Ezekiel 33

Azerbajani Bible (South) Used in Both Iran and Azerbaijan 2008

1منه ربّئن بو سؤزو نازئل اولدو:

2"ای بشر اوغلو، خالقينا منصوب اولانلارلا دانيش و اونلارا بله دِه: «اگر من بئر اؤلکه‌نئن اوستونه قيلينج گؤنده‌رَنده، اؤلکه خالقي، ائچئندن بئر نفري سِچئب اؤزلري اوچون گؤزَتچي قويسون،

3و بو گؤزَتچي اؤلکه‌نئن اوستونه قيلينجين گلدئيئني گؤره‌نده کَره‌ناي چاليب خالقا خبر ورسئن،

4او زامان کئم کَره‌ناي سَسئني اشئدئب بو ائخطارا دئقّت اتمه‌سه و قيلينج گلئب اونو اؤلدورسه، اونون قاني اؤز باشينا اولاجاق.

5او، کَره‌ناي سَسئني اشئتدي، لاکئن بو ائخطارا دئقّت اتمه‌‌دي؛ بونا گؤره ده قاني اؤز باشينا اولاجاق. آمّا اگر ائخطارا دئقّت اتسَيدي، جا‌نيني خئلاص اِدَردي.

6لاکئن اگر گؤزَتچي گؤرسون کي، قيلينج گلئر و کَره‌ناي چالماسين و خالقين بوندان خبري اولماسين و قيلينج دا گلئب اونلاردان بئرئني هلاک اتسئن، او آدام اؤز تقصئري ائچئنده اؤلدورولموشدور، لاکئن قاني گؤزَتچئنئن بوينونا اولاجاق.

7سنه گلئنجه، ای بشر اوغلو، من سني ائسرايئل نسلی اوچون گؤزَتچي قويموشام؛ نه زامان آغزيمدان بئر سؤز اشئده‌سن، گرک اونلارا منئم طرفئمدن ائخطار وره‌سن.

8او زامان کي، پئس آداما ديئرَم؛ ‹ای پئس آدام، سن قطعن اؤله‌جکسن› و سن اونونلا دانيشماييب اونا خبر ورمئرسن کي، اؤز يولوندان دؤنسون. او پئس آدام اؤز تقصئرئنه ائچئنده اؤله‌جک، لاکئن اونون قانيني سنئن بوينونا قوياجاغام.

9آمّا اگر سن پئس آداما ائخطار وره‌سن کي، اؤز يولوندان دؤنسون، لاکئن او اؤز يولوندان دؤنمه‌سه، اؤز تقصئري ائچئنده اؤله‌جک، آمّا سن اؤز جا‌نيني قورتارميش اولورسان.»

10سن، ای بشر اوغلو، ائسرايئل اِوئنه بله دِه: «سئز ديئبسئنئز کي، عوصيانلاريميز و گوناهلاريميز بوينوموزدادير و بئز اونلارين ائچئنده اَرئيئب يوخ اولوروق؛ بله حالدا نجه ياشايا بئله‌رئک؟»

11اونلارا دِه: «وارليغيما آند اولسون، پئس آدامين اؤلوموندن کِف اتمئرم، اونون اؤز يولوندان دؤنوب ياشاماسيندان کِف ادئرم.» پروردئگار رب بويورور. «دؤنون، پئس يوللارينيزدان دؤنون. نه اوچون اؤله‌سئنئز، ای ائسرايئل نسلي؟»

12سن، ای بشر اوغلو، اؤز هموطنلرئنه دِه: «عوصيان اتدئيي حالدا، صالحئن صالحلئيي اونو خئلاص اتمَز. پئس آداما گلئنجه، اگر او اؤز پئسلئيئندن دؤنسه، بوندان اؤتري هلاک اولماز. صالح آدام گوناه اتدئيي حالدا، اؤز صالحلئيي ائله ياشايا بئلمز.

13صالح آداما ‹البتّه، ياشاياجاقسان› دِدئيئم زامان، اگر او اؤز صالحلئيئنه اعتئماد ادئب پئسلئک اتسه، صالح ائشلرئندن هچ بئري يادا سالينماياجاق؛ اتدئيي پئسلئيه گؤره اؤله‌جک.

14آمّا پئس آداما ‹البتّه، اؤله‌جکسن› دِدئيئم زامان، اگر گوناهيندان دؤنوب عدالتلي و صالح ائشلر گؤرسه-

15گئرووونو گری ورسه، سويغونچولوقلا آلديغيني گری قايتارسا، پئسلئک اتمه‌دن حيات ورئجي قايدالارا گؤره رفتار اتسه، البتّه، ياشاييب اؤلميه‌جک.

