2 Chronicles 20

Azerbajani Bible (South) Used in Both Iran and Azerbaijan 2008

1بوندان سونرا موآبلي‌لار و عَمّونلولار، اونلارلا برابر ماعونلولاردان بعضئسي گلدئلر کي، يِهوشافاطين ضئدّئنه دؤيوشسونلر.

2بعضی آداملار گلئب يِهوشافاطا خبر گتئرئب ددئلر: "دهنزئن او بئري طرفئندن، اِدومدان سنئن ضئدّئنه بؤيوک بئر قوشون گلئر. باخ، ائندي اونلار خَصِصون-تامارداديرلار. (يعني عِين‌گِدئده)"

3يِهوشافاط قورخدو و اوزونو ربّی آختارماغا دؤندَردي و بوتون يهودا اوچون اوروج اعلان اتدي.

4يهودالي‌لار ربدن کؤمک ائسته‌مک اوچون ييغيلديلار، حتّا يهودانين بوتون شهرلرئندن ده گلدئلر کي، ربّی آختارسينلار.

5يِهوشافاط ربّئن معبدئنده، تزه حَيَطئن قاباغيندا، يهودا و اورشلئم جاماعاتينين قاباغيندا دوروب ددي:

6"يارب، آتالاريميزين تاريسي، گؤيلرده اولان تاري مگر سن ديئلسن؟ بوتون مئلّتلرئن پادشاهليقلاري اوستونه حاکئم اولان مگر سن ديئلسن؟ قودرتله قووّت سنئن اَلئنده‌دئر و هچ کئم سنئن ضئدّئنه دورا بئلمز.

7ای تاريميز، مگر سن ديئلسن کي، بو تورپاقدا ياشايانلاري خالقين ائسرايئلئن قاباغيندا قوودون و اونو دوستون ائبراهئمئن نسلئنه ابدی اولاراق وردئن؟

8اورادا مسکن سالديلار، اورادا سنئن آدينا موقدّس بئر مکان تئکدئلر و ددئلر:

9«اگر اوستوموزه بلا، قيلينج، جزا، وبا و يا آجليق گلسه، آدين بو معبده اولدوغونا گؤره بو معبدئن قاباغيندا، يعني سنئن قاباغيندا دوراجاغيق و چتئن گونلرده سنه فرياد اده‌جيئک، اوندا سن اشئده‌جکسن و خئلاص اده‌جکسن.»

10ائندي باخ، عَمّونلولار، موآبلي‌لار، سِعئر داغينين ساکئنلري نه ادئر! مئصئر تورپاغيندان گلرکَن ائسرايئللی‌لري اونلارين تورپاغينا گئرميه قويمادين، ائسرايئللی‌لر ده دؤنوب اونلاري محو اتمه‌دئلر.

11ائندي گؤر عوضئني نجه ورئرلر؛ گلئرلر کي، بئزه ائرث وردئيئن مولکوندن بئزي قووسونلار.

12ای تاريميز، اونلارا مگر حؤکم اتميه‌جکسن؟ چونکي اوستوموزه گلن بو بؤيوک قوشونون ضئدّئنه گوجوموز يوخدور، نه اده‌جيئمئزي بئلمئرئک، آنجاق گؤزلرئمئز سنه دئکئلئب."

13بوتون يهودالي‌لار کؤرپه‌لري، آروادلاري و اوشاقلاري ائله ربّئن حوضوروندا دورموشدولار.

14جاماعاتين آراسيندا ربّئن روحو آساف نسلئندن اولان بئر لاوئلي، مَتّنيا اوغلو يِعي‌اِل اوغلو بِنايا اوغلو زِکَريا اوغلو يَخه‌زي‌اِلئن اوستونه گلدي.

15او ددي: "بوتون يهودالي‌لار و اورشلئمده ياشايانلار و سن پادشاه يِهوشافاط، ياخشي اشئدئن! رب سئزه بله ديئر: «بو بؤيوک قوشوندان قورخمايين و اوره‌يئنئز اوزولمه‌سئن، چونکي دؤيوش سئزئن يوخ، تارينيندير.

16صاباح اونلارين ضئدّئنه اِنئن. باخ، اونلار صئص يوخوشو ائله قالخيب گله‌جکلر و اونلاري دره‌نئن آخيريندا، يِروعِل چؤلونون قاباغيندا تاپاجاقسينيز.

17بو موحارئبه‌ده دؤيوشمک سئزه لازيم اولماياجاق. ای يهودالي‌لار و اورشلئملی‌لر، صف باغلاييب دورون، اؤز حاقّينيزدا ربّئن خئلاصيني گؤرون. قورخمايين و اوزولمه‌يئن. صاباح اونلارين قاباغينا گدئن و رب سئزئنله اولاجاق.»"

18يِهوشافاط اوزو اوسته يِره قاپاندي و بوتون يهودالي‌لار و اورشلئمده ياشايانلار ربّئن حوضوروندا يره قاپانيب اونو پرستئش اتدئلر.

