2 Chronicles 11

Azerbajani Bible (South) Used in Both Iran and Azerbaijan 2008

1رِحوبعام اورشلئمه گلدئکده، يهودا و بِنيامئن اِوئني- يوز هشتاد مئن سچمه دؤيوشچوسونو بئر يره ييغدي کي، ائسرايئللی‌لرله موحارئبه ادئب سلطنتي رِحوبعاما قايتارسين.

2لاکئن ربّئن بو سؤزو تاري آدامي شِمَعيايا نازئل اولدو:

3"يهودا پادشاهي سوليمان اوغلو رِحوبعاما، يهودا و بِنيامئنده اولان بوتون ائسرايئللی‌لره دِه کي،

4رب بله ديئر: «گرک گتميه‌سئنئز و هموطنلرئنئزله موحارئبه اتميه‌‌سئنئز. هر کس اؤز اِوئنه قاييتسين، چونکي بو ائش منئم طرفئمدن اولوب.»" بلجه اونلار ربّئن سؤزونه قولاق آسديلار و يَروبعامين اوستونه گتمکدن اَل چکدئلر.

5رِحوبعام اورشلئمده ياشادي و يهودانين دئفاعسي اوچون شهرلر تئکدي.

6تئکدئيي شهرلر بِيت‌لِخِم، اِيتام، تَقوعَع،

7بِيت‌صور، سوکو، عَدولّام،

8گَت، مارِشا، زئف،

9اَدوره‌يئم، لاکئش، عَزِقا،

10صورعا، اَيّالون و خِبرون ائدي. او يهودا و بِنيامئن تورپاغيندا اولان بو قالالي شهرلري تئکدي.

11قالالاري مؤحکمله‌دئب اونلارا سرکرده‌لر تعيئن اتدي و اونلاردا ارزاق، زيتون ياغي، و شراب آنبار اتدي.

12هر شهره سئپر و نئزه‌لر قويدو، اونلاري چوخ مؤحکملَندئردي. بلجه يهودا ائله بِنيامئن تورپاقلاري اونون طرفئنده قالديلار.

13بوتون ائسرايئلده اولان کاهئنلر و لاوئلی‌لر ده اونلارين بوتون محل‌لرئندن گلئب رِحوبعامين يانينا ييغيلديلار.

14لاوئلی‌لر اوتلاقلاريني و مولکلرئني قويوب يهودايا و اورشلئمه گلدئلر. چونکي يَروبعام اونلاري اوغوللاري ائله بئرلئکده ربّه کاهئنلئک اتمکدن برکنار اتمئشدي.

15او، پرستئشگاهلار اوچون هم ده دوزلتدئيي کچي و دانا بوتلري اوچون اؤز کاهئنلرئني قويموشدو.

16اونلارين دالينجا بوتون ائسرايئل قبئله‌لرئندن اولان ائسرايئلی‌لر ده کي، صادئق اورَکله ربّی آختارماق ائسته‌يئردئلر، اورشلئمه گلدئلر کي، آتالارينين تاريسي ربّه قوربان تقدئم اتسئنلر.

17يهودا پادشاهليغيني مؤحکملَندئردئلر و اوچ ائل سوليمانين اوغلو رِحوبعاما کؤمک اتدئلر. چونکي اوچ ائل داوودون و سوليمانين يولو ائله گتدئلر.

18رِحوبعام ماخَلَتي اؤزونه آرواد آلدي. ماخَلَت داوودون اوغلو يِرئموتلا يَسّه‌نئن اوغلو اِلئآبين قيزي اَبئحه‌يئلئن قيزي ائدي.

19او، رِحوبعاما اوغوللار دوغدو: يِعوشو، شِمَرياني، زاهَمي.

20ماخَلَتدن سونرا اَبشالومون قيزي مَعَکاني آلدي. او، اَبئياني، عَتّه‌يي، زئزاني و شِلومئتي دوغدو.

21رِحوبعام اَبشالومون قيزي مَعَکاني بوتون آيري آروادلاري و جارئيه‌لرئندن داها چوخ سِوئردي. او، اون سکّئز آرواد و آلتميش جارئيه آلميشدي، ائيئرمي سکّئز اوغولون و آلتميش قيزين آتاسي اولدو.

22رِحوبعام مَعَکا اوغلو اَبئياني قارداشلاري آراسيندا باشچي و رهبر تعيئن اتدي چونکي اونو پادشاه اتمک نئيّتئنده ائدي.

23آغيلّي رفتار ادئب بوتون يهودا و بِنيامئن تورپاغيندا هر قالالي شهره اوغوللاريني گؤندردي و اونلارا بول ارزاق وردی، اونلار اوچون چوخلو آرواد آلدي.

← Chapter 10 Chapter 12 →