Deuteronomy 6

Azerbajani Bible (South) Used in Both Iran and Azerbaijan 2008

1بودور او امر، قايدالار، و حؤکملر کي، تارينيز رب سئزه اؤيرَتمَک اوچون منه بويورموشدو. اونا گؤره ده مالئک اولماق اوچون گده‌جيئنئز تورپاقدا بونلارا عمل ادئن.

2اِله کي، سئز، اؤولادلارينيز، و نوه‌لرئنئز عؤمور بويو تارينيز ربدن قورخاسينيز و اونون سئزه ددئيئم بوتون قايدالار و حؤکملرئني ساخلاياسينيز و عؤمرونوز اوزون اولسون.

3اشئت، ای ائسرايئل! بونلارا دئقّتله عمل ات کي، آتالارينين تاريسي ربّئن سنه وعده وردئيي کئمي، سود و بال آخان تورپاقدا حياتين خوش کچسئن و چوخاليب آرتاسان.

4اشئت، ای ائسرايئل! تاريميز رب يگانه ربدئر.

5تارين ربّي بوتون اوره‌يئنله، بوتون جانينلا، و بوتون وار گوجونله سِو.

6بو گون سنه امر اتدئيئم بو سؤزلر اوره‌يئنده کؤک سالسين.

7بونلاري سعي‌له اؤولادلارينا اؤيرت. اِوئنده اوتوراندا، يول گدنده، ياتاندا، دوراندا بونلار باره‌ده دانيش.

8اونلاري يازيب قولونا بئر نئشان کئمي، گؤزلرئنئن آراسينا دا آلين باغي کئمي باغلا،

9اِولرئنئن قاپي چَرچئوه‌لرئنه و دروازالارينا ياز.

10او واخت تارين رب سني آتالارينا، يعني ائبراهئمه، ائسحاقا، و يعقوبا ائچدئيي آندا گؤره، وره‌جيي تورپاغا آپاراجاق؛ اورادا سنه بئنا اتمه‌دئيئن بؤيوک و گؤزل شهرلر وره‌جک،

11ييغماديغين گؤزل شيلرله دولو اِولر، زحمتئني چکمه‌دئيئن قازيلميش سو آنبارلاري، سالماديغين اوزوملوکلر و زيتونلوقلار وره‌جک، و سن يِيئب دوياجاقسان.

12او زامان دئقّتلي اول کي، سني مئصئر تورپاغيندان، نؤکرچئلئک دئياريندان چيخاردان ربّي ياددان چيخارتماياسان.

13آنجاق تارين ربدن قورخ و اونو پرستئش ادئب، آندلاريني اونون آديندا ائچ.

14ياد آللاهلارين يعني سنئن اطرافيني توتان آيري خالقلارين آللاهلاري دالينجا گتمه،

15چونکي آرانيزدا اولان تارين رب قيرتلي بئر تاري‌دير؛ مبادا تارين ربّئن قضبي سنئن ضئدّئنه آلوولانسين و سني ير اوزوندن محو اتسئن.

16تارينيز ربّي مَسّادا ائمتاحان اتدئيئنئز کئمي ائمتاحان اتمه‌يئن.

17تارينيز ربّئن سئزه وردئيي امرلره، شهادتلرئنه و قايدالارا سعي‌له عمل ادئن.

18ربّئن گؤزونده دوز و ياخشي ساييلانا عمل ادئن کي، حياتينيز خوش کچسئن و گدئب ربّئن آتالارينيزا ورمه‌سئني آند ائچدئيي ياخشي تورپاغا مالئک اولاسينيز.

19رب ده وعده وردئيي کئمي بوتون دوشمنلري قاباغينيزدان قوواجاق.

20اگر گله‌جکده اؤولادينيز سئزه گلئب سوروشالار: «تاريميز ربّئن سئزه وردئيي شهادتلردن، قايدالار و حؤکملردن آماج ندئر؟»

21اونا بله ديئن: «بئز مئصئرده فئرعونون نؤکري ائدئک. رب بئزي اورادان قووّتلي اَلي ائله چيخارتدي.

22بوندان علاوه، رب گؤزلرئمئزئن قاباغيندا، مئصئرئن، فئرعونون و اونون بوتون عايئله‌سئنئن ضئدّئنه بؤيوک و دهشتلي علامتلر و مؤجوزه‌لر گؤرستدي.

23او بئزي مئصئردن چيخارتدي کي، آتالاريميزا ورمه‌سئني آند ائچدئيي بو تورپاغا گتئرسئن و اوراني بئزه ورسئن.

24بلجه رب بوتون بو قايدالارا عمل اتمه‌يي، اؤز خيئرئمئز و صاغ قالماغيميز اوچون تاريميز ربدن قورخماغي بئزه امر اتدي، نجه کي، بو گون گؤرورسونوز.

25اگر تاريميز ربّئن حوضوروندا بئزه بويوردوغو بوتون بو امرلره دئقّتله عمل اِتسَک، بونو بئزه صالحلئک ساياجاق.»

← Chapter 5 Chapter 7 →