2 Chronicles 31

Azerbajani Bible (South) Used in Both Iran and Azerbaijan 2008

1بوتون بو ائش قورتاراندا، اورادا اولان بوتون ائسرايئللی‌لر يهودا شهرلرئنه چيخيب، موقدّس سوتونلاري تئکه-تئکه اتدئلر، اَشِرا بوتلرئني کَسدئلر. بوتون يهودا، بِنيامئن، اِفرايئم و مِنَسّه تورپاقلاريندا اولان پرستئشگاهلاري و قوربانگاهلاري آخيرا قدر داغيتديلار. سونرا بوتون ائسرايئل اؤولادلاري اؤز شهرلرئنه، هر کس اؤز مولکونه قاييتدي.

2خئزقئيا کاهئنلري و لاوئلی‌لري بؤلمه‌لره آييردي و کاهئنلر و لاوئلی‌لردن هر کَسي اؤز ائشئنه موناسئب اولان بؤلمه‌يه تعيئن اتدي. او، ربّئن دروازالارلا حاصارلانميش يرلرئنده، يانديرما و باريش قوربانلاريني گتئرمک، خئدمت اتمک، شوکور و حمد اوخوماق اوچون تعيئن اتدي.

3ربّئن قانونوندا يازيلديغينا گؤره يانديرما قوربانلاري يعني سحر و آخشامين يانديرما قوربانلاري، سَبّت گونلرئنئن، تزه آي مراسئملرئنئن و بايراملارين يانديرما قوربانلاري اوچون پادشاه اؤز ماليندان پاي آييردي.

4اورشلئمده ياشايان خالقا امر اتدي کي، کاهئنلرئن و لاوئلی‌لرئن پايلاريني اونلارا ورسئنلر، اِله کي، اونلار اؤزلرئني ربّئن قانونونا وقف اتسئنلر.

5بو امر هر يانا ياييلاندا ائسرايئل اؤولادلاري تاخيلين، تزه شرابين، زيتون ياغينين، بالين و بوتون زمي محصوللارينين نوباريندان بول-بول وردئلر. هر شيئن اوندا بئرئني بول-بول گتئردئلر.

6يهودا شهرلرئنده ياشايان ائسرايئللی‌لر و يهودالي‌لار اؤکوزلرئن و قويون-کچئلرئن اوندا بئرئني، اؤزلرئنئن تاريلاري ربّه تقدئس اولونان موقدّس شيلرئن اوندا بئرئني ده گتئردئلر و قالاق-قالاق وردئلر.

7اوچونجو آيدا بونلاري قالاقلارلا اوست-اوسته ييغماغا باشلاديلار و يدّئنجی آيدا قورتارديلار.

8خئزقئيا و ريئسلر گلئب قالاقلاري گؤرنده، ربّی موبارک چاغيريب اونون خالقي ائسرايئله برکت وردئلر.

9خئزقئيا بو قالاقلار باره‌ده کاهئنلردن و لاوئلی‌لردن سوروشدو.

10صادوقون نسلئندن اولان باش کاهئن عَزَريا اونا بله جاواب وردی: "ربّئن معبدئنه نذئرلر گتئرئلَن واختدان بَري بئز يِيئب دويوروق، حله آرتيق دا قالير. چونکي رب اؤز خالقينا برکت ورئب و بو بول شيلر ده آرتيق قاليب."

11خئزقئيا امر اتدي کي، ربّئن معبدئنده‌کي اوتاقلاري حاضيرلاسينلار. اونلار حاضيرلاديلار.

12نذئرلري، اوندا بئرلري و تقدئس اولونان شيلري صداقتله اورايا گتئردئلر. بو شيلرئن ساخلاماسينا لاوئلي کونَنيا مأمور ائدي و موعاوئني ده قارداشي شئمعي ائدي.

13يِخي‌اِل، عَزَزيا، نَخَت، عَساهِل، يِرئموت، يوزاباد، اِلي‌اِل، يئسمَکيا، مَخَت و بِنايا دا پادشاه خئزقئيانين و تاري معبدئنده ريئس اولان عَزَريانين امرئنه گؤره، کونَنيانين و قارداشي شئمعئنئن اَلي آلتيندا مأمور ائدئلر.

14شرق دروازاسيندا قاپيچي اولان لاوئلي يئمنا اوغلو قورِه ربّه ورئلَن نذئرلره و لاپ موقدّس شيلري پايلاماقدان اؤتري اؤز گؤيلو ائله تاري اوچون ورئلَن تقدئملره نظارت ادئردي.

15عِدن، مئنيامئن، يِشوع، شَمَعيا، اَمَريا و شِکَنيا، بؤلمه‌لرئنه گؤره، کاهئن شهرلرئنده بؤيوکدن کئچئيه قدر، قورِه‌نئن نظارتي آلتيندا بو قارداشلارينا پايلاريني بؤلمک ائشي تاپشيريلميشدي:

16نسئل شجره‌لرئنه باخماياراق، اوچ ياشيندا و اوندان يوخاري ياشدا اولان، وظئفه‌لرئنه و بؤلمه‌لرئنه گؤره گونده‌لئک خئدمت ائشي اوچون ربّئن معبدئنه گئرَن کئشئلرئن هاميسي؛

17نسئل شجره‌لرئنده يازيلديغي کئمي نسئللرئنه گؤره کاهئنلر، وظئفه‌لرئنه، هم ده بؤلمه‌لرئنه گؤره ائيئرمي ياشيندا و اوندان يوخاري ياشدا اولان لاوئلی‌لر؛

18نسئل شجره‌لرئنه گؤره بوتون جاماعاتين اوشاقلاري، آروادلاري، اوغول و قيزلاري-چونکي اونلار اؤزلرئني صداقتله موقدّس خئدمت اوچون تقدئس اتمئشدئلر-

19اؤز شهرلرئنئن اطراف چؤللرئنده ياشايان هارون نسلئندن کاهئنلر. هر شهرده آدلاري چکئلَن آداملار قويولموشدو کي، کاهئنلر آراسينداکي بوتون کئشئلره و لاوئلی‌لر آراسيندا نسئل شجره‌لرئنده يازيلانلارين هاميسينا پاي ورسئنلر.

20خئزقئيا بوتون يهودادا بله اتدي، تاريسي ربّئن قاباغيندا ياخشي، دوغرو و صداقتلي ائشلر گؤردو.

21او اؤز تاريسيني آختاراراق تاري معبدئنئن خئدمتئنه، قانونا و امره عمل اتمکده باشلاديغي هر ائشي بوتون قلبي ائله يرئنه يتئردي و اوغور قازاندي.

← Chapter 30 Chapter 32 →