Ecclesiastes 7

Azerbajani Bible (South) Used in Both Iran and Azerbaijan 2008

1ياخشي آد عطئرلي ياغدان، اؤلوم گونو ده آدامين دوغوم گونوندن ياخشي‌دير.

2ياس اوئنه گتمک، ضئيافت اوئنه گتمکدن ياخشي‌دير، چونکي هر آدامين آخيري اؤلومدور؛ ياشايان هرکس گرک بونو ياديندا ساخلاسين.

3کَدَر گولمکدن ياخشي‌دير، چونکي اوزون قمگئن اولماسي اوره‌يي سِوئندئرَر.

4حئکمتلي آدامين اوره‌يي ياس اوئنده‌دئر، آمّا سَفِهئن اوره‌يي شادليق اوئنده.

5حئکمتلي آدامين مذمّتئني اشئتمک، سَفِهئن نغمه‌سئني اشئتمکدن ياخشي‌دير،

6چونکي سَفِهئن گولمه‌يي، قازان آلتيندا يانان تئکانين سَسي کئمي‌دئر. بو دا باطئلدئر.

7دوغرودان دا کي، ظولم حئکمتلي آدامي آخماغا دؤنده‌رَر، روشوت ده اوره‌يي فسادا چکر.

8بئر شيئن آخيري، اونون باشلانيشيندان ياخشي‌دير. روحوندا صبئرلي اولان آدام، روحوندا مغرور اولاندان ياخشي‌دير.

9روحوندا حئرصلَنميه تَلَسمه، چونکي قضب سَفِهلرئن قوجاغيندا اوتورور.

10دِمَه: "نه اوچون قاباقکي گونلر بو گونلردن ياخشي ائدي؟" چونکي بو حاقدا سوروشدوغون سوآل حئکمتلي ديئل.

11حئکمت، مئراث قدر ياخشي‌دير، گونشي گؤرَنلره فايدالي‌دير،

12چونکي نجه پول، آدامي کؤلگه‌سئنده حئفظ اِدَر، حئکمت ده آدامي اله حئفظ اِدَر. لاکئن معرئفتئن اوستونلويو بودور کي، حئکمت اونا صاحئب اولانا حيات وِرَر.

13تارينين ائشئنه بئر دئقّت ات؛ اونون اَيري اتدئيئني کئم دوز اده بئلر؟

14ياخشي گونلرده شادلي اول، آمّا يامان گونلرده دئقّت ات؛ يقئن کي، اونلارين هر ائکئسئني ده تاري تعيئن ادئب، اله کي، آدام اؤزوندن سونرا نه باش وره‌جيئنئ تاپا بئلمه‌سئن.

15بوتون بونلاري باطئل گونلرئمده گؤردوم: صالح بئر آدام وار کي، صالحلئيي ائچئنده هلاک اولور، پئس آدام دا وار کي، پئسلئيئنده عؤمرونو اوزادير.

16حددن آرتيق صالح اولما، حددن ده آرتيق حئکمتلي؛ نه اوچون اؤزونو هلاک اده‌سن؟

17حددن آرتيق شرور اولما، حددن ده آرتيق عاغيلسيز؛ نه اوچون اجلئن گلمه‌مئش اؤله‌سن؟

18ياخشي‌دير کي، بئرئني توتاسان، او بئرئندن ده اَلئني بوراخماياسان، چونکي تاريدان قورخان آدام هر ائفراطدان قاچار.

19حئکمت عاغيلّي آداما، شهرده اولان اون حؤکمداردان داها چوخ قووّت وِرَر.

20دوغرودان دا، ير اوزونده اله بئر صالح آدام يوخدور کي، ياخشيليق ادئب هچ گوناه اتمه‌سئن.

21بوندان علاوه، آداملارين ددئيي سؤزلري اوره‌يئنه آلما، اولماسين اِشئده‌سن کي، قولون سني سؤيور.

22چونکي سنئن اؤز اوره‌يئن ده ياخشي بئلئر کي، سن ده چوخ دفه اؤزگه آداملاري سؤيوبسن.

23بونلارين هاميسيني حئکمتله ثوبوت اتدئم. ددئم: "حئکمتلي اولاجاغام." آمّا بو مندن چوخ اوزاق ائدي.

24او کي، بو قدر اوزاق، چوخ دا درئندئر، کئم اونو تاپا بئلر؟

25اوره‌يئمي بونا قويدوم کي، حئکمتي و شيلرئن سببئني بئلئم، آختاريم و آراشديريم. سَفِهلئيئن پئسلئيئني ده بئلئم، حتّا عاغيلسيزليغي و دَلئلئيي ده بئلئم.

26اوره‌يي تله اولان، اوره‌يي تور اولان آروادي اؤلومدن ده آجي تاپديم، او آروادي کي، اَللري زنجئردئر. تاريني راضي ادن آدام اوندان قاچار، لاکئن گوناهکار آدام اونا توتولار.

27او واعئظ ديئر: "باخ، شيلرئن سببي تاپماق اوچون بئر-بئر حسابا قويوب تاپديغيم بودور-

28جانيم حله ده اونو آختارير، لاکئن تاپا بئلمئر: مئنده بئر کئشي تاپديم، آمّا اونلارين هاميسيندا بئر آرواد تاپماديم.

29باخ آنجاق بونو تاپديم کي، تاري ائنسانلاري دوز ياراتدي، آمّا اونلار چوخ فئتنه‌لر دالينجا گتدئلر.

← Chapter 6 Chapter 8 →