Ecclesiastes 10

Azerbajani Bible (South) Used in Both Iran and Azerbaijan 2008

1اؤلو مئلچکلر عطّارين ياغيني قوخودوب خاراب اِدَر، بئر آز عاغيلسيزليق حئکمت و حؤرمت صاحئبئنه ده بله اِدَر.

2حئکمتلي آدامين اوره‌يي دوزلويه طرف يؤنه‌لر، لاکئن سَفِهئن اوره‌يي اَيرئلئيه.

3عاغيلسيز بئر آدام، حتّا گتدئيي يولدا دا عاغلي آزدير و هامييا عاغيلسيز اولدوغونو گؤرسدر.

4اگر حاکئمئن قضبي سنئن اوستونه قالخسا، يرئندن تَرپَنمه؛ چونکي ساکئتلئک، بؤيوک گوناهلارين اوستونو اؤرتَر.

5گون آلتيندا گؤردويوم بئر پئسلئک وار، او دا حؤکمدارين اَلئندن چيخان سهودئر:

6عاغيلسيز چوخ اوجا مقاملارا قويولور، حال بو کي، وارلي‌لار آشاغيدا اوتورورلار.

7گؤردوم کي، نجه قوللار آتلار اوستونده گدئرلر، و ريئسلر قول کئمي يرده يِرئيئرلر.

8قويو قازان اؤزو اونا دوشَر، دوواري سؤکَني ده ائلان سانجار.

9داش کَسَني داشلار يارالار، اودون ياراني دا، اودون خطره سالار.

10اگر بالتا کوت اولسا، اونون آغزيني دا ائتئلمَيه ورمسه‌لر، داها چوخ گوج صرف اولونمالي‌دير؛ لاکئن حئکمت آداما مووفّقئيّت گتئرر.

11اگر ائلان سِحر اولونماقدان قاباق سانجسا، او زامان سِحربازدان دا فايدا يوخ.

12حئکمتلي آدامين آغزينين سؤزلري فيضلي‌دئر، لاکئن سَفِهئن دوداقلاري اونون هلاکينا يول آچار؛

13آغزينين سؤزلري عاغيلسيزليقلا باشلانار، سؤزلرئنئن آخيري دا يامان دَلئلئکدئر.

14عاغيلسيز آدام سؤزو چوخالدار. نه اولاجاغيني هچ کس بئلمز؛ اوندان سونرا نه اولاجاغيني اونا کئم دئيه بئلر؟

15سَفِهلرئن چکدئيي زحمت اونلارين اؤزلرئني يورار، اونلار شهره نجه گده‌جکلرئني ده بئلمزلر.

16واي سنه ای مملکت، اگر پادشاهين بئر اوشاقدير، و ريئسلرئن سحر اِرکَن ضئيافته باشلاييرلار.

17خوش حالينا ای مملکت، اگر پادشاهين بئر نجئبزاده‌دئر، و ريئسلرئن واختيندا، کِفلَنمک اوچون يوخ، قووّت اوچون يِيئرلر.

18تنبل‌لئکدن اِوئن دامي ييخيلار، اَللرئن تنبلئيئندن ده اِو دامار.

19شادليق اوچون ضئيافت وِرَرلر و شراب حياتي کِفله دولدورار؛ آمّا هر شيه جاواب اولان پولدور.

20پادشاهي حتّا فئکرئنده ده سؤيمه؛ وارلي آدامي حتّا ياتاق اوتاغيندا دا سؤيمه؛ چونکي گؤيون بئر قوشو سنئن سَسئني آپارار، و گؤيده اوچان قوشلارين بئري مطلبي خبر وِرَر.

← Chapter 9 Chapter 11 →