16بو آدامين اتدئيي گوناهلاردان هچ بئري اونون ضئدّئنه يادا سالينماياجاق. او عدالت و صالحلئکله عمل ادئب؛ البتّه، ياشاياجاق.»

17آمّا سنئن هموطنلرئن ديئرلر: «ربّئن يولو دوز ديئل.» حال بو کي، اونلارين اؤز يوللاري دوز ديئل.

18او زامان کي، صالح آدام اؤز صالحلئيئندن دؤنوب پئسلئک ادئر، بوندان اؤتري اؤله‌جک.

19لاکئن پئس آدام اؤز پئسلئيئندن دؤنوب عدالت و صالحلئکله عمل اتسه، بو عمللرله ياشاياجاق.

20آنجاق سئز حله ده ديئرسئنئز: «ربّئن يولو دوز ديئل.» سئزئن هر بئرئنئزي اؤز عملئنه گؤره موحاکئمه اده‌جيم، ای ائسرايئل نسلي!"

21اسئرلئيئمئزئن اون ائکئنجي ائلئنده، اونونجو آيين بِشئنجي گونو، اورشَلئمدن قاچيب قورتولموش بئر نفر گلئب منه ددي: "شهر آليندي."

22آخشام واختي، او قاچقين منئم يانيما گلمه‌مئشدن قاباق، ربّئن اَلي منئم اوستومده ائدي؛ سحر او آدامين يانيما گلدئيي واخت، رب دئلئمي آچدي؛ دئلئم آچيلدي، آرتيق دانيشا بئلئردئم.

23او واخت منه ربّئن بو سؤزو نازئل اولدو:

24"ای بشر اوغلو، ائسرايئلئن خارابا قالميش شهرلرئنده ياشايانلار بله ديئرلر: «ائبراهئم تک بئر آدام ائدي، آمّا گئنه ده اؤلکه‌يه مالئک اولدو؛ بئز ده مالئک اولا بئله‌رئک، بوندان علاوه، چوخوق دا.»

25بو سؤزلردن اؤتري اونلارا دِه کي، پروردئگار رب بله ديئر: «اَتي قاني ائله يِيئرسئنئز، قان تؤکَرکَن بوتلرئنئزه باخيرسينيز. بله اولدوغو حالدا اؤلکه‌ني مگر مولک آلا بئلرسئنئز؟

26سئز قيلينجينيزا بِل باغلاييرسينيز، ائيرنج ائشلر گؤرورسونوز، هر کس اؤز قونشوسونون آرواديني نجئس ادئر. بله اولدوغو حالدا اؤلکه‌ني مگر مولک آلا بئلرسئنئز؟»

27اونلارا دِه کي، پروردئگار رب بله ديئر: «وارليغيما آند اولسون کي، خارابا قالان شهرلرده ياشايانلار قطعن قيلينجلا هلاک اولاجاقلار. چؤلده قالانلاري وحشي حيوانلارا يِم اده‌جيم. قالالاردا و ماغارالاردا اولانلار دا وبادان اؤله‌جکلر.

28اؤلکه‌ني خارابا و ساکئنسئز قوياجاغام. کئبئرلَندئکلري قودرت هچ اولاجاق؛ ائسرايئل داغلاري ساکئنسئز قالاجاق، اورادان کئمسه کِچميه‌جک.

29اتدئکلري بوتون ائيرنج ائشلردن اؤتري، اؤلکه‌ني خارابا و ساکئنسئز قويدوغوم زامان، بئله‌جکلر کي، رب منم.

30سنه گلئنجه، ای بشر اوغلو، هموطنلرئن دووارلارين دئبئنده، اِولرئن قاپيسي قاباغيندا سنئن حاقّيندا دانيشيرلار. بئربئرلرئنه ديئرلر: ‹گلئن گِدَک، رب طرفئندن نازئل اولان سؤزه قولاق آساق.›

31خالق هر واخت اولدوغو کئمي سنئن يانينا گلئرلر. منئم خالقيم اولاراق قاباغيندا اوتورورلار، سؤزلرئنه قولاق آسيرلار، آمّا ددئکلرئمه عمل اتمئرلر. چونکي شهوتلي سؤزلر آغيزلاريندا ائکَن عمل ادئرلر، و اورَکلري حارام قازانج دالينجا گِدئر.

32باخ، سن اونلار اوچون گؤزل سَسله سِوگي نغمه‌لري اوخويان ياخشي بئر ساز چالان کئمي‌سن. سؤزلرئنه قولاق آسيرلار، آمّا اونلارا عمل اتمئرلر.

33بلجه بوتون بونلار دوغرو چيخاندا کي، قطعن ده دوغرو چيخاجاق، آرالاريندا بئر پيغمبر اولدوغونو باشا دوشه‌جکلر.»"

← Chapter 32 Chapter 34 →