Ezekiel 22

Azerbajani Bible (South) Used in Both Iran and Azerbaijan 2008

1منه ربّئن بو سؤزو نازئل اولدو:

2"سن، ای بشر اوغلو، آيا موحاکئمه اده‌جکسن، قان تؤکَن شهري موحاکئمه اده‌جکسن؟ اوندا بوتون ائيرنج ائشلرئني اونا بئلدئر.

3اونا دِه کي، پروردئگار رب بله ديئر: «اجلي گلمک اوچون اؤز ائچئنده قان تؤکَن، بوتلر دوزه‌لده‌رک اؤزونو موردارلايان شهر!

4سن تؤکدويون قانا گؤره تقصئرکار اولوبسان، دوزه‌لتدئيئن بوتلره گؤره نجئس اولوبسان. بلجه اجلئني ياخينلاشديريبسان، عؤمرون آخيرا چاتيب؛ بونا گؤره ده سني مئلّتلر ائچئنده روسوايچيليق، بوتون اؤلکه‌لر آراسيندا ائستِهزا هدفئنه چِوئرمئشم.

5ای آدي پئسلئيه چيخان، فئتنه دولو شهر، ياخين اولانلار دا، اوزاق اولانلار دا سني مسخره اده‌جکلر.

6باخ، سنئن ائچئنده اولان هر بئر ائسرايئل رهبري اَلئندن گلدئيي قدر قان تؤکوب.

7سنئن ائچئنده اونلار آتا-آنايا حؤرمت اتمه‌يئبلر، سنئن ائچئنده قرئب آداما قدّارليق، يِتئمه و دول آروادا حاقسيزليق ادئبلر.

8منئم موقدّس شيلرئمه خور باخيبسان و سَبّت گونلرئمه محل قويمايبسان.

9سنئن ائچئنده قان تؤکمک ائسته‌يَن بؤهتانچي آداملار اولوب. سنئن ائچئنده داغلاردا گتئرئلَن قورباندان يِيئبلر. سنئن ائچئنده شهوترانليغا قاپيليبلار.

10سنئن ائچئنده آتالارينين ناموسو ائله ياتيبلار؛ سنئن ائچئنده آيباشي عادتئنئن نجئسلئيئنده اولان آروادي زورلاييبلار.

11سنئن ائچئنده بئري قونشوسونون آروادي ائله ائيرنج ائش ادئب، بئري حَياسيزليقلا گلئنئني نجئس ادئب. بئري ده باجيسيني، اؤز آتاسينين قيزيني زورلاييب.

12سنئن ائچئنده قان تؤکمَک اوچون روشوت آليبلار؛ سَلَم و موعامئله ائله پول بورج ورئبسن، قدّارليقلا قونشولاريندان حاقسيز اوجرت آليبسان. و منی ياددان چيخارديبسان.» پروردئگار رب بله بويورور.

13«باخ، اَله گتئردئيئن حاقسيز اوجرتدن اؤتري و سنئن ائچئنده تؤکولَن قانا گؤره اَللرئمي بئربئرئنه چيرپيرام.

14سنئن ضئدّئنه قالخديغيم گون اوره‌يئنده مگر طاقت اولار، قوللاريندا مگر قووّت قالار؟ من رب بونو دِمئشم و اونو يرئنه يتئره‌جيم.

15سني مئلّتلر آراسينا ياياجاغام، اؤلکه‌لر آراسينا سَپه‌لَيه‌جيم، ائچئنده‌کي نجئسلئيي سندن محو اده‌جيم.

16مئلّتلرئن گؤزونده لَکه‌لَنه‌جکسن. او واخت بئله‌جکسن کي، رب منم.»"

17منه ربّئن بو سؤزو نازئل اولدو:

18"ای بشر اوغلو، منئم اوچون ائسرايئل نسلی چوروف کئمي اولوب؛ هاميسي کوره ائچئنده قالان بورونجه، قالايا، دمئره و قورغوشونا بَنزه‌يئر، گوموش چوروفو کئمئدئرلر.

19بونا گؤره ده پروردئگار رب بله ديئر: «ائندي کي هامينيز چوروف کئمي اولوبسونوز، باخين، من سئزي اورشَلئمئن اورتاسينا ييغاجاغام.

20گوموشو، بورونجو، دمئري، قورغوشونو و قالايي نجه کوره‌ده توپلاييرلار کي، اونلارا اود اوفوروب اَرئتسئنلر، من ده اِلَجه سئزي قضب و حئدّتئمله بئر يِره ييغاجاغام، سئزي شهره قويوب اَرئده‌جيم.

21سئزي ييغيب قضبئمئن اودونو اوستونوزه اوفوره‌جيم و سئز شهرئن ائچئنده اَرئيه‌جکسئنئز.

22کوره ائچئنده گوموش نجه اَرئدئلئر، سئز ده شهرئن ائچئنده اِلَجه اَرئيه‌جکسئنئز. او واخت بئله‌جکسئنئز کي، اوستونوزه قضبئمي تؤکَن من ربّم.»"

23منه ربّئن بو سؤزو نازئل اولدو:

24"ای بشر اوغلو، اونا دِه: «سن قضب گونونده تمئزلَنمه‌مئش، اوستونه ياغيش ياغماميش بئر تورپاقسان.

25اؤلکه‌نئن پيغمبرلري نَرئلده‌يَن، شئکاريني پارچالايان آصلان کئمي اورادا فئتنه قالديريبلار؛ جانلاري اودوبلار، خزئنه و قئيمتلي شيلر اَله کچئردئبلر، شهرده چوخلو آروادلاري دول قويوبلار.

26کاهئنلري منئم قانونومو پوزوبلار، موقدّس شيلرئمي نجئسله‌يئبلر؛ موقدّس شيي نجئس شيدن آييرماييبلار، نجئس شيله تمئز شي آراسينداکي فرقي اؤيرَتمه‌يئبلر. اونلار منئم سَبّت گونلرئمه گؤز يومورلار و منئم موقدّسلئيئم اونلارين آراسيندا نجئسله‌نئب.

27اؤلکه ائچئنده‌کي باشچيلاري، شئکاريني پارچالايان جاناوار کئمئدئرلر، حاقسيز اوجرتله اَله گتئرمک اوچون قان تؤکورلر، جانلار هلاک ادئرلر.

28پيغمبرلري ساختا رؤيالارلا، يالان فال آچاراق بو گوناهلارين اوستونه سوواق وورورلار. ديئرلر: ‹پروردئگار رب بله ديئر› حال بو کي، رب دانيشماييبدير.

29اؤلکه خالقي بئربئرئني قارت اده‌رک سويغونچولوقلا مشغولدور. اونلار مظلومو و مؤحتاجي ائنجئدئب، حاقسيز يِره قرئبه ظولم ادئبلر.

30اونلارين ائچئنده بئر آدام آختارديم کي، دوواري تعمئر اتسئن و منئم حوضورومدا اؤلکه‌نئن خاطئرئنه دووارداکي دَلئکده دايانسين، اِله کي، من اوراني يِرله بئر اتمه‌يئم؛ لاکئن بله آدام تاپماديم.

31بونا گؤره ده اوستلرئنه قضبئمي تؤکموشم؛ آغزيمين حئدّتي ائله اونلاري يانديريب محو اتمئشم. عمل‌لرئنئن عوضئني باشلارينا گتئرمئشم.» پروردئگار رب بله بويورور."

← Chapter 21 Chapter 23 →