Genesis 30

Azerbajani Bible (South) Used in Both Iran and Azerbaijan 2008

1راحئل يعقوبا اوشاق دوغماديغيني گؤرنده باجيسينا پاخيلّيق اتدي و يعقوبا ددي: "منه اوشاق ور، يوخسا اؤله‌رم."

2يعقوبون راحئله قضبي آلوولاندي و ددي: "مگر من سنئن بطنئنه ثمره ورمه‌ين تارييام؟"

3راحئل ددي: "باخ، بو کنئزئم بئلحا‌، اونونلا ياخينليق ات کي، دئزلرئمئن اوستونه بئر اوشاق دوغسون و اوندان بئر عايئلَم اولسون."

4راحئل کنئزي بئلحا‌ني اونا آرواد اولماق اوچون وردی و يعقوب اونون يانينا گئردي.

5بئلحا بويلو اولوب يعقوبا بئر اوغول دوغدو.

6راحئل ددي: "تاري منی حاقلي چيخارتدي و سسئمي اشئدئب منه بئر اوغول وردی." بونا گؤره ده اونون آديني دان قويدو.

7راحئلئن کنئزي بئلحا گئنه بويلو اولوب يعقوبا ائکئنجي اوغول دوغدو.

8راحئل ددي: "باجيملا گوجلو موبارئزه‌يه گئرئشئب اونا قالئب گلدئم." او، اوشاغين آديني نَفتالئ قويدو.

9لئيه داها دوغماديغيني گؤرنده کنئزي زئلپاني گؤتوروب يعقوبا آرواد اولماق اوچون وردی.

10لئيه‌نئن کنئزي زئلپا يعقوبا بئر اوغول دوغدو.

11لئيه "اوغور قازانديم" ديئب اونون آديني جاد قويدو.

12لئيه‌نئن کنئزي زئلپا يعقوبا ائکئنجي اوغول دوغدو.

13لئيه ددي: "خوشبختم، چونکي آروادلار منی بختور ساياجاقلار." او، اوشاغين آديني آشِر قويدو.

14رِعوبئن بوغدا بئچئني واختي گدئب زمئده محبّت اوتلاري تاپدي و اونلاري آناسي لئيه‌يه گتئردي. راحئل لئيه‌يه ددي: "خاهئش ادئرم، اوغلونون محبّت اوتلاريندان منه ده ور."

15لئيه اونا ددي: "اَرئمي الئمدن آلديغين بس ديئل؟ ائندي ده ائسته‌يئرسن کی، اوغلومون محبّت اوتلاريني آلاسان؟" راحئل ددي: "اگر اِله‌دئر، قوي اَرئم اوغلونون محبّت اوتلارينين عوضئنده بو گجه سنئنله ياتسين."

16يعقوب آخشام چؤلدن گلنده، لئيه اونون پئشوازينا چيخيب ددي: "منئم يانيما گئر، چونکي سني اوغلومون محبّت اوتلاري ائله ساتين آلميشام." يعقوب او گجه اونونلا ياتدي.

17تاري لئيه‌ني اشئتدي و او بويلو اولوب يعقوبا بشئنجي اوغلونو دوغدو.

18لئيه ددي: "تاري حاقّيمي وردی، چونکي کنئزئمي اَرئمه وردئم." او، اوشاغين آديني يئسّاکار قويدو.

19لئيه گئنه بويلو اولوب يعقوبا آلتينجي اوغلونو دوغدو.

20او ددي: "تاري منه ياخشي بئر هدئيّه وردی، بو دفه اَرئم منه دَيَر ورَر، چونکي اونا آلتي اوغول دوغدوم." او، اوشاغين آديني زِبولون قويدو.

21سونرا بئر قيز دوغوب، آديني دئنا قويدو.

22تاري راحئلي يادا ساليب اونو دا اشئتدي و بطنئني آچدي.

23او بويلو اولوب بئر اوغول دوغدو و ددي: "تاري خجالتئمي گؤتوردو."

24او "رب منه بئر اوغول دا آرتيرسين" ديئب، اوشاغين آديني يوسئف قويدو.

