2 Samuel 22 — Azerbajani Bible (South) Used in Both Iran and Azerbaijan 2008

1رب داوودو بوتون دوشمنلرئنئن و شاعولون اَلئندن قورتاراندا، داوود بو نغمه‌نئن سؤزلرئني ربّه ددی؛

2او بله اوخودو: "منئم قايام، منئم قالام، منئم قورتاريجيم ربدئر.

3تاريم قايامدير، اونا پناه آپاريرام، اودور قالخانيم، گوجلو خئلاصکاريم، بورجوم، سيغيناجاق يِرئم. خئلاصکاريم؛ سن منی قدّارليق اَلئندن قورتاريرسان!

4حمدلره لايئق اولان ربّی چاغيريرام، دوشمنلرئمدن خئلاص اولورام.

5اؤلوم شپه‌لري اطرافيما دولاشدي، هلاکت سل‌لري منی قورخوتدو.

6اؤلولر دئيارينين ائپلري اطرافيما ساريلدي، اؤلوم تله‌لري قاباغيما چيخدي.

7سيخينتيم ائچئنده ربّی چاغيرديم، تاريما يالوارديم. او، معبدئندن سَسئمي اشئتدي، کؤمک ائسته‌ين فرياديم اونون قولاغينا يتئشدي.

8او زامان ير لرزه‌يه دوشدو، تئتره‌دي، گؤيلر پايالاريندان اسئردئلر، تئتره‌يئردئلر، چونکي او قضبلَنمئشدي.

9اونون بورنوندان دومان قالخدي، آغزيندان يانديريب ياخان اود چيخدي، کؤز کؤمورلر اوندان توتوشدولار.

10رب، گؤيلري ياريب اِندي. قارا بولودلار اونون آياقلاري آلتيندا ائدئلر.

11رب کَرّوبا مئنئب اوچدو، يِل قانادلاري اوستونده گؤروندو.

12اطرافيني ظولمته بورودو، سولارين ييغينيني، گؤيون قارا بولودلاريني.

13اونون پاريلدايان حوضوروندان اودلو کؤزلر دوشوب آلوولاندي.

14رب گؤيدن گورلادي، اوجالاردا اولانين سَسي سَسلَندي.

15اوخلاريني آتيب اونلاري داغيتدي، شئمشه‌يئني چاخديريب اونلاري سَرسَم اتدي.

16ربّئن تَنبِهئندن، بورنونون نفسئنئن ووروشوندان، دهنزلرئن دئبي گؤروندو، دونيانين بونؤوره‌لري آچيلدي.

17رب اوجالاردان اَلئني اوزاديب منی توتدو، منی او درئن سولاردان چيخارتدي.

18قودرتلي دوشمنئمدن منی قورتاردي؛ مندن نئفرت ادنلردن کي، اونلارا گوجوم چاتميردي.

19بلالي گونومده ضئدّئمه قالخديلار، لاکئن رب منه داياق اولدو.

20منی گِنئشلئيه چيخارديب قورتاردي، چونکي مندن خوشلاندي.

21رب صالحلئيئمه گؤره اجرئمي ورئب، اَل‌لرئمئن پاکليغينين موطابئقئنده منه عوض ورئب.

22چونکي ربّئن يوللاريني توتموشام، تاريما عوصيان اتمه‌مئشم.

23اونون هامي حؤکملرئني قاباغيما قويموشام، اونون امرلرئنئن ائطاعتئندن چيخماميشام.

24اونون گؤزونون قاباغيندا کاماللا ياشاميشام، اؤزومو تقصئردن ساخلاميشام.

25رب صالحلئيئمه گؤره، گؤزونون قاباغيندا تمئزلئيئمئن موطابئقئنده منه عوض ورئب.

26سنه وفالي قالانا، اؤزونو وفالي گؤرسدئرسن، کاماللا ياشايان آداما، اؤزونو کامئل گؤرسدئرسن.

27پاک آداما اؤزونو پاک گؤرسدئرسن، لاکئن اَيري آدامين قاباغيني آليرسان.

28فاغير آداملارا نئجات ورئرسن، لووغالارا گؤز قويورسان، اونلاري آلچالديرسان.

29يارب، سن منئم چيراغيمسان، قارانليغيمي ائشيغا دؤنده‌رن، رب تاريمدير.

30سنئنله بئر قوشونو اَزه‌رم، تاريملا دووار اوستوندن اوچارام.

31تارينين يولو کامئلدئر، ربّئن سؤزو خالئصدئر، رب اونا پناه گتئرن هرکسه قالخاندير.

32ربدن باشقا تاري کئمدئر؟ بئزئم تاريدان ساوايي قايا کئمدئر؟

33تاري قالامدير، منئم يولومو او، کامئل ادئر.

34آياقلاريمي مارال آياقلاري کئمي ادئر، اوجا يرلرده منی برک دوردورور.

35اَللرئمه دؤيوشمک اوچون تعلئم ورئر، قوللاريم بورونج کاماني دا اَيئر.

36سن منه نئجاتينين قالخانيني ورئبسن، عئنايتئن منی بؤيوک ادئب.

37آتديغيم قدملرئن يرئني گِنئشلَتدئن کي، آياقلاريم سوروشمه‌سئن.

38دوشمنلرئمي قووالاديم، اونلاري قيرديم، اونلار محو اولاناجاق، گری قاييتماديم.

39اونلاري اَزئب قورتارديم، اله کي، قالخا بئلمه‌دئلر، اونلار آياقلاريمين آلتينا دوشدولر.

40موحارئبه اوچون منی قووّته سئلاحلانديران سنسن؛ منه ضئدّ اولانلاري آياغيمين آلتينا سالدين،

41دوشمنلرئمئن آرخاسيني منه دؤنده‌ردئن، مندن نئفرت ادنلري محو اتدئم.

42کؤمک اوچون باغيرديلار، لاکئن اونلارين دادينا يِتئشَن هچ کس يوخ ائدي، ربّی چاغيرديلار، لاکئن اونلارا جاواب ورمه‌دي.

43سونرا اونلاري يرده‌کي توز کئمي داغيتديم، کوچه‌لرئن پالچيغي کئمي تاپدالاديم.

44خالقيمين چکئشمه‌سئندن منی قورتاريبسان، مئلّتلره منی ريئس قويوبسان، اله کي، تانيماديغيم خالق دا منه قوللوق ادئر.

45ياداِلّي‌لر منه بويون اَيئرلر. سَسئمي اشئدنده مندن ائطاعت ادئرلر.

46اورکلري اوزولور، قالالاريندان تئتره‌يه-تئتره‌يه اشئيه چيخيرلار.

47رب دئري‌دئر، منئم قاياما حمد اولسون! قورتولوش قايام، منئم تاريم اوجالسين!

48ائنتئقاميمي آلان تاري‌دير، خالقلاري منه موطئع ادن، اودور.

49او منی دوشمن ائچئندن چيخاردير، ضئدّئمه قالخانلاردان منی چوخ اوجالديبسان، قدّار آدامدان منی خئلاص ادئبسن.

50اونا گؤره ده، يارب، مئلّتلر آراسيندا سنه شوکر ادئرم، سنئن آدينا پرستئش نغمه‌لري اوخوياجاغام.

51رب پادشاهينا بؤيوک ظفرلر ورئر، مسح اتدئيئنه سِوگي گؤرسدئر. داوودا و اونون نسلئنه، ابده کئمي."