2 Samuel 9

Azerbajani Bible (South) Used in Both Iran and Azerbaijan 2008

1داوود ددي: "آيا شاعولون نسلئندن صاغ قالان بئري وار کي، يوناتانين خاطئرئنه اونا ياخشيليق ادئم؟"

2شاعولون نسلئنده صئبا آدلي خئدمتچي بئر کئشي وار ائدي. اونو داوودون يانينا چاغيرديلار و پادشاه اونا ددي: "آيا صئبا سنسن؟" او ددي: "قولونام."

3داوود ددي: "شاعولون نسلئندن آيا هچ بئر آدام قالماييب کي، اونا تارينين شفقتئني گؤرسدئم؟" صئبا پادشاها ددي: "يوناتانين ائکي آياغيندان شئکَست بئر اوغلو حله قالير."

4پادشاه اونا ددي: "هارادادير؟" صئبا پادشاها ددي: "باخ، ائندي او، لودِباردا عَمّي‌اِل اوغلو ماکئرئن اِوئنده‌دئر."

5داوود پادشاه آدام گؤندرئب لودِباردان عَمّي‌اِل اوغلو ماکئرئن اِوئندن مِفئبوشِتي گتئرتدي.

6شاعول اوغلو يوناتان اوغلو مِفئبوشِت داوودون يانينا گلدي و اوزو اوسته يره دوشوب تعظئم اتدي. داوود ددي: "مِفئبوشِت!" او دا ددي: "قولون سنئن حوضوروندادير."

7داوود اونا ددي: "قورخما، آتان يوناتانين خاطئرئنه قطعن سنه شفقت گؤرسده‌جيم و بابان شاعولون بوتون تورپاغيني سنه قايتاراجاغام. سن همئشه منئم سوفره‌مده يمک يئيه‌جکسن."

8مِفئبوشِت گئنه تعظئم ادئب ددي: "مگر بو قولون کئمدئر کي، منئم کئمي اؤلو بئر ائته بله ائلتئفات اده‌سن؟"

9پادشاه، شاعولون خئدمتچئسي صئباني چاغيريب ددي: "شاعولا و اونون نسلئنه عاييد اولان هر شيي سنئن آغانين نوه‌سئنه ورمئشم.

10آغانيزين نوه‌سئنئن تورپاغيني سن، اوغوللارين و قوللارين بِجَره‌جک. محصولونو اونا وره‌جکسئنئز کي، آذوقه‌سي اولسون. آغانيزين نوه‌سي مِفئبوشِت ده همئشه منئم سوفره‌مده يمک يئيه‌جک." صئبانين اون بش اوغلو و ائيئرمي قولو وار ائدي.

11صئبا پادشاها ددي: "من آغام پادشاهين بو قولونا امر اتدئيي هر شيي يرئنه يتئره‌جيم." بلجه، مِفئبوشِت پادشاه اوغوللاريندان بئري کئمي داوودون سوفره‌سئنده يمک يِيئردي.

12مِفئبوشِتئن کئچئک بئر اوغلو وار ائدي. اونون آدي مئکا ائدي. صئبانين اِوئنده ياشايانلارين هاميسي مِفئبوشِتئن خئدمتچئلري ائدئلر.

13بلجه مِفئبوشِت اورشلئمده قالدي، چونکي همئشه پادشاهين سوفره‌سئنده يمک يِيئردي. او، ائکي آياغيندان شئکَست ائدي.

← Chapter 8 Chapter 10 →