2 Kings 25

Azerbajani Bible (South) Used in Both Iran and Azerbaijan 2008

1صئدقئيانين پادشاهليغينين دوقّوزونجو ائلئنده، اونونجو آيين اونونجو گونو بابئل پادشاهي نَبوکَدنِصّر بوتون قوشونو ائله اورشلئمئن اوستونه هوجوم اتدي، اورايا ضئدّ اوردوگاه قوردو و اطرافيندا موحاصئره دوواري دوزلتدي.

2صئدقئيا پادشاهين حاکئمئيّتئنئن اون بئرئنجي ائلئنه قدر، شهر موحاصئره‌ده قالدي.

3دؤردونجو آيين دوقّوزونجو گونو شهرده آجليق اله گوجلَندي کي، اؤلکه خالقينين يِمَيه چؤره‌يي قالمادي.

4همئن واخت شهرئن دووارلاريندا دَلئک آچيلدي. گجه ائکن کَلدانئلر شهرئن اطرافيندا اولاندا پادشاه و بوتون دؤيوشچولر پادشاه باغچاسينين يانيندا اولان ائکي دووار آراسينداکي دروازادان چيخيب عَرَبا اوواسينا گدن يوللا گتدئلر.

5آنجاق کَلدانئلرئن قوشونو پادشاهي تعقئب اتدي و اَرئحا اووالاريندا اونا چاتدي. پادشاهين بوتون قوشونو اونو ترک ادئب داغيلميشدي.

6پادشاهي توتوب رئبلايا، بابئل پادشاهينين يانينا آپارديلار و اونون حاقّيندا حؤکم وردئلر.

7صئدقئيانين اوغوللاريني اونون گؤزو قاباغيندا اؤلدوردولر، اؤزونون ده گؤزلرئني چيخارتديلار و زنجئرله‌يئب بابئله آپارديلار.

8بابئل پادشاهي نَبوکَدنِصّرئن پادشاهليغينين اون دوقّوزونجو ائلئنده، بشئنجي آيين يدّئنجی گونو نِبوزَره‌دان کي، بابئل پادشاهينين اعياني اولان کشئکچئلر ريئسي ائدي، اورشلئمه گلدي.

9او، ربّئن معبدئنه، پادشاه سارايينا، اورشلئمده‌کي بوتون اِولره اود ووروب بوتون اَساس بئنالاري يانديردي.

10کشئکچئلر ريئسي ائله بئرلئکده گلن بوتون کَلدانئلر قوشونو اورشلئمئن اطرافينداکي دووارلاري اوچورتدي.

11کشئکچئلر ريئسي نِبوزَره‌دان شهرده قالان خالقي، بابئل پادشاهينين طرفئنه کِچَن فرارئلري و باشقا اهالئني اسئر اتدي.

12آنجاق او، باغچيليق و اَکئنچئلئک اتمک اوچون اؤلکه‌ده‌کي لاپ يوخسوللارين بئر حئصّه‌سئني اورادا ساخلادي.

13کَلدانئلر ربّئن معبدئنده اولان بورونج سوتونلاري، پايالاري و بورونج حوووضو پارچالاييب، بورونج‌لرئني بابئله آپارديلار.

14عئبادت زاماني ائشله‌دئلن خَکَندازلاري، کورَکلري، پئلته ماشالاري، قاشيقلاري و بوتون بورونج قابلاري گؤتوروب آپارديلار.

15کشئکچئلر ريئسي خالئص قيزيلدان و گوموشدن اولان بوتون شيلري–بوخوردانلاري و لَيَنچه‌لري گؤتوردو.

16ربّئن معبدي اوچون سوليمانين دوزلتدئيي ائکي سوتوندا، حوووضدا و پايالاردا اولان بوتون بورونجون آغيرليغي حسابا گلمزدي.

