Ezekiel 7

Azerbajani Bible (South) Used in Both Iran and Azerbaijan 2008

1منه ربّئن بو سؤزو نازئل اولدو:

2"سن، ای بشر اوغلو، پروردئگار رب ائسرايئل تورپاغينا بله ديئر: «آخيري چاتيب! اؤلکه‌نئن دؤرد طرفئنئن آخيري گلئب.

3ائندي سنئن آخيرين چاتيب و من قضبئمي سنئن اوستونه گؤنده‌ره‌جيم؛ اؤز عمل‌لرئنه گؤره سني جزالانديرجاغام، بوتون ائيرنج ائشلرئنئن عوضئني باشينا گتئره‌جيم.

4سنه يازيغيم گلميه‌جک و رحم اتميه‌جيم، ائيرنج ائشلرئن سنئن ائچئنده اولارکن، سني اؤز يوللارينا گؤره جزالانديرجاغام. او واخت بئله‌جکسئنئز کي، رب منم!»

5پروردئگار رب بله ديئر: «باخ، بئر بلا، تايي اولمايان بئر موصئبت گلئر.

6بئر آخير گلئب، آخيرين چاتيب! سنئن ضئدّئنه اويانيب. باخ، او گلئر.

7ای اؤلکه‌نئن ساکئني، قئيامت گونون چاتيب. او واخت گلئب؛ او گون ياخيندادير، داغلارين اوستوندن شادليق سَسي گلن گون يوخ، ولوله گونو!

8قِيضئمي عنقرئب سنئن اوستونه تؤکه‌جيم، قضبئمي سنئن باشينا بوشالتاجاغام، سني اؤز يوللارينا گؤره موحاکئمه اده‌جيم، بوتون ائيرنج ائشلرئنئن عوضئني باشينا گتئره‌جيم.

9سنه يازيغيم گلميه‌جک و رحم اتميه‌جيم. ائيرنج ائشلرئن سنئن ائچئنده اولارکن، اؤز يوللارينا گؤره سني تنبه اده‌جيم. او واخت بئله‌جکسئنئز کي، ضربه ووران من ربّم.

10باخ او گون! او گون گلئر! سنئن قئيامت گونون چاتيب؛ عصا چئچکله‌نئب؛ کئبئر گول آچيب.

11قدّارليق چوخاليب پئسلئيئن عصاسي اولوب. بونا گؤره ده خالقدان، اونلارين ائزدئحاميندان، وار-دؤولتئندن و عظمتئندن اثر-علامت قالماياجاق.

12واخت گلئب، او گون يِتئشئب. قوي آلان سِوئنمه‌سئن، ساتان دا ماتم توتماسين، چونکي بوتون جاماعاتين اوستونه قضب ياغاجاق.

13حتّا اونلار ياشاسالار دا، ساتيجي ساتديغي تورپاغا قاييتماياجاق، چونکي بو وحی اونلارين بوتون جاماعاتينادير؛ هدفئندن دؤنمَز. هچ کس تقصئري ائله حياتيني داوام اتدئره بئلميه‌جک.

14کَره‌ناي چاليبلار و هر شيی حاضير ادئبلر، لاکئن موحارئبه‌يه گِدن يوخدور. چونکي قضبئم بوتون جاماعاتين اوستونه ياغير.

15اِشئکده قيلينج وار، ائچلرئنده وبا و آجليق. چؤلده اولان، قيلينجدان اؤله‌جک، شهرده اولاني، آجليق و وبا يئيه‌جک.

16صاغ قالانلاري قاچيب قورتولسا دا، دره‌لرده‌کي گؤيرچئنلر کئمي داغلاردا ياشاياجاق، هر کس تقصئرئندن اؤتري ائنلَيه‌جک.

17هامينين اَلي، يانينا دوشه‌جک، هر کسئن دئزلري تئترَيه‌جک.

18چولا بورونه‌جکلر، اونلاري دهشت توتاجاق. هامينين اوزونه خجالت اوتوراجاق، هامينين باشي کِچَل اولاجاق.

19گوموشلرئني کوچه‌لره آتاجاقلار، قيزيل‌لاري ناپاک ساييلاجاق؛ ربّئن قضب گونونده قيزيل-گوموشلري اونلاري قورتارا بئلميه‌جک، بدنلرئني يِدئرتميه‌جک، قارينلاريني دويدورماياجاق، چونکي بو شيلر اونلارين تقصئرلره باتماسينا باعئث اولدو.

20ربّئن بَزَکلرئنئن گؤزل‌لئيي اونلاري کئبئرلَندئردي. بو شيلردن ائيرنج و منفور بوتلرئني دوزه‌لتدئلر. اونا گؤره ده بونلاري اؤزلري اوچون نجئس بئر شيه چِوئرئرم.

21بونلاري قنئمت کئمي اؤزگه‌لره، قارت مالي کئمي دونيادانين پئس آداملارينين اَلئنه وره‌جيم و اونلاري نجئسلَيه‌جکلر.

22من خالقدان اوز دؤندره‌جيم و اونلار دَيَرلي مسکنئمي نجئسلَيه‌جکلر. حرامئلر ائچه‌ري گئرئب اوراني نجئسلَيه‌جک.

23سن زنجئري دوزلت، چونکي اؤلکه قانلي جئنايتلرله، شهر قدّارليقلا دولوب.

24مئلّتلرئن لاپ قدّاريني اونلارين اوستونه گتئره‌جيم و اِولرئني اَللرئندن آلاجاقلار. گوجلولرئن کئبئرئنه آخير قوياجاغام، موقدّس مکانلاري نجئسلَنه‌جک.

25دهشت گلنده اَمئن-آمانليق آختاراجاقلار، آمّا تاپماياجاقلار.

26بلا اوستوندن بلا گله‌جک، قارا خبر دالينجا قارا خبر چاتاجاق؛ او واخت پيغمبردن رؤيا ائستيه‌جکلر، کاهئنئن شرئعت اؤيرَتمه‌يي بئته‌جک، آغساقّاللار نصئحت ورميه‌جکلر.

27پادشاه ياس توتوب، اَمئرلري چاره‌سئزلئک بورويوب، اؤلکه خالقينين اَلي دهشتدن فلج اولوب. اونلارا يوللارينين عوضئني وره‌جيم، حؤکملرئنه موطابئق حؤکم اده‌جيم. او واخت بئله‌جکلر کي، رب منم.»"

← Chapter 6 Chapter 8 →