25راحئل يوسئفي دوغاندان سونرا، يعقوب لابانا ددي: "منی گؤندر، اؤز اِوئمه و اؤلکه‌مه گدئم.

26عوضئنده سنه خئدمت اتدئيئم آروادلاريمي و اوشاقلاريمي دا ور، گِدئم، چونکي سنه نجه خئدمت اتدئيئمي بئلئرسن."

27لابان اونا ددي: "اگر ائندي سنئن گؤزونده لوطف تاپميشام، يانيمدا قال، چونکي فالدان آنلاديم کي، سنه گؤره رب منه برکت ورئب."

28سونرا ددي: "حاقّيني منه تعيئن ات، ورئم."

29يعقوب اونا ددي: "سنه نجه خئدمت اتدئيئمي و منئمله اولان سورولرئني نجه ساخلاديغيمي بئلئرسن.

30چونکي من گلمه‌مئشدن قاباق سنئن مالين آز ائدي، آمّا سونرا چوخ چوخالدي؛ رب منئم گلئشئمله سنه برکت وردی. بس من اؤز عايئلَم اوچون نه واخت چاليشاجاغام؟"

31لابان ددي: "سنه نه ورئم؟" يعقوب ددي: "منه هچ نه ورمه. اگر آنجاق بو بئر شيي منه اده‌سن، گئنه سنئن سورونو قورويوب اونا باخارام:

32قوي بو گون سنئن بوتون سورولرئنئن ائچئندن کچئب، قويونلار آراسيندان هر خاللي، زولاقلي قويونو و قارا قوزونو، کِچئلر آراسيندان هر زولاقلي و خاللي کِچئني آييريم؛ حاقّيم دا بو اولسون.

33بوندان سونرا قاباغيندا اولان حاقّيم اوچون گلدئکده دوزلويوم منئم بارمده شهادت وره‌جک. قوي کِچئلردن خاللي و زولاقلي اولماياني، قوزولاردان دا قارا اولماياني اوغورلانميش ساييلسين."

34لابان ددي: "ياخشي، قوي ددئيئن کئمي اولسون."

35آمّا او بو گون آلابَزَک و زولاقلي اِرکَک کِچئلري، بوتون خاللي و زولاقلي دئشي کِچئلري، آغ کِچئلري و بوتون قارا قوزولاري آييريب اوغوللارينين ائختئيارينا وردی.

36سونرا اؤزو يعقوبدان اوچ گونلوک يول قدر اوزاقلاشدي. آمّا يعقوب لابانين قالان سوروسونو اوتاريردي.

37يعقوب سپئدار، بادام و چئنار آغاجيندان تزه چوبوقلار گؤتوردو و چوبوقلارين قابيغيني سويوب آغ رَنگلي ائچي اوزه چيخانا قدر زولاقلار آچدي.

38سونرا قابيغيني سويدوغو چوبوقلاري سورولرئن سو ائچمَک اوچون گلدئکلري تَکنه‌لره، حيوانلارين قاباغينا قويدو. اونلار گلئب سو ائچَنده جوفتلَشئردئلر.

39بلجه حيوانلار چوبوقلارين قاباغيندا جوفتله‌شئردئلر و سورولرده آلابَزَک، خاللي و زولاقلي حيوانلار دوغولوردو.

40يعقوب قوزولاري آييردي و سورونون اوزونو لابانين سوروسونده اولان بوتون آلابَزَک و قارا حيوانلارا طرف توتوردو. او اؤز سوروسونو آيريجا قويدو و اونلاري لابانين سوروسونه قاتمادي.

41هر دفه سورونون قووّتلي حيوانلاري جوفتلَشَنده يعقوب تَکنه‌لره، سورونون گؤزلري قاباغينا چوبوقلار قويوردو کي، چوبوقلار آراسيندا جوفتلَنسئنلر.

42لاکئن حيوانلار ضعئف اولاندا اونلاري قويمازدي. بلجه ضعئف حيوانلار لابانين، قووّتلي حيوانلار دا يعقوبون اولدو.

43يعقوب چوخ وارلاندي: اونون چوخلو سوروسو، کنئزي، قولو، دوه‌سي و اِششه‌يي اولدو.

← Chapter 29 Chapter 31 →