن توخومونوز! تورپاغي اَکه‌جکسئنئز.

24محصول ييغيلاندا اونون بشده بئرئني فئرعونا وره‌جکسئنئز. بشده دؤردونو ده اَکئن توخومو اوچون اؤزونوزه ساخلاياجاقسينيز کي، هم اؤزونوز، هم اِو اَهلئنئز، هم ده اوشاقلارينيز اوچون يمک اولسون."

25خالق ددي: "سن بئزئم جانيميزي قورتاردين. قوي آغاميزين گؤزونده لوطف تاپاق، بئز فئرعونون قولو اولوروق."

26يوسئف مئصئر تورپاغيندا بئر قانون قويدو کي، محصولون بشده بئري فئرعونا ورئلسئن. بو قانون بو گونه قدر قووّه‌ده‌دئر. آنجاق کاهئنلرئن تورپاغي فئرعونا ورئلمه‌دي.

27ائسرايئلئن نسلی مئصئرده‌کي گوشِن وئلايتئنده ياشاياراق، اورادا مولک صاحئبي اولدو. اونلار چوخاليب آرتديلار.

28يعقوب مئصئر تورپاغيندا اون يدّي ائل ياشادي. او، يوز قيرخ يدّي ائل عؤمور سوردو.

29ائسرايئلئن اؤله‌جيي گون ياخينلاشاندا، اوغلو يوسئفي چاغيريب ددي: "اگر گؤزونده لوطف تاپميشام، اَلئني بودومون آلتينا قوي و آند ائچ کي، منه مهرئبانليق و وفا گؤرسده‌سن. خاهئش ادئرم منی مئصئرده باسديرماياسان.

30لاکئن اجدادلاريملا بئرلئکده ياتاندا منی مئصئردن آپاريب، آتالاريمين مقبره‌سئنده باسديرارسان." يوسئف ددي: "ددئيئن کئمي اده‌رم."

31آتاسي ددي: "منه آند ائچ." او دا اونا آند ائچدي. او واخت ائسرايئل ياتاغينين باشيندا اَيئلئب تارييا سجده اتدي.

← Chapter 46 Chapter 48 →