17بئر سوتونون بويو اون‌سکّئز قولاچ ائدي و اوستونده بورونج بئر باشليق وار ائدي. باشليغين بويو اوچ قولاچ ائدي. بو باشليغين اطرافيندا حؤرمه تور و نارلار وار ائدي. هر شي بورونجدن دوزَلدئلمئشدي. او بئري سوتون دا حؤرمه تورلا بئرلئکده بو جور ائدي.

18کشئکچئلر ريئسي باش کاهئن سِراياني، باش کاهئنئن موعاوئني صِفَنياني و اوچ قاپي کشئکچئسئني اسئر آلدي.

19شهرده قالان دؤيوشچولرئن سرکرده‌سئني، پادشاهين مصلحتچئلرئندن شهرده اولان بش نفري، اؤلکه خالقيني قوشونا يازان سرکرده‌نئن مئرزه‌سئني و اؤلکه خالقيندان شهرده قالان آلتميش نفري اسئر توتدو.

20کشئکچئلر ريئسي نِبوزَره‌دان اونلاري گؤتوروب رئبلايا، بابئل پادشاهينين يانينا آپاردي.

21بابئل پادشاهي خَمات تورپاغيندا اولان رئبلادا اونلاري اؤلدوردو. بلجه يهودا خالقي اؤز اؤلکه‌سئندن اسئر اولوندو.

22يهودا اؤلکه‌سئنده بابئل پادشاهي نَبوکدنِصّرئن توخونماديغي قالان خالقا گلئنجه، پادشاه شافان اوغلو اَخئقام اوغلو گِدَلياني اونلارين اوستونده والي قويدو.

23بابئل پادشاهينين گِدَلياني والي قويدوغونو اشئتدئکده، بوتون قوشون باشچيلاري و اونلارين آداملاري–نِتَنيا اوغلو اِسماعئل، قارِاَخ اوغلو يوخانان، نِطوَفالي تَنخومِت اوغلو سِرايا، بئر مَعَکالينين اوغلو يَعَزنيا و اونلارين دؤيوشچولري مئصپا‌يا، گِدَليانين يانينا گلدئلر.

24گِدَليا اونلارين اؤزلرئنه و آداملارينا آند ائچئب ددي: "کَلدانئلرئن نؤکرلرئندن قورخمايين. اؤلکه‌ده قاليب بابئل پادشاهينا قوللوق ادئن. بله اده‌سئنئز، سئزئن اوچون ياخشي اولار."

25يدّئنجی آيدا پادشاه نسلئندن اولان اِلئشاماع اوغلو نِتَنيا اوغلو اِسماعئل اون نفرله بئرلئکده گلئب گِدَلياني اؤلدوردو. اونلار مئصپا‌دا گِدَليانين يانيندا اولان يهودالي‌لاري و کَلدانئلري ده اؤلدوردولر.

26بؤيوکدن کئچئيه قدر بوتون خالق و قوشون باشچيلاري قالخيب مئصئره قاچدي، چونکي کَلدانئلردن قورخوردولار.

27يهودا پادشاهي يِهوياکئنئن اسئرلئکده اولماغينين اوتوز يدّئنجی ائلئنده اِوئل مِرودَک بابئل پادشاهي اولدو. همئن ائلئن اون‌ائکئنجي آيينين ائيئرمي يدّئنجی گونو اِوئل مِرودَک يهودا پادشاهي يِهوياکئني زئنداندان آزاد اتدي.

28اونونلا مهرئبانليقلا صؤحبت اتدي و اونون اوچون بابئلده‌کي قاباقکي پادشاهلارين تختلرئندن داها اوستون بئر تخت قويدوردو.

29يِهوياکئن حَبسخانا پالتارلاريني اَينئندن چيخارتدي. او ياشاديغي مودّتده پادشاهين سوفره‌سئنده يمک يئيَردي.

30بوتون عؤمرو بويو اونا پادشاه طرفئندن گونده‌لئک آذوقه ورئلئردي.