Ezekiel 42

Azerbajani Bible (South) Used in Both Iran and Azerbaijan 2008

1او آدام منی شئمالا گِدن يولدان بايير حيطه چيخارتدي، و او اوتاغا آپاردي کي، آچيق ساحه‌يه و بايير حيطئن شئمالينداکي تئکئلی‌لره باخيردي.

2بو تئکئلئنئن اوزونلوغو يوز، اِني اَلّي قول‌آچ ائدي و قاپيسي شئمالا باخيردي.

3ائچه‌ري حيطئن ائيئرمي قولاجليق حئصّه‌سي ائله بايير حيطئن داش يولونا باخان اوچ مرتبه‌نئن دهلئزلري اوز-اوزه ائدي.

4اوتاقلارين قاباغيندا اِني اون قول‌آچ، اوزونلوغو دا يوز قول‌آچ اولان بئر ائچه‌ري دهلئز وار ائدي. قاپيلاري شئمالا باخيردي.

5تئکئلئنئن اوست مرتبه‌ده‌کي اوتاقلاري، آلت و اورتا مرتبه‌ده‌کي اوتاقلاردان داها دار ائدي، چونکي اوست مرتبه‌ده‌کي دهلئزلر داها چوخ يِر توتوردو.

6حيطلرده سوتونلار اولدوغو حالدا، اوچونجو ‌مرتبه‌‌ده اولان اوتاقلارين سوتونلاري يوخ ائدي. بونا گؤره ده اوست مرتبه‌ده‌کي اوتاقلار، آلت و اورتا مرتبه‌ده‌کي اوتاقلاردان داها دار ائدئلر.

7اوتاقلارين قاباغيندا، اوتاقلارلا و بايير حيطله ياناشي بئر بايير دووار وار ائدي: اَلّي قول‌آچ اوزونلوغوندا ائدي.

8چونکي بايير حيطئن يانينداکي يان‌بايان اوتاقلارين اوزونلوغو اَلّي قول‌آچ ائدي. معبدئن بؤيوک اوتاغينا داها ياخين يان‌بايان اوتاقلارين اوزونلوغو دا يوز قول‌آچ ائدي.

9بو اوتاقلارين آشاغيدا شرقه طرف بئر قاپيسي وار ائدی کی، بايير حيطدن گئرمک اولاردي.

10دووارين اوزونلوغو بويونجا ائچه‌ري حيطئن جنوبو بويو باشقا اوتاقلار وار ائدئلر کي، آچيق ساحه‌يه و بايير حيطده‌کي تئکئلی‌لره باخيرديلار.

11شئمال طرفده‌کي اوتاقلاردا اولدوغو کئمي، بو اوتاقلارين قاباغيندا دا بئر کِچئش وار ائدي. اوتاقلارين اوزونلوغو و اِني هَمن ائدي، چيخيشلاري و اؤلچولري شئمال طرفده اولان اوتاقلارينکي کئمي ائدي.

12جنوبداکي اوتاقلارين قاپيلاري دا شئمالداکيلار کئمي ائدي. کِچئدئن باشلانيشيندا بئر قاپي وار ائدي. آرخا دووارلار بويونجا شرقه اوزانان بو کِچئش اوتاقلارا آچيليردي.

13سونرا او آدام منه ددي: "معبدئن آچيق ساحه‌سئنه باخان شئمالداکي و جنوبداکي اوتاقلار موقدّسدئر. ربّئن حوضوروندا خئدمت ادن کاهئنلر اورادا لاپ موقدّس تقدئملردن يئيه‌جکلر. لاپ موقدّس تقدئملري-تاخيل تقدئملرئني، گوناه قوربانلاريني و تقصئر قوربانلاريني اورادا قوياجاقلار، چونکي اورا موقدّسدئر.

14کاهئنلر موقدّس ساحه‌يه گئرَنده، خئدمت اِدَرکَن، اَيئنلرئنده‌کي گِيئملري اورادا قويمادان بايير حيطده چيخماسينلار، چونکي بو پالتارلار موقدّسدئرلر. اونلار خالقين اولدوغو يِرلره گتمه‌دن قاباق باشقا پالتارلار گِيمه‌لي‌دئرلر."

15او آدام معبدئن ائچ اوتاغيني اؤلچوب قورتاراندان سونرا، منی شرق قاپيسيندان باييرا آپاردي و هر طرفدن بو ساحه‌ني اؤلچدو.

16شرق طرفئني قاميشلا اؤلچدو: اوزونلوغو بش يوز قول‌آچ ائدي.

17شئمال طرفئني ده قاميشلا اؤلچدو: اوزونلوغو بش يوز قول‌آچ ائدي.

18جنوب طرفئني ده قاميشلا اؤلچدو: اوزونلوغو بش يوز قول‌آچ ائدي.

19قرب طرفئنه دؤنوب اونو قاميشلا اؤلچدو: اوزونلوغو بش يوز قاميش ائدي.

20بلجه ساحه‌نئن دؤرد طرفئني اؤلچدو. ساحه‌نئن اطرافيندا بئر دووار وار ائدي کي، موقدّس اولاني موقدّس اولماياندان آييريردي: اوزونلوغو و اِني هر بئري بش يوز قول‌آچ ائدي.

← Chapter 41 Chapter 43 →