Daniel 5

Azerbajani Bible (South) Used in Both Iran and Azerbaijan 2008

1پادشاه بَلشَصّر مئن نفر اعياني اوچون بؤيوک بئر ضئيافت قوردو و اونلارلا شراب ائچدي.

2بَلشَصّر شراب ائچه‌رکَن امر اتدي کي، آتاسي نِبوکَدنِصّرئن اورشَلئمده‌کي معبددن چيخارتديغي قيزيل و گوموش قابلاري گتئرسئنلر و پادشاه، اعيانلاري، آروادلاري و جارئيه‌لري اونلارلا شراب ائچسئنلر.

3او واخت معبددن-تارينين اورشَلئمده اولان اِوئندن چيخاريلميش قيزيل قابلار گتئرئلدي. پادشاه، اعيانلاري، آروادلاري و جارئيه‌لري بونلارلا شراب ائچمه‌يه باشلاديلار.

4اونلار شراب ائچه‌رَک قيزيل، گوموش، بورونج، دمئر، آغاج و داش آللاهلارا حمد اتدئلر.

5اِله بو آن بئر ائنسان اَلئنئن بارماقلاري گؤروندو و شامدانين يانيندا پادشاه سارايينين دووارينين سوواغي اوستونه يازي يازدي. پادشاه يازان اَلي گؤردو.

6او واخت پادشاهين رنگي سولدو و دوشونجه‌لري اونو واهئمه‌يه سالدي. بِلئنئن عَضَله‌لري ضعئفله‌دي و دئزلري بئربئرئنه دَيميه باشلادي.

7پادشاه اوجادان قيشقيردي کي، اووسونچولاري، مونجّئملري و فالچيلاري گتئرسئنلر. بابئلئن حئکمتلی‌لرئنه بله ددي: "کئم بو يازيلاني منه اوخويوب معناسيني تشرئح اتسه، اونا ارغواني لئباس گِيئندئرئله‌جک، بوينونا قيزيل زنجئر آسيلاجاق و پادشاهليقدا اوچونجو آدام اولاجاق."

8پادشاهين بوتون حئکمتلی‌لري ائچه‌ري گئردئلر، لاکئن يازيلاني نه اوخويا، نه ده معناسيني پادشاها تشرئح اده بئلدئلر.

9او واخت پادشاه بَلشَصّر داها چوخ واهئمه‌يه دوشدو و رنگي سولدو، اعيانلاري دا حيرته دوشدولر.

10ملکه پادشاهين و اعيانلارينين سؤزلرئني اشئدئب ضئيافت اوتاغينا گلدي. ملکه بله ددي: "قوي پادشاه همئشه صاغ اولسون، فئکئرلرئن سني واهئمه‌يه سالماسين، رنگئن ده سولماسين.

11سنئن پادشاهليغيندا موقدّس آللاهلارين روحونا مالئک اولان بئر آدام وار. سنئن آتانين دؤورونده او ائشيق، فهم و حئکمت آللاهلارين حئکمتي کئمي اوندا وار ائدي. آتان پادشاه نِبوکَدنِصّرئن اؤزو، اونو سحربازلارين، اووسونچولارين، مونجّئملرئن و فالچيلارين باشچيسي قويموشدو.

12چونکي پادشاهين بِلطِشَصّر آدلانديرديغي بو آدام يعني دانيال خارئقولعاده بئر روحا، معرئفته، و بصئرته صاحئبدئر، يوخولاري تعبئر اتمه‌يه، موعمّالاري آچماغا و چتئنلئکلري حلّ اتمه‌يه ده قابئلئيّتي وار. ائندي قوي دانيالي چاغيرسينلار، او سنه بونون معناسيني تشرئح اده‌جک."

13او واخت دانيالي پادشاهين حوضورونا گتئردئلر و پادشاه اوندان سوروشدو: "آتام پادشاهين يهودادان اسئر ادئب گتئردئيي يهودالي‌لاردان اولان دانيال آيا سنسن؟

14من سنئن حاقّيندا اِشئتمئشم کي، سنده آللاهلارين روحو وار، ائشيق، فهم و بؤيوک حئکمت صاحئبي‌سن.

