2 Kings 3

Azerbajani Bible (South) Used in Both Iran and Azerbaijan 2008

1يهودا پادشاهي يِهوشافاطين پادشاهليغينين اون‌سکّئزئنجي ائلئنده، اَخاب اوغلو يورام سامئره‌ده ائسرايئل اوستونده پادشاه اولدو و اون ائکي ائل پادشاهليق اتدي.

2او، ربّئن گؤزونده پئس اولان ائشلر اتدي، گرچي آتاسي و آناسي کئمي ديئلدي، چونکي آتاسينين دوزلتدئيي بَعَل سوتونونو آرادان آپاردي.

3آمّا هرحالدا نِباط اوغلو يَروبعامين ائسرايئله اتدئردئيي گوناهلاردان ياپيشدي؛ اونلاردان اَل چکمه‌دي.

4موآب پادشاهي مِيشَع قويون يِتئشدئرئردي. او، ائسرايئل پادشاهينا هر ائل يوز مئن قوزو و يوز مئن قوچون يونونو گؤندرَردي.

5اَخابين اؤلوموندن سونرا، موآب پادشاهي ائسرايئل پادشاهينين ضئدّئنه عوصيان قالديردي.

6او واخت پادشاه يورام سامئره‌دن چيخدي و بوتون ائسرايئللی‌لري ييغدي.

7سونرا گدئب يهودا پادشاهي يِهوشافاطا خبر گؤندردي و اونا ددي: "موآب پادشاهي منئم ضئدّئمه عوصيان قالديريب. آيا منئمله بئرلئکده موآبين ضئدّئنه گِدَرسن؟" يِهوشافاط جاواب وردی: "گده‌رم، منی اؤزون کئمي، خالقيمي خالقين کئمي، آتلاريمي آتلارين کئمي حساب ات."

8يورام سوروشدو: "هانسي يوللا چيخاق؟" او جاواب وردی: "اِدوم چؤلونون يولو ائله."

9ائسرايئل پادشاهي، يهودا پادشاهي و اِدوم پادشاهي گدئب او يولو يدّي گون گَزدئلر. عسگرلر و داللارينجا گلن حيوانلار اوچون سو يوخ ائدي.

10او واخت ائسرايئل پادشاهي ددي: "آي آمان! رب بو اوچ پادشاهي بئر يره چاغيريب کي، اونلاري موآبلي‌لارا تسلئم اتسئن."

11يِهوشافاط سوروشدو: "بورادا ربّئن بئر پيغمبري يوخدور کي، اونون واسئطه‌سئله ربدن مصلحت آلاق؟" ائسرايئل پادشاهينين اعيانلاردان بئري جاواب ورئب ددي: "شافاط اوغلو اِلئشَع بورادادير. او، ائليانين اَلئنه سو تؤکَردي."

12يِهوشافاط ددي: "اوندا ربّئن سؤزو وار." بلجه ائسرايئل پادشاهي، يِهوشافاط و اِدوم پادشاهي اِلئشَعئن يانينا گتدئلر.

13اِلئشَع ائسرايئل پادشاهيندان سوروشدو: "مندن سنه نه؟ آتانين پيغمبرلرئنئن، آنانين پيغمبرلرئنئن يانينا گت." ائسرايئل پادشاهي اونا ددي: "يوخ! چونکي رب بو اوچ پادشاهي بئر يره چاغيريب کي، اونلاري موآبلي‌لارين اَلئنه تسلئم اتسئن."

14اِلئشَع ددي: "حوضوروندا دوردوغوم وار اولان قوشونلار ربّئنه آند اولسون کي، يهودا پادشاهي يِهوشافاطا حؤرمت اتمَسَيدئم، نه سنه باخارديم، نه سني گؤرَردئم.

15ائندي منئم يانيما چنگ چالان بئر آدام گتئرئن." گتئرئلَن آدام چنگ چالارکن، ربّئن قووّتي اِلئشَعئن اوستونه گلدي.

16او ددي: "رب بله ديئر: «بو دره‌نئن هر يرئنده خندقلر قازين.»

17چونکي رب بله ديئر: «سئز کولَک و ياغيش گؤرميه‌جکسئنئز، لاکئن بو دره سو ائله دولاجاق. سئز، مال-حيوانينيز و حيوانلارينيز دويونجاق سو ائچه‌جکسئنئز.»

18بو، ربّئن گؤزونده آسان بئر شي‌دئر. او، موآبلي‌لاري دا سئزه تسلئم اده‌جک.

19بوتون قالالي شهرلري و سچمه شهرلري ووروب داغيداجاقسينيز، هر ياخشي آغاجي کَسه‌جکسئنئز، بوتون بولاقلارين گؤزونو توتاجاقسينيز و هر ياخشي زَمئني داشلارلا دولدوراجاقسينيز."

20صاباحي گون سحر، تقدئم گتئرئلَن زامان، بئردن اِدوم يولوندان سو گلدي و تورپاق سو ائله دولدو.

21بوتون موآبلي‌لار اشئتدئلر کي، پادشاهلار اونلارلا ووروشماغا گلئبلر. سئلاح داشييا بئلَن هر کسي و اونلاردان ياشدا بؤيوک اولانلاري چاغيرديلار. اونلار سرحدده دايانديلار.

22موآبلي‌لار سحر تزدن دوران زامان گونش چيخيب، سولارين اوستونه شفق سالميشدي. اونلار قاباقلارينداکي سولاري قان کئمي قيرميزي گؤردولر.

23او واخت ددئلر: "بو قاندير، يقئن پادشاهلار بئربئرلري ائله ووروشوب، بئربئرلرئني قيريبلار. ائندي، ای موآبلي‌لار، گِدَک قارَته!"

24آمّا ائسرايئل اوردوگاهينا گلدئکلري واخت، ائسرايئللی‌لر قالخيب موآبلي‌لاري قيرديلار. موآبلي‌لار اونلارين قاباغيندان قاچديلار. ائسرايئللی‌لر قاباغا گدئب موآب تورپاغينا گئردئلر و موآبلي‌لاري قيرديلار.

25اونلار شهرلري داغيتديلار، هر کس ياخشي بئر زمئيه داش آتيب اوراني دولدوردو. بلجه بوتون بولاقلارين گؤزونو توتدولار و هر ياخشي آغاجي کَسدئلر. فقط قئر-خَرِسِتئن داشلاري يرئنده قالدي، آنجاق ساپاندچيلار اونو دا موحاصئره‌يه آليب ووردولار.

26موآب پادشاهي دؤيوشده مغلوب اولدوغونو گؤرنده، اؤزو ائله يدّي يوز نفر قيلينجلي آدام گؤتوردو کي، اِدوم پادشاهينين قوشونونو ياريب قاچسينلار، لاکئن بونو اده بئلمه‌دئلر.

27سونرا او، ائلک اوغلونو کي، اونون يرئنده سلطنت اده‌جک ائدي، گؤتوردو و دووارين اوستونده اونو يانديرما قورباني تقدئم اتدي. او واخت ائسرايئللی‌لرئن ضئدّئنه بؤيوک بئر قضب اوياندي، اونلار دا اوراني ترک ادئب، اؤز اؤلکه‌لرئنه قاييتديلار.

← Chapter 2 Chapter 4 →