Deuteronomy 11

Azerbajani Bible (South) Used in Both Iran and Azerbaijan 2008

1تارينيز ربّي سِوئن. همئشه اونون بويوردوقلارينا، قايدالارينا، حؤکملرئنه، و امرلرئنه عمل ادئن.

2بو گون بئلئن کي، سئزئن بئلمه‌يَن و تارينيز ربّئن تَنبِهئني گؤرمه‌يَن اؤولادلارينيزلا دانيشميرام، سئزئنله دانيشيرام. اونون عظمتئني، قودرتلي الئني، و اوزانان قولونو گؤروبسونوز.

3مئصئرده، مئصئر پادشاهي فئرعونا و بوتون اؤلکه‌سئنه اتدئيي علامتلري، اتدئيي ائشلري گؤروبسونوز.

4گؤروبسونوز کي، رب مئصئر قوشونونا، اونلارين آتلارينا، دؤيوش عارابالارينا نه اتدي؛ نجه اونلاري، دالينيزجا دوشَرکَن، قيرميزي دهنزئن سولاريندا قرق اتدي. نجه اونلاري بوسبوتون محو اتدي.

5گؤروبسونوز کي، صحرادا، بو يره چاتاناجاق سئزئن اوچون نه ادئب.

6گؤردونوز کي، رِعوبئنلي اِلئيابين اوغوللارينا يعني داتانا و اَبئراما نه اتدي؛ بوتون ائسرايئللی‌لرئن آراسيندا يري ياردي، اونلاري و اِو اهلئني چاديرلار و اونلارا عاييد اولان بوتون جانلي‌لاري ائله برابر اودّو.

7گؤزلرئنئز ربّئن اتدئيي بو عظمتلي ائشلرئن هاميسيني گؤروب.

8بو گون سئزه بويوردوغوم امرلرئن هاميسينا عمل ادئن کي، قووّتلي اولاسينيز و مالئک اولماغينيز اوچون اوردون چاييني کچه‌جيئنئز تورپاغا گئرئب اورايا مالئک اولاسينيز.

9ربّئن آتالارينيزا و اونلارين اؤولادلارينا وره‌جه‌يئني آند ائچدئيي تورپاقدا اوزون عؤمور سوره‌سئنئز؛ سود و بال آخان تورپاقدا.

10چونکي مالئک اولماق اوچون گئره‌جيئنئز تورپاق، چيخميش اولدوغونوز مئصئر اؤلکه‌سئنه بنزه‌مئر. اورادا توخوموزونو اَکئردئنئز، بوستان کئمي آياغيزلا سولاييردينيز.

11آمّا مالئک اولماق اوچون گده‌جيئنئز تورپاق داغلي-دره‌لي بئر دئياردير. بو تورپاق گؤيون ياغيش سويونو ائچئر.

12اورا تارينيز ربّئن لوطف گؤرستدئيي اله بئر تورپاقدير کي، ائلئن اوّلئندن آخيرينا قدر تارينيز ربّئن نظري آلتيندادير.

13رب ديئر: "اگر بو گون سئزه بويوردوغوم امرلره ياخشي قولاق آساسينيز، تارينيز ربّي سِوئب، بوتون اوره‌يئنئزله و بوتون جانينيزلا اونا خئدمت اده‌سئنئز،

14او زامان تورپاغينيزا ياغيشي يعني ياز ياغيشلا پاييز ياغيشي واختلي-واختيندا وره‌جيم. او واخت تاخيلينيزي، تزه شرابينيزي و زيتون ياغينيزي ييغاجاقسينيز.

15زَمئلرئنئزده حيوانلارينيزا اوت وره‌جيم. سئز دويونجا يئيه‌جکسئنئز."

16آييق اولون مبادا اوره‌يئنئز آلدانسين. آزمايين، آيري آللاهلارا قوللوق ادئب، اونلارا پرستئش اتمه‌يئن.

17يوخسا ربّئن قضبي سئزئن ضئدّئنئزه آلوولانار. او، گؤيلري باغلاييب ياغيش ياغديرماز، تورپاق محصولونو ورمز و تِزلئکله ربّئن سئزه وردئيي او ياخشي تورپاقدان محو اولارسينيز.

18بونا گؤره ده منئم بو سؤزلرئمي اوره‌يئنئزده و جانينيزدا ساخلايين؛ اَلئنئزه بئر نئشان کئمي، گؤزلرئنئزئن آراسينا آلين باغي کئمي باغلايين.

19اونلاري اؤولادلارينيزا اؤيره‌دئن. اِوئنئزده اوتوراندا، يولدا گِدنده، ياتاندا، دوراندا بونلار باره‌ده دانيشين.

20اونلاري اِولرئنئزئن قاپي چَرچئوه‌لرئنه، شهرلرئنئزئن دروازالارينا يازين.

21بله اده‌سئنئز، ربّئن آتالارينيزا وره‌جه‌يئني آند ائچدئيي تورپاقلاردا سئزئن ده، اؤولادلارينيزين دا عؤمرو اوزون اولار و گؤي يِر اوستونده دوردوقجا اورادا ياشايارسينيز.

22اگر عمل اتمه‌يئنئز اوچون سئزه بويوردوغوم بوتون بو امري دئقّتله يرئنه يتئره‌سئنئز، تارينيز ربّي سِوئب اونون بوتون يوللاري ائله گده‌سئنئز و فقط اونا باغلي قالاسينيز،

23اوندا رب قاباغينيزدان بوتون بو مئلّتلري قوواجاق و سئزدن داها بؤيوک، داها گوجلو مئلّتلرئن تورپاقلارينا مالئک اولاجاقسينيز.

24آياق باساجاغينيز هر ير سئزئن اولاجاق؛ سرحدئنئز صحرادان لوبنانا، فَرات چاييندان قرب دهنزئنه قدر اوزاناجاق.

25سئزئن قاباغينيزدا هچ کئم دايانا بئلميه‌جک؛ تارينيز رب، سئزه وعده وردئيي کئمي، آياق باساجاغينيز هر يره واهئمه و قورخونوزو ياياجاق.

26باخ، بو گون قاباغينيزا برکت و لعنت قويورام.

27تارينيز ربّئن امرلرئنه، بو گون سئزه بويوردوغوم امرلره قولاق آساسينيز، برکت تاپاجاقسينيز.

28اگر تارينيز ربّئن امرلرئني اشئتمَيه‌سئنئز، تانيماديغينيز آيري آللاهلارين دالينجا گده‌رک، بو گون سئزه امر اتدئيئم يولدان آزاسينيز، لعنته دوچار اولاجاقسينيز.

29تارينيز رب مالئک اولماق اوچون گئره‌جيئنئز تورپاغا سئزي آپاراندا، گِرئزئم داغيندا برکت، عِيبال داغيندا دا لعنت قوياجاقسينيز.

30مگر بو ائکي داغ اوردون چايينين او بئري تاييندا، يولون شرقئنده يعني عَرابادا ياشايان کَنَعانليلار اؤلکه‌سئنده، گئلگال موقابئلئنده، مورِه پاليدلارينين يانيندا ديئل؟

31تارينيز ربّئن سئزه وره‌جيي تورپاغا مالئک اولماق اوچون اوردون چاييني عنقرئب کچه‌جکسئنئز. اوراني اَله کچئردئب اورادا يِرلَشَنده

32دئقّتلي اولون کي، بو گون قاباغينيزا قويدوغوم بوتون قايدالار و حؤکملري يرئنه يتئره‌سئنئز.

← Chapter 10 Chapter 12 →