1 Samuel 5

Azerbajani Bible (South) Used in Both Iran and Azerbaijan 2008

1فئلئسطلی‌لر تارينين سانديغيني اَله کچئردئب اِبِنعِزِردن اَشدودا آپارديلار.

2تارينين سانديغيني داگونون معبدئنه گتئرئب داگونون هيکلئنئن يانينا قويدولار.

3او گونون صاباحي اَشدودلولار اِرکَن دوراندا گؤردولر کي، داگون ربّئن سانديغينين قاباغيندا اوزو اوسته يره دوشوب. اونلار داگونو گؤتوروب اؤز يرئنه قويدولار.

4آمّا صاباحيسي گون سحر اِرکَن دوردوقلاري واخت گؤردولر کي، داگون گئنه ربّئن سانديغينين قاباغيندا اوزو اوسته يره دوشوبدور. بو دفه داگونون باشي ائله ائکي اَلي قيريليب، قاپي آغزينا دوشموش و فقط بدني قالميشدي.

5بونا گؤره بو گونه قدر اَشدودداکي داگون معبدئنه گلنلر ده بو معبدئن قاپيسي آغزينا آياق باسميرلار.

6ربّئن اَلي اَشدودلولارين اوستونده آغيرلاشدي. اونلارا و اطرافينداکي جاماعاتا بلا ورئب بدنلرئنه شئشلر چيخارتدي.

7اَشدودلولار وضعئيّتئن بله اولدوغونو گؤرنده ددئلر: "ائسرايئل تاريسينين سانديغي بئزئم يانيميزدا گرک قالماسين، چونکي اونون اَلي بئزي و آللاهيميز داگونو آغير بئر شَکئلده ذلئل ادئر."

8اونا گؤره ده هر طرفه قاصئدلر گؤندردئلر و بوتون فئلئسطلی‌لرئن آغالاريني يانلارينا ييغيب سوروشدولار: "ائسرايئل تاريسينين سانديغيني نه اِدَک؟" فئلئسطلی‌لرئن آغالاري ددئلر: "ائسرايئل تاريسينين سانديغي گَته آپاريلسين." بِلَجه، ائسرايئل تاريسينين سانديغيني گَته آپارديلار.

9اونلار سانديغي گَته گتئرندن سونرا، ربّئن اَلي بو شهرئن اوستونده ده آغيرلاشدي. شهري دهشتلي بئر قورخو بورودو. شهر ساکئنلرئنئن هاميسيني بؤيوکدن کئچئيه قدر ووردو. اونلارين دا بدنلرئنه شئش چيخدي.

10بو حادئثه‌دن سونرا تارينين سانديغيني عِقرونا گؤندردئلر. تارينين سانديغي عِقرونا چاتاندا، عِقرونلولار فرياد ادئب ددئلر: "ائسرايئلئن تاريسينين سانديغيني بورايا گتئرئبلر کي، هم بئزي هم ده خالقيميزي اؤلدورسونلر!"

11اونا گؤره ده هر طرفه قاصئدلر گؤندردئلر و بوتون فئلئسطلی‌لرئن آغالاريني يانلارينا ييغيب ددئلر: "ائسرايئل تاريسينين سانديغيني اؤز يرئنه گری گؤنده‌رئن اِله کي، بئزي و خالقيميزي قيرماسين." چونکي بوتون شهري اؤلوم واهئمه‌سي بوروموشدو و تارينين اَلي اورا اوچون ده چوخ آغير اولموشدو.

12صاغ قالانلارين دا بدنلرئنه شئش چيخدي و شهرئن فريادي عرشه قالخدي.

← Chapter 4 Chapter 6 →