Ezekiel 12

Azerbajani Bible (South) Used in Both Iran and Azerbaijan 2008

1منه ربّئن بو سؤزو نازئل اولدو:

2"ای بشر اوغلو، سن عاصي بئر خالقين آراسيندا ياشاييرسان. اونلارين گؤرمک اوچون گؤزلري وار، آمّا گؤرمورلر، اشئتمک اوچون قولاقلاري وار، آمّا اشئتمئرلر، چونکي اونلار عاصي بئر خالقدير.

3سنه گلئنجه، ای بشر اوغلو، سن اسئرلئيه گتمک اوچون شيلرئني حاضيرلا و اونلارين گؤزو قاباغيندا گوندوز چاغي کؤچ. اونلارين گؤزو قاباغيندا اسئرلئيه گِدن کئمي اؤز يِرئندن باشقا بئر يِره کؤچ ات. عاصي بئر خالق اولسالار دا، بلکه بونو باشا دوشدولر.

4اؤز شيلرئني اسئرلئيه گتمک اوچون لازيم اولان شيلر کئمي، اونلارين گؤزو قاباغيندا گوندوز چاغي چيخارت. اؤزون ده هامينين گؤزو قاباغيندا آخشام اوستو اسئرلئيه گتمه‌لي اولان بئري کئمي چيخ.

5اونلارين گؤزو قاباغيندا دوواردا دِشئک آچ و شيلرئني اورادان چيخارت.

6هامينين گؤزو قاباغيندا شيلرئني چئينئنده داشي و قارانليقدا چيخارت. اوزونو ده اؤرت کي، اؤلکه‌ني گؤرميه‌سن، چونکي سني ائسرايئل نسلئنه بئر علامت اتمئشم."

7منه نجه امر اولونموشدو، اِلَجه ده اتدئم. شيلرئمي اسئرلئيه گتمک اوچون لازيم اولان شيلر کئمي، گونون گوندوز چاغي چيخارتديم و آخشام اوستو دوواري اؤز اَللرئمله دِشدئم. شيلرئمي قارانليقدا چيخارتديم و اونلارين گؤزو قاباغيندا چئينئمده داشيديم.

8سحر منه ربّئن بو سؤزو نازئل اولدو:

9"ای بشر اوغلو، مگر ائسرايئل نسلي-او عاصي خالق سنه دِمه‌دي کي «نه ادئرسن؟»

10سن اونلارا دِه: پروردئگار رب بله ديئر: «بو ائخطار اورشَلئمده اولان رهبر و اورادا ياشايان بوتون ائسرايئل نسلی اوچوندور.»

11سن بله دِه: «من سئزئن اوچون علامتم. من نجه اتمئشم، اونلارا دا بله ادئله‌جک. اسئرلئيه و اسارته گده‌جکلر.

12آرالاريندا ياشايان رهبر شيلرئني قارانليقدا چئينئنده داشيياجاق و باييرا چيخاجاق. دوواري دِشه‌جکلر کي، اونو اورادان چيخارتسينلار. او، اوزونو اؤرته‌جک کي، اؤلکه‌ني گؤزلري ائله گؤرمه‌سئن.

13اونون اوستونه تور سَره‌جيم و منئم تله‌مه دوشه‌جک. اونو بابئله-کَلده اؤلکه‌سئنه گتئره‌جيم. آمّا گئنه ده اوراني گؤرميه‌جک، اورادا اؤله‌جک.

14اطرافينداکي‌لارين هاميسيني-کؤمکچئلرئني و بوتون قوشونلاريني، اَسن هر کوله‌يئن اَلئنه ورئب سَپه‌جيم و اونلارين داليسيجا قيلينج چکه‌جيم.

15من اونلاري مئلّتلر آراسينا ياياندا و اؤلکه‌لر آراسينا سَپه‌لَينده بئله‌جکلر کي، رب منم.

16آنجاق اونلاردان بئر آزيني قيلينجدان، آجليقدان و وبادان صاغ بوراخاجاغام کي، اؤز ائيرنج ائشلرئنئن هاميسيني، آرالارينا گده‌جکلري مئلّتلره دانيشسينلار. او واخت بئله‌جکلر کي، رب منم.»"

17منه ربّئن بو سؤزو نازئل اولدو:

18"ای بشر اوغلو، چؤره‌يئني تئتره‌يه‌رَک يِه، سويونو اَسه-اَسه، ائضطئرابلا ائچ.

19اؤلکه خالقينا دِه کي، ائسرايئل تورپاغيندا، اورشَلئمده ياشايانلار اوچون پروردئگار رب بله ديئر: «اونلار چؤرکلرئني ائضطئرابلا يئيه‌جکلر، سولاريني دهشتله ائچه‌جکلر. بلجه اؤلکه‌لري، اورادا ياشايانلارين هاميسينين قدّارليغيندان اؤتري بوللوقدان محروم اولاجاق.

20آدام ياشايان شهرلر وئران اولاجاق و اؤلکه خاراباليغا چِورئله‌جک. او واخت بئله‌جکسئنئز کي، رب منم.»"

21منه ربّئن بو سؤزو نازئل اولدو:

22"ای بشر اوغلو، ائسرايئل تورپاغيندا نه اوچون بو مثلي ائشله‌دئرسئنئز: «گونلر کچئر، هر رؤيا پوچ اولور»؟

23بونا گؤره ده اونلارا دِه کي، پروردئگار رب بله ديئر: «بو مثله آخير قوياجاغام، آرتيق ائسرايئلده بو مثلي ائشلَتميه‌جکلر. لاکئن اونلارا دِه کي، هر رؤيانين يرئنه يِته‌جيي گونلر ياخيندير.

24داها بوندان سونرا ائسرايئل نسلئنئن آراسيندا هچ بئر بوش رؤيا و آلداديجي فالچيليق اولماياجاق.

25چونکي رب منم؛ من سؤز دئيه‌جيم و نه سؤز دِسَم، يرئنه يِتئشه‌جک، آرتيق تأخئره دوشميه‌جک. لاکئن، ای عاصي خالق، بو سؤزو سئزئن گونلرئنئزده ديئه‌جيم و اونو يرئنه يتئره‌جيم.» پروردئگار رب بويورور."

26منه ربّئن بو سؤزو نازئل اولدو:

27"ای بشر اوغلو، ائسرايئل نسلی بله ديئر: «اونا گلن رؤيا اوزون مودّت سونرا باش وره‌جک، او، اوزاق گله‌جک باره‌ده نبئلئک ادئر.»

28بونا گؤره ده اونلارا دِه کي، پروردئگار رب بله ديئر: «هچ بئر سؤزومو تأخئره سالماياجاغام، دِدئيئم سؤز يرئنه يِتئشه‌جک.» پروردئگار رب بويورور."

← Chapter 11 Chapter 13 →