Genesis 12

Azerbajani Bible (South) Used in Both Iran and Azerbaijan 2008

1رب اَبراما ددي: "اؤز تورپاغيندان، قوحوملارينين آراسيندان، آتا اِوئندن چيخ و سنه گؤرسده‌جيئم تورپاغا گت.

2سندن بؤيوک بئر مئلّت تؤره‌ده‌جيم، سنه برکت وره‌جيم، آديني اوجالداجاغام و برکت قايناغي اولاجاقسان.

3سنه برکت ورنلره، برکت وره‌جيم. سنه لعنت ادنلري، لعنت اده‌جيم. و يِر اوزونون بوتون طايفالاري سنئن واسئطَنله برکت آلاجاقلار."

4اَبرام ربّئن اونا ددئيي کئمي اورادان چيخدي. لوط دا اونونلا بئرلئکده گتدي. خاراندان چيخديغي واخت، اَبرام يتمئش بش ياشيندا ائدي.

5اَبرام آروادي سارايي، قارداشي اوغلو لوطو، خاراندا مالئک اولدوغو بوتون واريني و صاحئب اولدوغو نؤکرلرئني گؤتوروب، کَنَعان تورپاغينا طرف يولا دوشدو. اونلار کَنَعان تورپاغينا گلدئلر.

6اَبرام اورادان کچئب، شِکِم ديئلن يرده‌کي موره پاليدينين يانينا چاتدي. او واخت بو يرده کَنَعانلي‌لار وار ائدئلر.

7رب اَبراما گؤرونوب ددي: "بو تورپاغي سنئن نسلئنه وره‌جيم." اَبرام اونا گؤرونن ربّه اورادا بئر قوربانگاه دوزلتدي.

8اورادان اَبرام بِيت‌-ائلئن شرقئنده يرلشن داغليق بؤلگه‌يه طرف يولا دوشدو و اورادا چادير قوردو. چاديرين قربئنده بِيت-‌ائل، شرق سمتئنده ده عاي شهري ائدي. اَبرام اورادا دا ربّه بئر قوربانگاه دوزلتدي و ربّئن آديني چاغيردي.

9اَبرام سفرئنه داوام ورئب نِگِبه طرف حرکت ادئردي.

10بو تورپاقدا آجليق باشلادي. اَبرام مئصئره گتدي کي، بئر مودّت اورادا قالسين، چونکي اؤلکه‌ده بؤيوک آجليق حاکئم ائدي.

11او، مئصئره ياخينلاشاندا آروادي سارايا ددي: "باخ، من بئلئرم کي، سن گؤزل آروادسان.

12مئصئرلئلر سني گؤروب دئيه‌جکلر: "بو اونون آرواديدير." و مني اؤلدوره‌جکلر، لاکئن سني صاغ بوراخاجاقلار.

13سن دِه کي، منئم باجيمسان، اوندا سنئن خاطئرئنه منئمله ياخشي رفتار ادرلر و من ده صاغ قالارام."

14اَبرام مئصئره گلئب چاتاندا، مئصئرلئلر اونون آروادينين چوخ گؤزل اولدوغونو گؤردولر.

15فئرعونون اعيانلاري دا آروادي گؤردولر و اونو فئرعونا تعرئفلدئلر. آرواد فئرعونون سارايينا آپاريلدي.

16اونون خاطئرئنه فئرعون اَبراملا دا ياخشي رفتار اتدي؛ و اونا سورو، مال-حيوان، اِرکَک و دئشي اِششَکلر، نؤکرلر، کنئزلر، و دَوه‌لر وردي.

17آمّا رب اَبرامين آروادي سارايدان اؤتري، فئرعونون و اونون اِو اهلئنئن باشينا آغير ناخوشلوقلار گتئردي.

18فئرعون اَبرامي چاغيريب ددي: "بو نه ائشدئر، منئم باشيما گتئردئن؟ نئيه منه بئلدئرمه‌دئن کي، بو آرواد، سنئن آرواديندير؟

19نه اوچون ددئن کي، "بو منئم باجيمدير." اِله کي، من ده اونو اؤزومه آرواد آلديم؟ باخ، آروادين بورادادير، اونو گؤتور، گت."

20فئرعون آداملارا اونون حاقّيندا امر وردی و اَبرامينان آرواديني صاحئب اولدوغو بوتون شيلرله بئرلئکده يولا سالديلار.

← Chapter 11 Chapter 13 →