15باخ، حوضوروما حئکمتلی‌لر و اووسونچولار گتئرئلدي کي، بو يازيلاني اوخويوب معناسيني منه آچسينلار، لاکئن اونلار بونو منه تشرئح اده بئلمه‌دئلر.

16لاکئن سنئن حاقّيندا اِشئتمئشم کي، تعبئر ادئب چتئنلئکلري حلّ اده بئلئرسن. اگر ائندي بو يازيلاني اوخويوب معناسيني تشرئح اده بئله‌سن، سنه ارغواني لئباس گِيئندئرئله‌جک، بوينونا قيزيل زنجئر آسيلاجاق و پادشاهليقدا اوچونجو آدام اولاجاقسان."

17او واخت دانيال پادشاها جاواب وردی: "قوي هدئيّه‌لرئن اؤزونه قالسين، پاداشيني دا آيريسينا ور. آمّا يازيلاني من پادشاها اوخويوب معناسيني تشرئح اده‌جيم.

18ای پادشاه! اوجالاردا اولان تاري سنئن آتان نِبوکَدنِصّره پادشاهليق، عظمت، عئزّت و جاه-جلال ورمئشدي.

19تارينين اونا وردئيي عظمته گؤره بوتون خالقلارين، مئلّتلرئن و دئل‌لرئن آداملاري اوندان قورخوب اسئردئلر. او ائسته‌دئيي آدامي اؤلدورَردي، ائسته‌دئيي آدامي صاغ بوراخاردي، ائسته‌دئيي آدامي اوجالداردي، ائسته‌دئيي آدامي آلچالداردي.

20آمّا او زامان کی، اوره‌يي کئبئرله‌نئب روحو کئبئرله عئنادکار اولدو، پادشاهليق تختئندن ساليندي و عئزّتي اَلئندن آليندي.

21او، ائنسانلار آراسيندان قووولدو، آغلي حيوان آغلينا چِورئلدي و وحشي اِششَکلرله ياشاماغا باشلادي. اونا اؤکوز کئمي اوت يِدئرئردئلر، بدني گؤيلرئن شِحي ائله ائسلانيردي. او قدر کي، نهايت، درک اتدي کي، اوجالاردا اولان تاري ائنسان پادشاهليقلاري اوستونده حؤکمرانليق ادئر و کئمي ائسته‌يئر، اونلارا باشچي قويور.

22و اونون اؤولادي سن ای بَلشَصّر، بوتون بونلاري بئلدئيئن حالدا، گئنه اؤزونو آلچاتمادين،

23عکسئنه، گؤيلرئن پروردئگارينين ضئدّئنه کئبئرلَندئن. اونون معبدئنئن قابلاريني سنئن حوضورونا گتئردئلر و سن، اعيانلارين، آروادلارين، جارئيه‌لرئن بونلارلا شراب ائچدئنئز. سن قيزيل-گوموش، بورونج، دمئر، آغاج و داشدان اولان آللاهلارا کي، نه گؤرورلر، نه اِشئدئرلر، نه ده آنلاييرلار، حمد اتدئن. لاکئن او تاريني کي، نفسئن اونون اَلئنده‌دئر و بوتون طرئقلرئن اونوندور، عئزّتلَندئرمه‌دئن.

24بونا گؤره ده اونون طرفئندن بئر اَل گؤنده‌رئلئب بو سؤزلري يازدي.

25يازيلان سؤزلر بودور: مِنا، مِنا، تِقِل و پَرسئن.

26سؤزلرئن معناسي آمّا بودور: مِنا-تاري سنئن پادشاهليق مودّتئني حسابلاييب و اونا آخير قويوب؛

27تِقِل-سن تَره‌زئده چکئلئبسن و يونگول اولدوغون بئلئنئب؛

28پَرسئن-سنئن پادشاهليغينين بؤلونه‌رک مادلي‌لارا و فارسلارا ورئلئب."

29او واخت بَلشَصّرئن امري ائله دانيالا ارغواني لئباس گِيئندئردئلر، بوينونا قيزيل زنجئر آسديلار و او، پادشاهليقدا اوچونجو آدام اعلان اولوندو.

30همئن گجه بابئل پادشاهي بَلشَصّر اؤلدورولدو.

31آلتميش ائکي ياشلاردا اولان مادلي داريوش حاکئمئيّتي اَلئنه آلدي.

← Chapter 4 Chapter 6 →