Genesis 45

Azerbajani Bible (South) Used in Both Iran and Azerbaijan 2008

1يوسئف يانيندا دورانلارين هاميسينين حوضوروندا اؤزونو ساخلايا بئلمه‌يئب قيشقيردي: "هاميني يانيمدان چيخاردين." يوسئف اؤزونو قارداشلارينا تانيتديرديغي زامان يانيندا هچ کس يوخ ائدي.

2او هؤنکوروب آغلادي. مئصئرلئلر و فئرعونون ساراي آداملاري اشئتدئلر.

3يوسئف قارداشلارينا ددي: "من يوسئفم. آيا آتام حله صاغدير؟" قارداشلاري اونا جاواب ورمه‌دئلر، چونکي دهشتدن قوروموشدولار.

4يوسئف قارداشلارينا ددي: "خاهئش ادئرم، منه ياخين گلئن." اونلار ياخين گلدئلر. يوسئف ددي: "مئصئره ساتديغينيز قارداشينيز يوسئف منم.

5ائندي منی بورايا ساتديغينيز اوچون کَدَرلَنمه‌يئن و تأسّوف اتمه‌يئن، چونکي تاري منی سئزدن قاباق بورايا گؤندردي کي، حياتينيزي حئفظ اتسئن.

6آرتيق ائکي ائلدئر کي، اؤلکه‌ده آجليقدير، حله بش ائل ده اَکئن-بئچئن اولماياجاق.

7تاري منی سئزدن قاباق بورايا گؤندردي کي، ير اوزونده سئزئن اوچون صاغ قالانلار ساخلاسين و بؤيوک بئر قورتولوشلا حياتينيزي موحافئظت اتسئن.

8اونا گؤره ده منی بورايا گؤندرَن سئز ديئلسئنئز، تاريدير. او منی فئرعونا آتا، اونون بوتون ساراي آداملارينا آغا، بوتون مئصئر اؤلکه‌سئنه ده باشچي اتدي.

9تز آتامين يانينا گدئب اونا ديئن کي، اوغلون يوسئف بله ديئر: «تاري منی بوتون مئصئر اؤلکه‌سئنه آغا اتدي. داها دورما، يانيما گل.

10گوشِن وئلايتئنده ياشايارسان. اؤزون، اوغوللارين، نوه‌لرئن، قويون-کچئن، مال-حيوانين، سنئن هر شيئن منه ياخين اولار.

11اورادا سنئن قيدئنه قالارام، چونکي داها بش ائل آجليق اولاجاق. يوخسا اؤزون، عايئلَن و سنه باغلي اولان هر کس يوخسوللوق چکه‌جک.»

12باخ، سئزئن و قارداشيم بِنيامئنئن گؤزلري گؤرور کي، بو سؤزلري دئلئمله سئزه ديئرم.

13مئصئرده صاحئب اولدوغوم بوتون عئزّتي و بوتون گؤردوکلرئنئزي آتاما بئلدئرئن و تزلئکله آتامي بورايا گتئرئن."

14يوسئف قارداشي بنيامئنئن بوينونا ساريليب آغلادي، بنيامئن ده اونون بوينونا ساريليب آغلادي.

15يوسئف بوتون قارداشلاريني اؤپدو و اونلارين بوينونا ساريليب آغلادي. بوندان سونرا قارداشلاري اونونلا صؤحبت اتدئلر.

16يوسئفئن قارداشلارينين گلمه‌سي باره‌ده فئرعونون سارايينا خبر چاتدي. بو خبر فئرعونون و اونون اعيانلارينين خوشونا گلدي.

17فئرعون يوسئفه ددي: "قارداشلارينا دِه کي، بله اتسئنلر: «حيوانلارينيزي يوکله‌يئن و يولا دوشوب کَنَعان تورپاغينا گدئن.

18آتانيزي و اِو آداملارينيزي گؤتوروب يانيما گلئن. سئزه مئصئر اؤلکه‌سئنده لاپ ياخشي تورپاغي وره‌جيم، تورپاغين شئره‌سئني يئيه‌جکسئنئز.

19سئزه امر اولونور: بله ادئن. آرواد-اوشاغينيز اوچون مئصئر اؤلکه‌سئنده اؤزونوزه عارابالار آلين و آتانيزي گتئرئب گلئن.

20اورادا قالان شيلرئنئزده گؤزونوز قالماسين، چونکي بوتون مئصئر تورپاغينين لاپ ياخشي شيلري سئزئندئر.»"

21ائسرايئلئن اوغوللاري بله ده اتدئلر. يوسئف فئرعونون امرئله اونلارا عارابالار و يول اوچون آذوقه وردی.

22اونلارين هر بئرئنه بئر دست دَيئشئک پالتار وردی، بنيامئنه ده اوچ يوز پارچا گوموش و بش دست دَيئشئک پالتار وردی.

23يوسئف آتاسي اوچون مئصئرئن لاپ ياخشي شيلري ائله يوکلَنمئش اون اِششَک گؤندردی. اون دئشی اششک ده کی، يول اوچون تاخيل، چؤرک و آذوقه ائله يوکلَنمئش ائدی.

24او، قارداشلاريني يولا سالدي و اونلار يولا دوشدوکده، يوسئف اونلارا ددي: "يولدا داعوا اتمه‌يئن."

25اونلار مئصئردن چيخيب، کَنَعان تورپاغينا، آتالاري يعقوبون يانينا گلدئلر.

26اونا هر شيي خبر وردئلر: "يوسئف صاغ-سالاماتدير، اؤزو ده بوتون مئصئر اؤلکه‌سئنه باشچيليق ادئر." يعقوب حيرتله‌نئب قالدي و اونلارا ائنانمادي.

27قارداشلار يوسئفئن اونلارا ددئيي بوتون سؤزلري اونا ددئلر. اونو آپارماق اوچون يوسئفئن گؤندردئيي عارابالاري گؤرنده آتالاري يعقوبون جاني تزه‌لَندي.

28ائسرايئل ددي: "يِتَر: اوغلوم يوسئف صاغ-سالاماتدير. قوي اؤلمه‌مئشدن قاباق گدئب اونو گؤروم."

← Chapter 44 Chapter 46 →