19قوحات و قورَخ نسئل‌لرئندن اولان لاوئلی‌لر آياغا قالخيب ائسرايئلئن تاريسي ربّه چوخ اوجا سَسله شوکور اتدئلر.

20اونلار سحر تزدن قالخديلار و تِقوعَع چؤلونه چيخديلار. چيخديقلاري زامان يِهوشافاط دوروب ددي: "ای يهودا و اورشلئمده ياشايانلار، منی اشئدئن: تارينيز ربّه بِل باغلايين، پايدار قالارسينيز، اونون پيغمبرلرئنه ائنانين و اوغور قازانارسينيز."

21خالقلا مصلحت اتدئکدن سونرا، ربّه نغمه اوخويانلاري تعيئن اتدي کي، قوشونونون قاباغيندا گتسئنلر و موقدّس جلالينا حمد ادئب اوخوسونلار: "ربّه شوکور ادئن، چونکي اونون محبّتي ابدي‌دئر."

22تَرَنّومله حمده باشلاديقلاري زامان، رب يهودايا گلن عَمّونلولارين، موآبلي‌لارين، و سِعئر داغينين ساکئنلرئنئن ضئدّئنه کمئن قوردو و اونلار قيريلديلار.

23چونکي عَمّونلولارلا موآبلي‌لار سِعئر داغينين ساکئنلرئنئن ضئدّئنه قالخيب اونلاري کامئل قيرديلار. سِعئر ساکئنلرئني قيراندان سونرا دا بئربئرلرئني محو اتمه‌يه باشلاديلار.

24يهودالي‌لار چؤله باخان گؤزَتچي يرئنه چاتديقدا، قوشونا باخيب يره ييخيلميش مِيئتلر گؤردولر. صاغ قالان يوخ ائدي.

25يِهوشافاط و اونون خالقي اونلارين قنئمتئني گؤتورميه گلدئلر، اونلارين آراسيندا دؤيوش ماللار، پالتارلار و قئيمتلي شيلر تاپديلار. بونلاردان او قدر ييغديلار کي، داشييا بئلمه‌دئلر. قنئمت او قدر چوخ ائدي کي، اونو اوچ گون ييغيرديلار.

26دؤردونجو گون بِراکا دره‌سئنده ييغيلديلار کي، ربّه حمد اتسئنلر. بوندان اؤتري او يرئن آديني بِراکا دره‌سي قويدولار و بو گونه قدر ده بله‌دئر.

27يهودا و اورشلئمدن اولان آداملارين هاميسي، يِهوشافاطين باشچيليغي آلتيندا شادليقلا اورشلئمه گری دؤندولر، چونکي رب دوشمنلري اوستونده ظفره گؤره اونلارا شادليق ورمئشدي.

28چنگلر، طنبورلار و کَره‌نايلار چالاراق اورشلئمه، ربّئن معبدئنه گلدئلر.

29بوتون اؤلکه‌لرده‌کي پادشاهلار او زامان کي، ائسرايئلئن دوشمنلرئنئن ضئدّئنه ربّئن دؤيوشدويونو اشئتدئلر، اونلارين اوستونه تارينين قورخوسو دوشدو.

30بلجه يِهوشافاطين پادشاهليغينا اَمئن-آمانليق ساکئن اولدو، چونکي تاريسي اونا هر طرفدن دئنجلئک وردی.

31يِهوشافاط يهودا اوستونده پادشاه اولدو. پادشاه اولدوغو واخت اوتوز بش ياشيندا ائدي. او، اورشلئمده ائيئرمي بش ائل پادشاهليق اتدي. آناسينين آدي شئلخي قيزي عَزوبا ائدي.

32يِهوشافاط آتاسي آسانين يولو ائله گتدي و اوندان آزماييب ربّئن گؤزونده دوز اولان ائشلر اتدي.

33آنجاق پرستئشگاهلار آرادان قالديريلمادي و خالقين اوره‌يي حله آتالارينين تاريسي ربّه طرف دؤنمه‌مئشدي.

34يِهوشافاطين قالان ائشلري، ائلک ائشلرئندن آخير ائشلرئنه قدر، خَناني اوغلو يِيهونون تارئخ کئتابيندا يازيليب کي، ائسرايئل پادشاهلارينين کئتابيندادير.

35اوندان سونرا يهودا پادشاهي يِهوشافاط، ائسرايئل پادشاهي اَخَزيا ائله ائتّئفاق قوردو. اونون بو عملي شرارت ائدي.

36موتّفئق اولدولار کي، تَرشئشه گتمه‌يه گَمئلر دوزلتسئنلر و گَمئلري عِصيون‌گِبِرده دوزلتدئلر.

37مارِشادان اولان دوداوياهونون اوغلو اِلئعِزِر يِهوشافاطين ضئدّئنه پيغمبرلئک ادئب ددي: "اَخَزيا ائله ائتّئفاق قوردوغون اوچون رب سنئن ائشلرئني پوزدو." بلجه گَمئلر پارچالاندي و تَرشئشه گده بئلمه‌دئلر.

← Chapter 19 Chapter 21 →