Ecclesiastes 12

Azerbajani Bible (South) Used in Both Iran and Azerbaijan 2008

1جاوانليق گونلرئنده سني ياراداني خاطيرلا؛ يامان گونلرئن گلمه‌يئندن قاباق، او ائللرئن يتئشدئيئندن قاباق کي، دئيه‌سن: "اونلاردان خوشوم گلمئر."

2او واختدا کي، گون و ائشيق، آي و اولدوزلار حله سؤنمه‌يئبلر، بولودلار دا ياغيشدان سونرا حله قاييتماييبلار.

3او گونده کي، اِوي ساخلايانلار اَسئرلر، پهلوانلار اَيئلئرلر، دَيئرمان دارتانلار آزالديقلاري اوچون ائشدن قاليرلار، پِنجره‌لردن باخانلار قاراليرلار،

4کوچه‌يه آچيلان قاپيلار باغلانيرلار، دَيئرمانلار سَسدن دوشورلر. او واختدا کي، آدام قوشون سَسئندن اويانير، و بوتون نغمه قيزلارينين سَسي آلچالير.

5حتّا او واختدا کي، اونلار اوجا يرلردن، يولون دهشتئندن قورخورلار. او واختدا کي، بادام آغاجي چئچکله‌نئر، چَيئرتکه اؤزونو گوجله چکئر، هوس ياتير. سونرا دا آدام اؤز ابدی اِوئنه گدئر، و ياس توتانلار کوچه‌لره دوشورلر.

6گوموش زنجئري قوپماميش، قيزيل کاسا قيريلماميش، بولاق باشيندا کوزه تئکه-تئکه اولماميش، قويو يانيندا چرخ سينماميش سني يارادان تاريني خاطيرلا.

7چونکي تورپاق گلدئيي يره قاييداجاق، روح دا اونو ورن تاريا دؤنه‌جکدئر.

8او واعئظ ديئر: "باشدان باشا باطئلدئر! هر شي باطئلدئر."

9بوندان علاوه، او واعئظ، حئکمتلي اولدوغو اوچون آداملارا معرئفت اؤيرَتمه‌يئنه داوام وردی. بلی، او دَيَرله‌دي، آختاردي و بئر چوخ مثل ترتئب اتدي.

10او واعئظ مقبول سؤزلري تاپماق اوچون تفتئش اتدي و اونون يازديقلاري دوزدور؛ حقئقتئن سؤزلري‌دئر.

11حئکمتلئلرئن سؤزلري بئز کئمي و عالئملرئن سؤزلري ده ياخشي چاخيلميش ميخلار کئمي‌دئر کي، بئر چوباندان ورئلئر.

12بونلاردان علاوه، اوغلوم دئقّتلي اول. چوخ کئتابلار يازماغا آخير يوخدور. چوخ موطالئعه ده بدني يورولدور.

13ائندي کي، هر شي اِشئدئلئب، مطلبئن آخيري بودور: تاريدان قورخ، و اونون امرلرئني ساخلا، چونکي ائنسانين بوتون وظئفه‌سي بودور.

14چونکي تاري هر ائشي، هر گئزلي شيي، ائستر ياخشي ائستر يامان، موحاکئمه‌يه چکه‌جکدئر.