Genesis 15

Azerbajani Bible (South) Used in Both Iran and Azerbaijan 2008

1بئر مودّت سونرا اَبراما رؤيادا ربّئن بو سؤزو نازئل اولدو: "اي اَبرام، قورخما. سنئن قالخانين منم. اَجرئن چوخ بؤيوک اولاجاق."

2اَبرام ددي: "اي پروردئگار رب، منه نه وره‌جکسن؟ منئم اؤولاديم يوخدور، اِوئمئن وارئثي بو دَمَشقلي اِلئعِزِردئر."

3اَبرام سؤزونه داوام وردی: "سن منه اؤولاد ورمه‌دئيئن اوچون، باخ، اِوئمده دوغولان نؤکر منئم وارئثئمدئر."

4او واخت اونا ربّئن بو سؤزو نازئل اولدو: "او سنئن وارئثئن اولماياجاق، اؤز بِلئندن گلن اؤولادين، سنئن وارئثئن اولاجاقدير."

5رب اونو اشئيه چيخارديب ددي: "گؤيه باخ، اگر اوراداکي اولدوزلاري سايا بئلرسن، ساي." گئنه ددي: "نسلئن او قدر اولاجاق."

6اَبرام ربّه ائمان گتئردي و رب بونو اونا صالحلئک سايدي.

7رب اَبراما ددي: "من او ربّم کي، سني کَلده‌لئلرئن اور شهرئندن چيخارتديم کی، بو تورپاغي سنه مئراث ورئم."

8اَبرام سوروشدو: "يا پروردئگار رب، نجه بئلئم کی، اونو مئراث آلاجاغام؟"

9رب اونا ددي: "منئم اوچون بئر اوچ ياشلي ائنَک، بئر اوچ ياشلي کِچي، بئر اوچ ياشلي قوچ، هم ده بئر قومري و بئر گؤيرچئن بالاسي گتئر."

10اَبرام بونلارين هاميسيني گؤتوروب کسدي و ائکي بؤلدو، هر قئسمتي او بئرئنئن موقابئلئنه قويدو، آمّا قوشلاري کسمه‌دي.

11کَرکَسلر لِشلرئن اوستونه اوچوب گلدئلر، آمّا اَبرام اونلاري قوودو.

12گونش باتان واخت اَبراما آغير يوخو گلدي. بئردن اونون اوستونه دهشت و آغير قارانليق دوشدو.

13رب اَبراما ددي: "يقئن بئل کي، نسلئن ياد اؤلکه‌ده قرئب اولاجاق، و دؤرد يوز ائل اورادا اولان مئلّته قوللوق اده‌جک و اونلارا ظولم ادئله‌جکدئر.

14لاکئن اونلارين قوللوق اده‌جکلري خالقي جزالانديراجاغام. سونراسي اونلار بؤيوک ثروتله اورادان چيخاجاقلار.

15آمّا سن آرامليق ائچئنده آتالارينين يانينا گده‌جکسن؛ ياخشي بئر عؤمور سورندن سونرا باسديريلاجاقسان.

16سونرا سنئن دؤردونجو نسلئن بورايا قاييداجاق، چونکي اِمورلولارين گوناهي حله کامئل حدّئنه چاتماييب."

17گونش باتيب قارانليق دوشنده، باخ، توستو چيخان بئر تندئر و آلوولانان مشعل گؤرونوب پارچالانميش حيوانلارين آراسيندان کچدي.

18او گون رب اَبراملا عهد باغلاييب ددي: "بو تورپاقلاری کی، مئصئر چاييندان بؤيوک چاي فَراتا قدر اوزانيب؛

19قِنلئلرئن، قِنئزلئلرئن، قَدمونلولارين،

20خئتلئلرئن، پِرئزلئلرئن، رِفالي‌لارين،

21اِمورلولارين، کَنَعانلي‌لارين، گئرگاشلي‌لارين و يِبوسلولارين تورپاغيني من سنئن نسلئنه ورئرم."

← Chapter 14 Chapter 16 →